ಅಬ್ಬರಿಸಿದ ವಿಂಡೀಸ್ ವೇಗಿಗಳು... ಪ್ರಥಮ ಪಂದ್ಯದಲ್ಲೇ ಪಾಕ್ ಹೀನಾಯ ಪ್ರದರ್ಶನ..!

ವಿಶ್ವಕಪ್​ನ ತನ್ನ ಮೊದಲ ಪಂದ್ಯದಲ್ಲಿ ಪಾಕಿಸ್ತಾನ ತಂಡ ಕೇವಲ 105 ರನ್​​ಗಳಿಗೆ ಆಲೌಟ್ ಆಗುವ ಮೂಲಕ ನಿರಾಸೆ ಮೂಡಿಸಿದೆ.

ಟ್ರೆಂಟ್​​ಬ್ರಿಡ್ಜ್​:ವಿಶ್ವಕಪ್​ ಟೂರ್ನಿಯ ಎರಡನೇ ಪಂದ್ಯದಲ್ಲಿ ಪಾಕಿಸ್ತಾನ ತಂಡ ಹೀನಾಯ ಪ್ರದರ್ಶನ ತೋರಿದ್ದು, ವೆಸ್ಟ್ ಇಂಡೀಸ್ ವಿರುದ್ಧ ಕೇವಲ 105 ರನ್​ಗಳಿಗೆ ಸರ್ವಪತನ ಕಂಡಿದೆ.

ಟಾಸ್​ ಗೆದ್ದು ಪಾಕಿಸ್ತಾನವನ್ನು ಬ್ಯಾಟಿಂಗ್​ಗೆ ಆಹ್ವಾನಿಸಿದ ಹೋಲ್ಡರ್​ ಪಡೆ ಪಂದ್ಯದ ಆರಂಭದಿಂದಲೂ ಹಿಡಿತ ಸಾಧಿಸಿತ್ತು.

ವೇಗಿಗಳಾದ ಓಶಾನೆ ಥೋಮಸ್, ಜೇಸನ್ ಹೋಲ್ಡರ್​ ಬಿರುಸಿನ ಬೌಲಿಂಗ್​ಗೆ ತತ್ತರಿಸಿದ ಸರ್ಫರಾಜ್ ಪಡೆ ನೂರು ರನ್​ ಗಳಿಸುವಷ್ಟರಲ್ಲಿ ಸುಸ್ತಾಯಿತು. ಫಖರ್​ ಜಮಾನ್ ಹಾಗೂ ಬಾಬರ್ ಅಜಮ್​​ ಗಳಿಸಿದ ತಲಾ​ 22 ರನ್​​ ವೈಯಕ್ತಿಕ ಗರಿಷ್ಠ ಸ್ಕೋರ್​​​.

ಪಾಕ್ ತಂಡದಲ್ಲಿ ಒಟ್ಟಾರೆ ನಾಲ್ವರು ಎರಡಂಕಿ ಗಡಿ ದಾಟಿದರೆ ಉಳಿದವರು ಬಂದ ದಾರಿಯನ್ನು ಅಷ್ಟೇ ವೇಗವಾಗಿ ಹಿಡಿದರು. ಪರಿಣಾಮ 21.4 ಓವರ್​​ನಲ್ಲಿ 105 ರನ್​ ಗಳಿಸಿ ಪಾಕಿಸ್ತಾನ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡಿತು.

ಕೆರಬಿಯನ್ನರ ಪರ ಓಶಾನೆ ಥೋಮಸ್ ನಾಲ್ಕು, ಹೋಲ್ಡರ್​ ಮೂರು ಹಾಗೂ ಆಂಡ್ರೆ ರಸೆಲ್ ಎರಡು ವಿಕೆಟ್ ಪಡೆದು ಮಿಂಚಿದರು.