ಹಂಪಿಯ ಗೈಡ್​ಗಳಿಗೆ ಸುಧಾಮೂರ್ತಿ ಧನ ಸಹಾಯ: ತಲಾ 10 ಸಾವಿರ ರೂ. ನೆರವು

ಹಂಪಿ ಪ್ರವಾಸಿತಾಣದ 100 ಮಾರ್ಗದರ್ಶಿಗಳಿಗೆ ಇನ್ಫೋಸಿಸ್​ ಫೌಂಡೇಶನ್​ ಮುಖ್ಯಸ್ಥೆ ಸುಧಾಮೂರ್ತಿ‌ ಅವರು ತಲಾ 10 ಸಾವಿರ ರೂ. ನೆರವು ನೀಡಿದ್ದಾರೆ.

ಹೊಸಪೇಟೆ (ವಿಜಯನಗರ): ವಿಶ್ವವಿಖ್ಯಾತ ಹಂಪಿ ಪ್ರವಾಸಿತಾಣದ ಮಾರ್ಗದರ್ಶಿ(ಗೈಡ್)ಗಳು ಕೊರೊನಾ ಲಾಕ್​ಡೌನ್​ನಿಂದ ಸಂಕಷ್ಟಕ್ಕೆ ಒಳಗಾಗಿದ್ದಾರೆ. ಈ ಹಿನ್ನೆಲೆಯಲ್ಲಿ ಇನ್ಫೋಸಿಸ್​ ಫೌಂಡೇಶನ್​ ಮುಖ್ಯಸ್ಥೆ ಸುಧಾಮೂರ್ತಿ‌, 100 ಮಂದಿ ಗೈಡ್​ಗಳಿಗೆ ಧನಸಹಾಯ ಮಾಡಿದ್ದು, ತಲಾ 10 ಸಾವಿರ ರೂ. ನೆರವು ನೀಡಿದ್ದಾರೆ.

ಕಳೆದ ವರ್ಷವು ಸುಧಾಮೂರ್ತಿ ಅವರು ಗೈಡ್​ಗಳಿಗೆ ನೆರವು ನೀಡಿದ್ದರು. ಈ ವರ್ಷವು ಧನ ಸಹಾಯ ಮಾಡಲು ಮುಂದಾಗಿದ್ದಾರೆ. ಕಳೆದ ವರ್ಷದಲ್ಲಿ ಮಾರ್ಚ್ ತಿಂಗಳಿನ ಅಂತ್ಯದಲ್ಲಿ‌ ಲಾಕ್​ಡೌನ್ ಘೋಷಿಸಲಾಗಿತ್ತು. ಸತತ ಏಳು ತಿಂಗಳ ಕಾಲ ಪ್ರವಾಸಿಗರು ಹಂಪಿಯತ್ತ ಮುಖ ಮಾಡಿರಲಿಲ್ಲ.‌ ಡಿಸೆಂಬರ್ ಹಾಗೂ ಜನವರಿ ವೇಳೆ ಪ್ರವಾಸಿಗರು ಹಂಪಿಯ ಕಡೆ ಹಜ್ಜೆ ಹಾಕಿದ್ದರು. ಆದರೆ, ಈಗ ಮತ್ತೆ ಕೊರೊನಾದಿಂದ ಲಾಕ್​ಡೌನ್ ಘೋಷಣೆ ಮಾಡಲಾಗಿದ್ದು, ಗೈಡ್​ಗಳಿಗೆ ಬರಸಿಡಿಲು ಬಡದಂತಾಗಿದೆ.

ಸಂಕಷ್ಟದ ಕಾಲದಲ್ಲಿ ಸುಧಾಮೂರ್ತಿ ಅವರು ಮಾಡಿರುವ ಧನ ಸಹಾಯ ಮರೆಯುವಂತಿಲ್ಲ‌ ಎಂದು ಗೈಡ್​ಗಳು ಸಂತಸ ವ್ಯಕ್ತಪಡಿಸಿದರು.

ಹಂಪಿಯಲ್ಲಿ ಪ್ರವಾಸಿಗರಿಗೆ ಅರ್ಥವಾಗುವ ರೀತಿಯಲ್ಲಿ ಸುಲಿತವಾಗಿ‌‌ ಇತಿಹಾಸ ತಿಳಿಸುವಲ್ಲಿ ಗೈಡ್​ಗಳ‌ ಪಾತ್ರ ಮಹತ್ವದಾಗಿದೆ. ಆದರೆ, ಸರ್ಕಾರ ಇಂತಹ ಸಂಕಷ್ಟ ಸಮಯದಲ್ಲಿ ಮಾರ್ಗದರ್ಶಿಗಳನ್ನು ಪರಿಗಣಿಸುತ್ತಿಲ್ಲ. ಹೀಗಾಗಿ ಕೂಡಲೇ ಸರ್ಕಾರ ಗೈಡ್​ಗಳ ನೆರವಿಗೆ ಧಾವಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ಹಿರಿಯ ಮಾರ್ಗದರ್ಶಿ ಹನುಮನಸಿಂಗ್ ಮಾತನಾಡಿ, ಸುಧಾಮೂರ್ತಿ ಅವರ ಧನಸಹಾಯ ಬಳಷ್ಟು ಸಹಕಾರಿಯಾಗಿದೆ. ಅಲ್ಲದೇ, ಬದುಕು ಸಾಗಿಸಲು ಸಹಾಯವಾಗಿದೆ ಎಂದರು.

ಗೈಡ್ ಗೋಪಾಲ್ ಮಾತನಾಡಿ, ಸುಧಾಮೂರ್ತಿ ಅವರ ಸಹಾಯ ಎಂದು ಮರೆಯುವಂತಿಲ್ಲ. ಲಾಕ್​​​ಡೌನ್ ಸಂದರ್ಭದಲ್ಲಿ ಜೀವನ ನಡೆಸುವುದು ಕಷ್ಟಕರವಾಗಿದೆ. ಇತಂಹ ಸಂದಿಗ್ಧ ಪರಿಸ್ಥಿತಿಯಲ್ಲಿ ಧನ ಸಹಾಯ ಮಾರ್ಗದರ್ಶಿಗಳ‌ ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ ಎಂದು ಸಂತಸ ವ್ಯಕ್ತಪಡಿಸಿದರು.