ಧನ್ಬಾದ್(ಜಾರ್ಖಂಡ್):ಕಾರ್ಮಿಕನ ಪತ್ನಿ ಕೋಮಲ್ ಪಟೇಲ್ ಆತ್ಮಹತ್ಯೆಗೆ ಶರಣಾಗಿದ್ದು, ಅದಕ್ಕೂ ಮೊದಲು ವಿಡಿಯೋವೊಂದನ್ನ ಮಾಡಿ ಸೋಶಿಯಲ್ ಮೀಡಿಯಾದಲ್ಲಿ ಹರಿಬಿಟ್ಟಿದ್ದಾಳೆ.
ಜಿಲ್ಲೆಯ ಧನ್ಸಾರ್ ಪೊಲೀಸ್ ಠಾಣಾ ವ್ಯಾಪ್ತಿಯ ಮಹಾವೀರ್ ನಗರ ಭೂಡಾದಲ್ಲಿ ರೈಲ್ವೆ ಕೆಲಸಗಾರನಾಗಿದ್ದ ಅಲೋಕ್ ಕುಮಾರ್ ಪ್ರಸಾದ್ ಪತ್ನಿ 21 ವರ್ಷದ ಕೋಮಲ್ ಪಟೇಲ್ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ. ಇದಕ್ಕೂ ಮುನ್ನ ಮಹಿಳೆಯು ವಿಡಿಯೋ ತುಣುಕನ್ನು ಹರಿಬಿಟ್ಟಿದ್ದು, ಯಾವ ಕಾರಣಕ್ಕಾಗಿ ಈ ನಿರ್ಧಾರ ಕೈಗೊಳ್ಳುತ್ತಿದ್ದಾರೆ ಎಂಬುದನ್ನ ಬಹಿರಂಗಪಡಿಸಿದ್ದಾಳೆ.
ಕಳೆದ ಎರಡು ವರ್ಷಗಳ ಹಿಂದೆ ಅಲೋಕ್ ಕುಮಾರ್ನೊಂದಿಗೆ ಕೋಮಲ್ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಳು. ಇದಾದ ಬಳಿಕ ಗಂಡನ ಮನೆಯವರು ಮೇಲಿಂದ ಮೇಲೆ ವರದಕ್ಷಿಣೆ ಕಿರುಕುಳ ನೀಡಲು ಶುರು ಮಾಡಿದ್ದಾರೆ. ಹೀಗಾಗಿ ವಾಪಸ್ ತಂದೆ ಮನೆಗೆ ತೆರಳಿ ಅಲ್ಲೇ ಉಳಿದುಕೊಂಡಿದ್ದಳು. ಇದಾದ ಬಳಿಕ ತಂದೆ ಮಾತು ಕೇಳದೇ ಮತ್ತೊಮ್ಮೆ ಗಂಡನ ಮನೆಗೆ ತೆರಳಿದ್ದ ಆಕೆಯ ಮೇಲೆ ಗಂಡನ ಮನೆಯವರು ಅದೇ ರೀತಿ ಕಿರುಕುಳ ನೀಡಲು ಶುರು ಮಾಡಿದ್ದಾರೆ.