ಒಡಿಶಾದಲ್ಲಿ ನಕ್ಸಲ್​ ಗುಂಪಿನ ಮೇಲೆ ದಾಳಿ.. ಓರ್ವ ಮಹಿಳಾ ಮಾವೋವಾದಿ ಗುಂಡೇಟಿಗೆ ಬಲಿ

ಒಡಿಶಾದಲ್ಲಿ ನಕ್ಸಲರ ಹಾವಳಿ ತಗ್ಗಿದೆ ಎಂಬ ಆಶಾಭಾವನೆ ನಡುವೆಯೇ ತಂಡವೊಂದು ಕಾಣಿಸಿಕೊಂಡಿದ್ದು, ಕೂಂಬಿಂಗ್​ ಕಾರ್ಯಾಚರಣೆಯ ವೇಳೆ ಮಹಿಳಾ ಮಾವೋವಾದಿ ಹತರಾದ ಘಟನೆ ಇಂದು ನಡೆದಿದೆ.

ಫುಲ್ಬಾನಿ(ಒಡಿಶಾ):ಇಲ್ಲಿನ ಸಿಂಧಿ ಅರಣ್ಯದಲ್ಲಿ ಮಂಗಳವಾರ ಭದ್ರತಾ ಪಡೆಗಳ ಎನ್‌ಕೌಂಟರ್‌ಗೆ ಮಹಿಳಾ ಮಾವೋವಾದಿಯೊಬ್ಬರು ಜೀವ ತೆತ್ತಿದ್ದಾರೆ. ಮಾವೋವಾದಿಗಳು ಈ ಪ್ರದೇಶದಲ್ಲಿ ಉಳಿದುಕೊಂಡಿದ್ದಾರೆ ಎಂಬ ಮಾಹಿತಿ ಮೇರೆಗೆ ಕೂಂಬಿಂಗ್​ ಕಾರ್ಯಾಚರಣೆ ನಡೆಸಿದಾಗ ಈ ಘಟನೆ ನಡೆದಿದೆ.

ಸಿಂಧಿ ಅರಣ್ಯ ಪ್ರದೇಶದಲ್ಲಿ ಮಾವೋವಾದಿಗಳ ಕ್ಯಾಂಪ್ ಹೂಡಿದ್ದಾರೆ ಎಂಬ ಸುಳಿವಿನ ಮೇರೆಗೆ ಎಸ್‌ಒಜಿ ಮತ್ತು ಡಿವಿಎಫ್ ಜವಾನರು ಕಂಧಮಾಲ್‌ನ ಬಲಿಗುಡಾ ಸಿಂಧಿ ಅರಣ್ಯದಲ್ಲಿ ಕೂಂಬಿಂಗ್ ಕಾರ್ಯಾಚರಣೆ ನಡೆಸಿದರು.

ಈ ವೇಳೆ ಎಸ್‌ಒಜಿ ಪಡೆ ಮತ್ತು ಮಾವೋವಾದಿಗಳ ಮಧ್ಯೆ ಗುಂಡಿನ ಚಕಮಕಿ ನಡೆದಿದೆ. ಚಕಮಕಿಯ ವೇಳೆ ಮಹಿಳಾ ನಕ್ಸಲ್​ ಪೊಲೀಸರ ಗುಂಡೇಟಿಗೆ ಬಲಿಯಾಗಿದ್ದಾರೆ. ಮಾವೋವಾದಿಗಳು ಅಲ್ಲಿಂದ ಕಾಲ್ಕಿತ್ತ ಬಳಿಕ ಎಸ್‌ಒಜಿ ಪಡೆ ಅರಣ್ಯ ಪ್ರದೇಶದಲ್ಲಿ ಶೋಧ ನಡೆಸಿದಾಗ ಬಂದೂಕು ಸಹಿತ ಮಹಿಳಾ ಮಾವೋವಾದಿಯ ಶವ ಪತ್ತೆಯಾಗಿದೆ. 20 ಕ್ಕೂ ಹೆಚ್ಚು ಮಾವೋವಾದಿಗಳು ಸ್ಥಳದಿಂದ ಪರಾರಿಯಾಗಿದ್ದಾರೆ ಎಂದು ತಿಳಿದು ಬಂದಿದೆ.

ಓದಿ:ಮಂಗಳೂರು: ಗುಂಡು ಹಾರಿಸಿಕೊಂಡು ಪಿಎಸ್ಐ ಆತ್ಮಹತ್ಯೆ ಯತ್ನ