ನಕಲಿ ಇನ್​ವಾಯ್ಸ್​ ಬಳಸಿ ತೆರಿಗೆ ವಂಚನೆ: ಮೂರು ಸಂಸ್ಥೆ, ಮೂವರು ಆರೋಪಿಗಳ ವಿರುದ್ಧ ಪ್ರಕರಣ

ನಕಲಿ ಐಟಿಸಿ ಇನ್‌ವಾಯ್ಸ್ ಬಳಸಿಕೊಂಡು ತೆರಿಗೆ ವಂಚನೆ ಮಾಡುತ್ತಿದ್ದ ಮೂವರು ವ್ಯಕ್ತಿಗಳು ಹಾಗೂ ಮೂರು ಸಂಸ್ಥೆಗಳ ವಿರುದ್ಧ ಡೈರೆಕ್ಟರೇಟ್ ಜನರಲ್ ಆಫ್ ಜಿಎಸ್​ಟಿ ಇಂಟೆಲಿಜೆನ್ಸ್ (ಡಿಜಿಜಿಐ) ಪ್ರಕರಣ ದಾಖಲಿಸಿದ್ದಾರೆ.

ನವದೆಹಲಿ:ನಕಲಿ ಇನ್‌ಪುಟ್ ಟ್ಯಾಕ್ಸ್ ಕ್ರೆಡಿಟ್ (ಐಟಿಸಿ) ಇನ್‌ವಾಯ್ಸ್‌ಗಳನ್ನು ಬಳಸಿಕೊಂಡು ಐಜಿಎಸ್‌ಟಿ ಮರುಪಾವತಿ ಮಾಡಿರುವುದಾಗಿ ವಂಚನೆ ಮಾಡಿದ್ದಕ್ಕಾಗಿ ತೆರಿಗೆ ಅಧಿಕಾರಿಗಳು ಮೂವರನ್ನು ಬಂಧಿಸಿ ಮೂರು ಸಂಸ್ಥೆಗಳ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ ಎಂದು ಹಣಕಾಸು ಸಚಿವಾಲಯದ ಅಧಿಕಾರಿಗಳು ತಿಳಿಸಿದ್ದಾರೆ.

ಬಂಧಿತ ಆರೋಪಿಗಳ ಹೆಸರನ್ನು ಬಹಿರಂಗಪಡಿಸಲಾಗಿಲ್ಲ. ಡೈರೆಕ್ಟರೇಟ್ ಜನರಲ್ ಆಫ್ ಜಿಎಸ್​ಟಿ ಇಂಟೆಲಿಜೆನ್ಸ್ (ಡಿಜಿಜಿಐ) ಅಧಿಕಾರಿಗಳು ಫಾರ್ಚೂನ್ ಗ್ರಾಫಿಕ್ಸ್ ಲಿಮಿಟೆಡ್, ರೀಮಾ ಪಾಲಿಕೆಮ್ ಪ್ರೈವೇಟ್ ಲಿಮಿಟೆಡ್ ಮತ್ತು ಗಣಪತಿ ಎಂಟರ್‌ಪ್ರೈಸಸ್ ಎಂಬ ಮೂರು ಸಂಸ್ಥೆಗಳ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ. ಈ ಸಂಸ್ಥೆಗಳು ಯಾವುದೇ ನೈಜ ಸರಕುಗಳ ಸರಬರಾಜು ಇಲ್ಲದೆ ಇನ್​ವಾಯ್ಸ್​ ನೀಡುವಲ್ಲಿ ತೊಡಗಿಸಿಕೊಂಡಿವೆ ಎಂದು ಹಣಕಾಸು ಸಚಿವಾಲಯ ಹೇಳಿದೆ.

ಇತ್ತೀಚೆಗೆ, ತೆರಿಗೆ ಅಧಿಕಾರಿಗಳು ದತ್ತಾಂಶ ವಿಶ್ಲೇಷಣೆ ಮತ್ತು ಇತರ ಅತ್ಯಾಧುನಿಕ ವಿಧಾನಗಳ ಮೂಲಕ ತೆರಿಗೆ ವಂಚಕರ ಮಾಹಿತಿ ಜಾಲಾಡಿದಾಗ, ಕಂಪನಿಗಳ ಕಳ್ಳಾಟ ಬಯಲಾಗಿದೆ. ಒಂಬತ್ತು ತಿಂಗಳ ಹಿಂದೆ ಡಿಜಿಜಿಐ ಮತ್ತು ಕಂದಾಯ ಗುಪ್ತಚರ ನಿರ್ದೇಶನಾಲಯದ ಜಂಟಿ ಕಾರ್ಯಾಚರಣೆಯಲ್ಲಿ ಸಿಕ್ಕಿಬಿದ್ದಿದ್ದ ಅನನ್ಯ ರಫ್ತು ಕಂಪನಿಯ ಪ್ರಕರಣದ ವಿಚಾರಣೆ ನಡೆಸುವಾಗ ಈ ಮೂರು ಕಂಪನಿಗಳ ವಂಚನೆ ಗೊತ್ತಾಗಿದೆ.

ತನಿಖೆಯ ವೇಳೆ, ರೀಮಾ ಪಾಲಿಕೆಮ್, ಫಾರ್ಚೂನ್ ಗ್ರಾಫಿಕ್ಸ್ ಲಿಮಿಟೆಡ್ ಮತ್ತು ಗಣಪತಿ ಎಂಟರ್‌ಪ್ರೈಸಸ್ 600 ಕೋಟಿ ರೂ. ತೆರಿಗೆ ವಂಚಿಸಲು 4,100 ಕೋಟಿ ರೂ. ಮೌಲ್ಯದ ಐಟಿಸಿ ಬಳಸಿಕೊಂಡಿರುವುದನ್ನು ಡಿಜಿಜಿಐ ಅಧಿಕಾರಿಗಳು ಪತ್ತೆ ಹಚ್ಚಿದ್ದಾರೆ.