ಹೈದರಾಬಾದ್:ಗಿನ್ನೆಸ್ ವಿಶ್ವ ದಾಖಲೆಯಿಂದ ಪ್ರಮಾಣೀಕರಿಸಲ್ಪಟ್ಟಿರುವ ವಿಶ್ವದ ಏಕೈಕ ಅತಿದೊಡ್ಡ ಚಲನಚಿತ್ರ ನಗರಿ ರಾಮೋಜಿ ಫಿಲಂ ಸಿಟಿ ಇದೀಗ ಮಹತ್ವದ ನಿರ್ಧಾರ ಕೈಗೊಂಡಿದೆ. ಪ್ರವಾಸೋದ್ಯಮಕ್ಕೆ ಉತ್ತೇಜನ ನೀಡುವ ಉದ್ದೇಶದಿಂದ ಭಾರತೀಯ ರೈಲ್ವೆ(IRCTC) ಹಾಗೂ ರಾಮೋಜಿ ಫಿಲಂ ಸಿಟಿ ನಡುವೆ ಒಪ್ಪಂದವಾಗಿದೆ.
ಭಾರತೀಯ ರೈಲ್ವೆ(IRCTC) ಮೂಲಕ ವಿಶ್ವದ ಅತಿದೊಡ್ಡ ಚಲನಚಿತ್ರ ನಗರಿ ರಾಮೋಜಿ ಫಿಲಂ(RFC) ಸಿಟಿಯ ಪ್ಯಾಕೇಜ್ಗಳ ಬಗ್ಗೆ ದೇಶಾದ್ಯಂತ ಪ್ರವಾಸೋದ್ಯಮ ಸಂಸ್ಥೆಗಳಿಗೆ ಮಾಹಿತಿ ನೀಡುವ ನಿರ್ಧಾರ ಕೈಗೊಳ್ಳಲಾಗಿದೆ. ರಾಮೋಜಿ ಫಿಲಂ ಸಿಟಿ ಎಂಡಿ ವಿಜಯೇಶ್ವರಿ ಹಾಗೂ ಐಆರ್ಸಿಟಿಸಿ ದಕ್ಷಿಣ ಮಧ್ಯ ವಲಯ ಜಿಎಂ ನರಸಿಂಗ್ ರಾವ್ ಒಪ್ಪಂದಕ್ಕೆ ಸಹಿ ಹಾಕಿದರು. ಈ ವೇಳೆ ಮಾತನಾಡಿರುವ ಎಂಡಿ ವಿಜಯೇಶ್ವರಿ, ಈ ಒಡಂಬಡಿಕೆ ಪ್ರವಾಸಿಗರನ್ನು ಇನ್ನಷ್ಟು ಬೇಗ ತಲುಪಲು ಸಹಾಯವಾಗುತ್ತದೆ ಎಂದರು.
ಜಿಎಂ ನರಸಿಂಗ್ ರಾವ್ ಮಾತನಾಡಿ, ರಾಮೋಜಿ ಫಿಲಂ ಸಿಟಿ ಮತ್ತು ಐಆರ್‌ಸಿಟಿಸಿಯೊಂದಿಗೆ ಪ್ರವಾಸೋದ್ಯಮ ಒಪ್ಪಂದಕ್ಕೆ ಸಹಿ ಹಾಕಿದ್ದೇವೆ. ಆರ್‌ಎಫ್‌ಸಿ ಹಾಗೂ ರೈಲ್ವೆ ಇಲಾಖೆಯಲ್ಲಿನ ಪ್ಯಾಕೇಜ್ಗಳ ಬಗ್ಗೆ ಎರಡೂ ವೆಬ್‌ಸೈಟ್‌ಗಳಿಂದ ಮಾಹಿತಿ ನೀಡಲಾಗುವುದು. ಇದು ಪ್ರವಾಸಿಗರಿಗೆ ತುಂಬಾ ಪ್ರಯೋಜನಕಾರಿಯಾಗಲಿದೆ. ಜೊತೆಗೆ ರಾಮೋಜಿ ಫಿಲಂ ಸಿಟಿಯೊಂದಿಗಿನ ಪಾಲುದಾರಿಕೆ ಗೌರವ ತಂದಿದೆ ಎಂದು ಹೇಳಿದರು.
ರಾಮೋಜಿ ಫಿಲಂ ಸಿಟಿ(RFC) 2 ಸಾವಿರ ಎಕರೆಗಳಷ್ಟು ವಿಸ್ತಾರವಾಗಿದ್ದು, ಸಿನಿ-ಮ್ಯಾಜಿಕ್ ಭೂಮಿ ಎಂದು ಕರೆಯಲ್ಪಡುತ್ತದೆ. ಲೈವ್ ಡ್ಯಾನ್ಸ್, ವೈಲ್ಡ್ ವೆಸ್ಟ್ ಸ್ಟಂಟ್ ಶೋ, ಬ್ಲ್ಯಾಕ್‌ಲೈಟ್ ಶೋ- ಅನಿಮೇಷನ್, ಸ್ಟ್ರೈಕಿಂಗ್ ಗಾರ್ಡನ್ಸ್, ಕ್ಯಾಸ್ಕೇಡಿಂಗ್ ಕಾರಂಜಿ ಇದೆ. ವಿಶ್ವದ ಅತಿದೊಡ್ಡ ಚಲನಚಿತ್ರ ನಗರವೆಂದು ಗಿನ್ನೆಸ್ ವಿಶ್ವ ದಾಖಲೆ ಬರೆದಿದ್ದು, ಮಿಲಿಯನ್ ಕನಸುಗಳ ತಾಣವಾಗಿ ಮಾರ್ಪಟ್ಟಿದೆ.