ಗೌರಿ ಲಂಕೇಶ್ ಹತ್ಯೆ ಭೇದಿಸಿದ ಎಸ್ಐಟಿಗೆ ಬಂಪರ್​ ಗಿಫ್ಟ್​... ಸರ್ಕಾರದಿಂದ 25 ಲಕ್ಷ ರೂ.ಬಹುಮಾನ ಘೋಷಣೆ

ಕರ್ನಾಟಕ ಪೊಲೀಸ್ ಅಧಿಕಾರಿಗಳತ್ತ ಬೇರೆ ರಾಜ್ಯದ ಪೊಲೀಸ್ ಇಲಾಖೆ ತಿರುಗಿನೋಡುವಂತೆ ಮಾಡಿದ್ದ ಕರ್ನಾಟಕ ಎಸ್ಐಟಿ ತಂಡ, ಗೌರಿ ಲಂಕೇಶ್ ಹತ್ಯೆಯಾದ ಒಂದೇ ವರ್ಷದಲ್ಲಿ ಪ್ರಕರಣಕ್ಕೆ ತಾರ್ಕಿಕ ಅಂತ್ಯ ಹಾಡಿತ್ತು.

ಬೆಂಗಳೂರು:ಪತ್ರಕರ್ತೆ ಗೌರಿ ಲಂಕೇಶ್ ಹತ್ಯೆ ಪ್ರಕರಣದ ಎಲ್ಲ ಆರೋಪಿಗಳನ್ನು ಬಂಧಿಸುವಲ್ಲಿ ಸಫಲರಾಗಿದ್ದ ವಿಶೇಷ ತನಿಖಾ ತಂಡ(ಎಸ್ಐಟಿ)ಗೆ ರಾಜ್ಯ ಸರ್ಕಾರ 25 ಲಕ್ಷ ನಗದು ಬಹುಮಾನ ಘೋಷಿಸಿದೆ.

ಗಂಭೀರ ಹಾಗೂ ಸೂಕ್ಷ್ಮ ಪ್ರಕರಣವನ್ನು ಸವಾಲಾಗಿ ಸ್ವೀಕರಿಸಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದ್ದ ಗೌರಿ ಲಂಕೇಶ್ ಕೊಲೆ ಕೇಸ್ ಬೇಧಿಸಿದ ಎಸ್ಐಟಿ ತಂಡಕ್ಕೆ ಕೊನೆಗೂ ಸರ್ಕಾರ ನಗದು ಬಹುಮಾನ ಪ್ರಕಟಿಸಿದೆ.

ತನಿಖೆ ಭೇದಿಸಲು ರಚಿಸಲಾಗಿದ್ದ ಎಸ್ಐಟಿಗೆ ಈಗಿನ ನಗರ ಪಶ್ಚಿಮ ವಿಭಾಗದ ಹೆಚ್ಚುವರಿ ಪೊಲೀಸ್ ಆಯುಕ್ತ ಬಿಜಯ್ ಕುಮಾರ್ ಸಿಂಗ್ ಅವರನ್ನು ಮುಖ್ಯಸ್ಥರನ್ನಾಗಿ ಮಾಡಿ, ಡಿಸಿಪಿಯಾಗಿದ್ದ ಅನುಚೇತ್ ಅವರನ್ನು ತನಿಖಾಧಿಕಾರಿಯಾಗಿ ನಿಯೋಜಿಸಲಾಗಿತ್ತು. ನಾಲ್ವರು ಡಿವೈಎಸ್ಪಿ ಹಾಗೂ 13 ಮಂದಿ ಇನ್ಸ್​​​ಪೆಕ್ಟರ್, ಪೊಲೀಸ್ ಸಿಬ್ಬಂದಿ ಹಾಗೂ ತಾಂತ್ರಿಕ ಸಿಬ್ಬಂದಿ ಸೇರಿದಂತೆ 91 ಮಂದಿ ಪೊಲೀಸರು ಎಸ್ಐಟಿಯಲ್ಲಿ ಕಾರ್ಯನಿರ್ವಹಿಸಿದ್ದರು.

ಬಹುಮಾನದ ಆದೇಶ ಪ್ರತಿ

ಕರ್ನಾಟಕ ಪೊಲೀಸ್ ಅಧಿಕಾರಿಗಳತ್ತ ಬೇರೆ ರಾಜ್ಯದ ಪೊಲೀಸ್ ಇಲಾಖೆ ತಿರುಗಿನೋಡುವಂತೆ ಮಾಡಿದ್ದ ಕರ್ನಾಟಕ ಎಸ್ಐಟಿ ತಂಡ, ಗೌರಿ ಲಂಕೇಶ್ ಹತ್ಯೆಯಾದ ಒಂದೇ ವರ್ಷದಲ್ಲಿ ಪ್ರಕರಣಕ್ಕೆ ತಾರ್ಕಿಕ ಅಂತ್ಯ ಹಾಡಿತ್ತು.

ಪ್ರಕರಣದಲ್ಲಿ ಅಮೋಲ್ ಕಾಳೆ, ಪರಮೇಶ್ ವಾಗ್ಮೋರೆ, ಗಣೇಶ್ ಮಿಸ್ಕಿನ್, ಹೊಟ್ಟೆ ಮಂಜು ಸೇರಿ ಒಟ್ಟು 16 ಮಂದಿ ಆರೋಪಿಗಳನ್ನು ಬಂಧಿಸಲಾಗಿತ್ತು. ಅಲ್ಲದೇ ಆರೋಪಿಗಳ‌ ಮೇಲೆ ಕೋಕಾ ಕಾಯ್ದೆ ಜಾರಿ‌ ಮಾಡಲಾಗಿತ್ತು.

ತನಿಖೆ ಭೇದಿಸಿದ ಬಳಿಕ ಎಸ್ಐಟಿ ಮುಖ್ಯಸ್ಥ ಬಿ.ಕೆ.ಸಿಂಗ್,ನಗದು ಬಹುಮಾನ ನೀಡುವಂತೆ ಗೃಹ ಇಲಾಖೆ ಹೆಚ್ಚುವರಿ ಕಾರ್ಯದರ್ಶಿ ರಜನೀಶ್ ಗೋಯಲ್​ಗೆ ಪತ್ರ ಬರೆದಿದ್ದರು. ಲೋಕಸಭಾ ಚುನಾವಣೆಯ‌ ನೀತಿ ಸಂಹಿತೆ ಅಡ್ಡಿ ಬಂದಿದ್ದರಿಂದ ಬಹುಮಾನ ತಡೆ ಹಿಡಿಯಲಾಗಿತ್ತು. ಇದೀಗ ಎಸ್ಐಟಿ ತಂಡಕ್ಕೆ ಬಹುಮಾನ ಘೋಷಿಸುವ‌ ಮೂಲಕ ಪೊಲೀಸರನ್ನು ಹುರಿದುಂಬಿಸುವ ಕೆಲಸ ಮಾಡಿದೆ.