ಮುಂಬೈ: ಶಿವಸೇನಾ ಅಧ್ಯಕ್ಷ ಮತ್ತು ಮಹಾರಾಷ್ಟ್ರ ಮುಖ್ಯಮಂತ್ರಿ ಉದ್ಧವ್ ಠಾಕ್ರೆ ಪಕ್ಷದ ಕಾರ್ಯಕರ್ತರನ್ನು ಭೇಟಿಯಾಗಿ ಇಂದು ಮಾತುಕತೆ ನಡೆಸಿದರು. ರಾಜಕೀಯ ಸಂಘಟನೆ ಮತ್ತು ಸರ್ಕಾರದ ಉಳಿವಿನ ಸುತ್ತಲೂ ಏರ್ಪಟ್ಟಿರುವ ಕಾರ್ಯಕರ್ತರ ಆತಂಕ ನಿವಾರಿಸಲು ಅವರು ಪ್ರಯತ್ನಿಸಿದರು.
ಸಿಎಂ ಅಧಿಕೃತ ನಿವಾಸ ಖಾಲಿ ಮಾಡಿರಬಹುದು, ದೃಢಸಂಕಲ್ಪ ಅಚಲ: ಉದ್ಧವ್ ಠಾಕ್ರೆ - ಸಿಎಂ ಅಧಿಕೃತ ನಿವಾಸವನ್ನು ಖಾಲಿ ಮಾಡಿರಬಹುದು ದೃಢಸಂಕಲ್ಪ ಅಚಲವಾಗಿದೆ ಎಂದ ಮಹಾರಾಷ್ಟ್ರ ಸಿಎಂ
ಸೆಂಟ್ರಲ್ ಮುಂಬೈನ ದಾದರ್‌ನಲ್ಲಿರುವ ಶಿವಸೇನಾ ಭವನದಲ್ಲಿ ಸಮಾವೇಶಗೊಂಡ ಪಕ್ಷದ ಜಿಲ್ಲಾ ಘಟಕದ ಮುಖ್ಯಸ್ಥರು ಮತ್ತು ಕಾರ್ಯಕರ್ತರನ್ನು ಉದ್ದೇಶಿಸಿ ಮಹಾರಾಷ್ಟ್ರ ಸಿಎಂ ಉದ್ಧವ್ ಠಾಕ್ರೆ ಮಾತನಾಡಿದರು.
ಮಹಾರಾಷ್ಟ್ರ ರಾಜಕೀಯದಲ್ಲಿ ಏಳು ಬೀಳು
"ಮುಖ್ಯಮಂತ್ರಿಯವರ ಅಧಿಕೃತ ನಿವಾಸವನ್ನು ನಾನು ಖಾಲಿ ಮಾಡಿರಬಹುದು. ಆದರೆ, ದೃಢಸಂಕಲ್ಪ ಅಚಲವಾಗಿದೆ" ಎಂದು ಹೇಳುವ ಮೂಲಕ ಹೋರಾಟ ಮುಂದುವರೆಸುವ ಸುಳಿವು ಕೊಟ್ಟರು. "ಪಕ್ಷವು ಈ ಹಿಂದೆ ಎದುರಿಸಿದ ಬಂಡಾಯಗಳ ನಡುವೆಯೂ ಎರಡು ಬಾರಿ ಅಧಿಕಾರಕ್ಕೆ ಬಂದಿದೆ. ಕಳೆದ ಎರಡೂವರೆ ವರ್ಷಗಳಲ್ಲಿ ಕೊರೊನಾ ಜೊತೆ ಹೋರಾಟ ನಡೆಯಿತು. ಆದರೆ ವಿರೋಧಿಗಳು ಈ ಪರಿಸ್ಥಿತಿಯ ಲಾಭ ಪಡೆದರು" ಎಂದು ಠಾಕ್ರೆ ದೂರಿದರು.
ತಮ್ಮದೇ ಪಕ್ಷದ ಮುಖಂಡ ಏಕನಾಥ್ ಶಿಂದೆ ಸರ್ಕಾರದಿಂದ ಬೇರ್ಪಟ್ಟು ಹಲವು ಶಾಸಕರ ಬೆಂಬಲದೊಂದಿಗೆ ಬಂಡಾಯದ ಗುಂಪು ರಚಿಸಿದ್ದು ಈ ಎಲ್ಲ ಬೆಳವಣಿಗೆಗೆ ಕಾರಣವಾಗಿದೆ. ಶಿಂದೆ ಪ್ರಸ್ತುತ ಅಸ್ಸೋಂ ಗುವಾಹಟಿಯಲ್ಲಿ ಕನಿಷ್ಠ 38 ಬಂಡಾಯ ಮತ್ತು 10 ಸ್ವತಂತ್ರ ಶಾಸಕರೊಂದಿಗೆ ಮೊಕ್ಕಾಂ ಹೂಡಿದ್ದಾರೆ. ತನ್ನ ನೇತೃತ್ವದ ಬಣವೇ ನಿಜವಾದ ಶಿವಸೇನೆ ಎಂದು ಅವರು ಘೋಷಿಸಿದ್ದಾರೆ.
Last Updated : Jun 24, 2022, 5:18 PM IST