ಯುಪಿಎಸ್​ಸಿ ಪ್ರಿಲಿಮ್ಸ್​ ಪರೀಕ್ಷೆಗೆ ತಯಾರಿ ಹೇಗೆ? ಅಭ್ಯರ್ಥಿಗಳು ಈ ಯಡವಟ್ಟು ಮಾಡದಿರಿ

UPSC ಪ್ರತಿ ವರ್ಷ ನಡೆಸುವ ನಾಗರಿಕ ಸೇವಾ ಪರೀಕ್ಷಾ ಪ್ರಕ್ರಿಯೆಯಲ್ಲಿ ಪ್ರಿಲಿಮಿನರಿ ಬಹಳ ಮುಖ್ಯ. ಇದರಲ್ಲಿ ಅರ್ಹತೆ ಪಡೆದರೆ ಮಾತ್ರ ಮುಂದಿನ ಹಂತಕ್ಕೆ ಪ್ರವೇಶ. ಅಂದರೆ ಮೇನ್ಸ್​ ಪರೀಕ್ಷೆ ಬರೆಯಬಹುದು. ಈ ವರ್ಷ ಮೇ 28 ರಂದು ಪೂರ್ವಭಾವಿ ಪರೀಕ್ಷೆ ನಡೆಯಲಿದೆ.

ಬಹುತೇಕ ಅಭ್ಯರ್ಥಿಗಳು ಸಿವಿಲ್ ಸರ್ವಿಸ್ ಪರೀಕ್ಷೆಯ ಮೊದಲ ಹಂತ ಪ್ರಿಲಿಮ್ಸ್‌ಗೆ ಅರ್ಹತೆ ಪಡೆಯಲು ಹರಸಾಹಸ ಪಡುತ್ತಿರುತ್ತಾರೆ. ತಯಾರಿ ಹೇಗಿರಬೇಕು, ಪ್ರಶ್ನೆಗಳ ಸ್ವರೂಪ ಹೇಗಿರುತ್ತವೆ ಎಂಬ ಬಗ್ಗೆ ಅವರಿಗೆ ಸರಿಯಾದ ತಿಳುವಳಿಕೆ ಇರುವುದಿಲ್ಲ. ಪ್ರಶ್ನೆ ಪತ್ರಿಕೆ ವಸ್ತುನಿಷ್ಠ ಮಾದರಿಯಲ್ಲಿದ್ದು, ಪ್ರಿಲಿಮ್ಸ್ ತೇರ್ಗಡೆ ಸುಲಭ ಎಂಬ ತಪ್ಪು ಕಲ್ಪನೆ ಮತ್ತು ಅತಿಯಾದ ಆತ್ಮವಿಶ್ವಾಸ ಕೆಲವರಿಗಿದೆ. ಹಾಗಾಗಿ, ಪೂರ್ವಭಾವಿ ಪರೀಕ್ಷೆಯ ಮಾದರಿಯನ್ನು ಸರಿಯಾಗಿ ಅರ್ಥೈಸಿಕೊಳ್ಳುವುದು ಪರೀಕ್ಷೆಯ ಮೊದಲ ಹಂತವಾಗಿರಲಿ. ನಾಗರಿಕ ಸೇವಾ ಪರೀಕ್ಷೆಯ ಉದ್ದೇಶಗಳನ್ನು ಗಮನದಲ್ಲಿಟ್ಟುಕೊಂಡು ಪ್ರಶ್ನಾವಳಿ ರೂಪಿಸಲಾಗುತ್ತದೆ. ಹಾಗಾಗಿ, ಮೊದಲು ಪರೀಕ್ಷೆಯ ಉದ್ದೇಶಗಳನ್ನು ತಿಳಿದುಕೊಳ್ಳೋಣ.

* ಜ್ಞಾನ ಮತ್ತು ಕೌಶಲ್ಯ ಪಡೆಯಲು ನಿರಂತರವಾಗಿ ಶ್ರಮಿಸುತ್ತಿರುವ ಅಭ್ಯರ್ಥಿಗಳನ್ನು ಆಯ್ಕೆ ಮಾಡುವುದು.

* ನಾಗರಿಕ ಸೇವೆಗಳಿಗೆ ಭಾವನಾತ್ಮಕವಾಗಿ ಅಂಟಿಕೊಂಡಿರುವವರನ್ನು ಗುರುತಿಸುವುದು.

* ಅಭ್ಯರ್ಥಿಗಳು ಸಾರ್ವಜನಿಕ ಸೇವೆಗೆ ಅಗತ್ಯವಿರುವ ಮೂಲಭೂತ ವಿಶ್ಲೇಷಣಾತ್ಮಕ ಸಾಮರ್ಥ್ಯ ಹೊಂದಿದ್ದಾರೆಯೇ ಎಂಬುದನ್ನು ತಿಳಿಯುವುದು.

* ಮೇಲಿನ ಎಲ್ಲಾ ಉದ್ದೇಶಗಳನ್ನು ಗಮನದಲ್ಲಿಟ್ಟುಕೊಂಡು ಅಭ್ಯರ್ಥಿಗಳ ಸಂಖ್ಯೆಯನ್ನು ಕಡಿಮೆ ಮಾಡುವುದು.

ಪತ್ರಿಕೆ-1 ಮತ್ತು ಪತ್ರಿಕೆ-2ರಲ್ಲಿ(ಪ್ರಿಲಿಮ್ಸ್) ಅಭ್ಯರ್ಥಿಗಳ ಪ್ರತಿಭೆ ಪರೀಕ್ಷಿಸುವ ಮೂಲಕ ಈ ಉದ್ದೇಶಗಳನ್ನು ಸಾಧಿಸಲಾಗುತ್ತದೆ.

ಪ್ರಶ್ನೆಗಳ ವಿನ್ಯಾಸದ ಹಿಂದೆ..: ಅಭ್ಯರ್ಥಿಯ ಮೂಲಭೂತ ಜ್ಞಾನವನ್ನು ಪರೀಕ್ಷಿಸಲು ಪ್ರಸ್ತುತ ವ್ಯವಹಾರಗಳ ಪ್ರಶ್ನೆಗಳನ್ನೇ ಹೆಚ್ಚಾಗಿ ಕೇಳಲಾಗುತ್ತದೆ. ಇವುಗಳ ಮೂಲಕ ಅಭ್ಯರ್ಥಿಯಲ್ಲಿರುವ ಪ್ರಚಲಿತ ವಿದ್ಯಮಾನಗಳ ಸಾಮಾನ್ಯ ತಿಳುವಳಿಕೆಯನ್ನು ಅಳೆಯಲಾಗುತ್ತದೆ.

* ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ವಿಷಯಗಳಲ್ಲಿ ಅಭ್ಯರ್ಥಿಯ ಆಸಕ್ತಿಯನ್ನು ಪರೀಕ್ಷಿಸಲಾಗುತ್ತದೆ. ಜನರು ಎದುರಿಸುತ್ತಿರುವ ಸಮಸ್ಯೆಗಳಿಗೆ ಸ್ಪಂದನೆ, ಪರಿಹಾರಕ್ಕೆ ಸರ್ಕಾರ ಕೈಗೊಂಡಿರುವ ಕ್ರಮಗಳನ್ನು ಮಾಹಿತಿ ಇರಬೇಕು.

* ರಾಷ್ಟ್ರೀಯ, ಅಂತಾರಾಷ್ಟ್ರೀಯ ಪ್ರಾಮುಖ್ಯತೆಯ ಕಾರ್ಯಕ್ರಮಗಳು, ಅವು ಸಾಮಾನ್ಯ ಜನರ ಮೇಲೆ ಬೀರುವ ಪ್ರಭಾವದ ಬಗ್ಗೆ ಪ್ರಶ್ನೆಗಳಿರುತ್ತವೆ.

* ಭವಿಷ್ಯದ ಕಾರ್ಯಕ್ರಮಗಳ ಕುರಿತು ಸರ್ಕಾರದ ನಿಲುವು ಮತ್ತು ಅವುಗಳನ್ನು ಸಾಧಿಸಲು ಮಾಡುತ್ತಿರುವ ಪ್ರಯತ್ನಗಳ ಬಗ್ಗೆ ಅಭ್ಯರ್ಥಿಯ ತಿಳುವಳಿಕೆಯನ್ನು ಒರೆಗೆ ಹಚ್ಚುವ ಪ್ರಶ್ನೆಗಳಿರುತ್ತವೆ.

* ಪ್ರಶ್ನೆಗಳು ಕನಿಷ್ಠ ತಾರ್ಕಿಕ ಜ್ಞಾನ ಮತ್ತು ವಿಶ್ಲೇಷಣಾತ್ಮಕ ಸಾಮರ್ಥ್ಯವನ್ನು ಪರೀಕ್ಷಿಸುತ್ತವೆ. ಏಕೆಂದರೆ ಈ ಕೌಶಲಗಳು ಅಭ್ಯರ್ಥಿಯ ಭವಿಷ್ಯದ ಕಾರ್ಯಕ್ಷಮತೆಯ ಮೇಲೆ ಪರಿಣಾಮ ಬೀರುತ್ತವೆ.

ಪೂರ್ವಭಾವಿ ಪರೀಕ್ಷೆಗೆ ತಯಾರಿ ಹೇಗೆ?: ಪೂರ್ವಭಾವಿ ಪರೀಕ್ಷೆಯಲ್ಲಿ ಎರಡು ಪತ್ರಿಕೆಗಳಿರುತ್ತವೆ. ಜನರಲ್ ಸ್ಟಡೀಸ್ ಪೇಪರ್-1, ಜನರಲ್ ಸ್ಟಡೀಸ್ ಪೇಪರ್-2. ಪ್ರತಿ ಪತ್ರಿಕೆಗೆ 200 ಅಂಕಗಳು. ಪತ್ರಿಕೆ-1 100 ಪ್ರಶ್ನೆಗಳನ್ನು ಹೊಂದಿರುತ್ತದೆ. ಪ್ರತಿ ಸರಿಯಾದ ಉತ್ತರಕ್ಕೆ 2 ಅಂಕ. ಪತ್ರಿಕೆ-2 80 ಪ್ರಶ್ನೆಗಳನ್ನು ಒಳಗೊಂಡಿರುತ್ತದೆ. ಪ್ರತಿ ಸರಿಯಾದ ಉತ್ತರಕ್ಕೆ 2 1/2 ಅಂಕಗಳು. ನಕಾರಾತ್ಮಕ ಅಂಕಗಳೂ ಇವೆ. ಪ್ರತಿ ತಪ್ಪು ಉತ್ತರಕ್ಕೆ ಶೇ 0.33 ಅಂಕಗಳನ್ನು ಕಡಿತಗೊಳಿಸಲಾಗುತ್ತದೆ.

ಅಭ್ಯರ್ಥಿಯು ಪ್ರಶ್ನೆ ಪತ್ರಿಕೆ-2ರಲ್ಲಿ ಶೇ.33 ಅಂಕಗಳನ್ನು ತೆಗೆದುಕೊಂಡರೆ ಸಾಕು. ಅಂದರೆ, 200 ಅಂಕಗಳಲ್ಲಿ ಕನಿಷ್ಠ 67 ಅಂಕ ಗಳಿಸಬೇಕು. ಈ ಅಂಕಗಳನ್ನು ಸಾಧಿಸಲು ವಿಫಲವಾದರೆ ಪತ್ರಿಕೆ​ ತಿರಸ್ಕಾರವಾಗುತ್ತದೆ. ಪೇಪರ್-2 ಮತ್ತು ಪೇಪರ್-1ರಲ್ಲಿ Cut off ಅಂಕಗಳಿಗಿಂತ ಹೆಚ್ಚು ಅಂಕ ಗಳಿಸಿದವರಿಗೆ ಮುಂದಿನ ಹಂತಕ್ಕೆ ಆದ್ಯತೆ. ಇದರಲ್ಲಿ ಪಡೆದ ಅತ್ಯಧಿಕ ಅಂಕಗಳ ಆಧಾರದಡಿ ಮೀಸಲಾತಿ ನೀತಿ ಅನ್ವಯ ಯುಪಿಎಸ್‌ಸಿ ಮೆರಿಟ್ ಪಟ್ಟಿ ಸಿದ್ಧಪಡಿಸುತ್ತದೆ.

ಪೂರ್ವಭಾವಿ ಪರೀಕ್ಷೆ: ಅಭ್ಯರ್ಥಿಗೆ ಗೊತ್ತಿರಬೇಕಾದ ವಿಚಾರಗಳು-

* ಪ್ರಶ್ನೆ ಪತ್ರಿಕೆ-2ರಲ್ಲಿ ಕನಿಷ್ಠ ಅಂಕಗಳನ್ನು ಪಡೆದಿರಬೇಕು. ಪ್ರಶ್ನೆ ಪತ್ರಿಕೆ-1ರಲ್ಲಿ ಪಡೆದ ಅಂಕಗಳನ್ನು ಮಾತ್ರ ಆಯ್ಕೆಗೆ ಪರಿಗಣಿಸಲಾಗುತ್ತದೆ.

* ಪೇಪರ್-1 ರಲ್ಲಿ ನೀಡಿರುವ 100 ಪ್ರಶ್ನೆಗಳಲ್ಲಿ 40ಕ್ಕೆ ಸರಿ ಉತ್ತರಗಳನ್ನು ನೀಡಬೇಕು.

* ಇನ್ನೂ 15 ಪ್ರಶ್ನೆಗಳಿಗೆ ಸರಿಯಾಗಿ ಉತ್ತರ ಬರೆಯಬೇಕು.

* ಉತ್ತರಗಳ ಬಗ್ಗೆ ಅಂದಾಜು ಮಾಡಬಾರದು.

* ಒತ್ತಡದಲ್ಲಿ ಗೊತ್ತಿಲ್ಲದ ಪ್ರಶ್ನೆಗಳಿಗೆ ಉತ್ತರ ಬರೆಯಬೇಡಿ.

ಅಭ್ಯರ್ಥಿಯು ತನ್ನ ಸರಿಯಾದ ಸಿದ್ದತೆಯನ್ನು ಪಠ್ಯಕ್ರಮದ ಮೂಲಭೂತ ಅಂಶಗಳಿಂದಲೇ ಪ್ರಾರಂಭಿಸುವುದು ಅತ್ಯಗತ್ಯ. ಪಠ್ಯಕ್ರಮವನ್ನು ಕೂಲಂಕಷವಾಗಿ ಪರಿಶೀಲಿಸಬೇಕು. ಪ್ರಶ್ನೆ ಪತ್ರಿಕೆಯಲ್ಲಿ ಬರುವ ಪ್ರವೃತ್ತಿಯನ್ನು ಅರ್ಥಮಾಡಿಕೊಳ್ಳಬೇಕು.

ಪರೀಕ್ಷೆಗೆ ತಯಾರಿ ಹೇಗೆ?: ಮೊದಲ ಬಾರಿಗೆ ಪರೀಕ್ಷೆಗೆ ಹಾಜರಾಗುವವರಿಗೆ ಪಠ್ಯಕ್ರಮದ ವಿಷಯಗಳು ಹೊಸದಾಗಿ ಕಾಣಿಸಬಹುದು. 10ನೇ ತರಗತಿಯ ನಂತರ ವಿದ್ಯಾರ್ಥಿಗಳು ವಿಜ್ಞಾನ, ವಾಣಿಜ್ಯ, ಕಲೆ ವಿಷಯಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ಇವೆಲ್ಲವೂ ಹೊಸ ವಿಷಯಗಳಾಗಿರುವುದರಿಂದ ಮೂಲಭೂತ ಅಂಶಗಳನ್ನು ಕರಗತ ಮಾಡಿಕೊಳ್ಳುವುದು ಅವಶ್ಯಕ. ನಂತರ ಹಿಂದಿನ ಪ್ರಶ್ನೆಗಳನ್ನು ಅರ್ಥೈಸಿಕೊಳ್ಳಬೇಕು.

* ಪ್ರತಿ ವರ್ಷ ಪ್ರಶ್ನೆಗಳ ಮಾದರಿ ಬದಲಾಗುತ್ತದೆ. ಆದ್ದರಿಂದ ಪ್ರಶ್ನೆ ವಿನ್ಯಾಸದ ಬಗ್ಗೆ ಅರಿವು ಹೆಚ್ಚಿಸಿಕೊಳ್ಳಬೇಕು. ಪ್ರತಿ ವಿಭಾಗದಲ್ಲಿ ಪ್ರಸ್ತುತ ವಿದ್ಯಮಾನಗಳ ಮೇಲೆ ಗಮನ ಕೇಂದ್ರೀಕರಿಸಬೇಕು.

* ಅಧ್ಯಯನ ಯೋಜನೆಯನ್ನು ಕಟ್ಟುನಿಟ್ಟಾಗಿ ಅನುಸರಿಸಬೇಕು. ಪರೀಕ್ಷಾ ಸಿದ್ಧತೆ ನಡೆಸುವಾಗ ಅಗತ್ಯ ಬದಲಾವಣೆ ಮತ್ತು ಸೇರ್ಪಡೆಗಳನ್ನು ಮಾಡಬೇಕು.

* ಎರಡನೇ ಹಂತದಲ್ಲಿ ಒಂದು ವಿಭಾಗದ ಅಧ್ಯಯನವನ್ನು ಪೂರ್ಣಗೊಳಿಸಬೇಕು. ಉದಾಹರಣೆಗೆ ಭಾರತೀಯ ರಾಜಕೀಯ. ಇದರ ಬಗ್ಗೆ ನೀವೇ ಪರೀಕ್ಷೆ ಕೈಗೊಳ್ಳಿ. ಇದರಲ್ಲಿ ನೀವು ಎಷ್ಟು ಅಂಕಗಳನ್ನು ಗಳಿಸಿದ್ದೀರಿ ಎಂದು ಅಂದಾಜಿಸಿಕೊಳ್ಳಿ. ಶೇ 75ರಷ್ಟು ಅಂಕ ಪಡೆದರೆ ಆತಂಕ ಪಡುವ ಅಗತ್ಯವಿಲ್ಲ. ಸ್ವಲ್ಪ ಸಮಯದ ನಂತರ ನೀವು ಅದೇ ವಿಭಾಗದಲ್ಲಿ ಮತ್ತೊಮ್ಮೆ ಪರೀಕ್ಷೆ ತೆಗೆದುಕೊಳ್ಳಬೇಕು ಮತ್ತು ಅಂಕಗಳನ್ನು ಪರಿಶೀಲಿಸಬೇಕು. ಮತ್ತೆ ಶೇ.75 ಬಂದರೆ, ಇನ್ನೊಂದು ವಿಷಯಕ್ಕೆ ಹೋಗಬಹುದು. ನಿಮ್ಮನ್ನು ನೀವು ಮರು ಮೌಲ್ಯಮಾಪನ ಮಾಡಿಕೊಳ್ಳಬೇಕು.

* ಈ ಪ್ರಕ್ರಿಯೆ ಮುಗಿದ ನಂತರ ಗ್ರ್ಯಾಂಡ್ ಟೆಸ್ಟ್ ಬರೆಯಬೇಕು. ಇವುಗಳಲ್ಲಿ ಋಣಾತ್ಮಕ ಅಂಕಗಳನ್ನು ಕಳೆದ ನಂತರ ಕನಿಷ್ಠ ಶೇ.65 ಅಂಕ ಗಳಿಸಬೇಕು.

* ಮೊದಲ ಬಾರಿಗೆ ಪರೀಕ್ಷೆಗೆ ಹಾಜರಾಗುವ ಅಭ್ಯರ್ಥಿಗಳು ಶೇ 65ರಷ್ಟು ಅಂಕಗಳು ತುಂಬಾ ಕಡಿಮೆ ಎಂದು ಭಾವಿಸಬಹುದು. ಆದರೆ ನೀವು ಇವುಗಳನ್ನು ಸತತವಾಗಿ ಸಾಧಿಸಿದರೆ ಯಶಸ್ಸಿನ ಹಾದಿಯಲ್ಲಿದ್ದೀರಿ ಎಂದೇ ಅರ್ಥ.

* ಈ ಯೋಜನೆ ಅನುಸರಿಸಿದರೆ, ಆತ್ಮವಿಶ್ವಾಸದಿಂದ ಪರೀಕ್ಷೆ ಬರೆದು ಪತ್ರಿಕೆ-1ರಲ್ಲಿ ಉತ್ತಮ ಅಂಕ ಗಳಿಸಲು ಸಾಧ್ಯವಿದೆ.

ಪೇಪರ್-2:ಜನರಲ್ ಸ್ಟಡೀಸ್ ಪೇಪರ್-2 ಅನ್ನು CSAT ಎಂದು ಕರೆಯುತ್ತಾರೆ. ಈ ಪತ್ರಿಕೆಯು ಈ ಕೆಳಗಿನ ಪಠ್ಯಕ್ರಮದಿಂದ 80 ಪ್ರಶ್ನೆಗಳನ್ನು ಹೊಂದಿರುತ್ತದೆ.

ಪತ್ರಿಕೆ-2 (200 ಅಂಕಗಳು) ಸಮಯ: 2 ಗಂಟೆ

1. ಗ್ರಹಿಕೆ

2. ಪರಸ್ಪರ ಕೌಶಲ್ಯಗಳು, ಸಂವಹನ ಕೌಶಲ್ಯಗಳು

3. ತರ್ಕ, ವಿಶ್ಲೇಷಣೆ ಸಾಮರ್ಥ್ಯ

4. ನಿರ್ಧಾರ ತೆಗೆದುಕೊಳ್ಳುವುದು, ಸಮಸ್ಯೆ ಪರಿಹಾರ

5. ಸಾಮಾನ್ಯ ಮಾನಸಿಕ ಸಾಮರ್ಥ್ಯ

6. ಮೂಲ ಸಂಖ್ಯಾಶಾಸ್ತ್ರ (ಸಂಖ್ಯೆಗಳು ಮತ್ತು ಅವುಗಳ ಸಂಬಂಧಗಳು, ಪರಿಮಾಣದ ಆದೇಶಗಳು. 10ನೇ ತರಗತಿ ಮಟ್ಟ)

7. ದತ್ತಾಂಶಗಳ ವ್ಯಾಖ್ಯಾನ (ಚಾರ್ಟ್‌, ಗ್ರಾಫ್‌, ಟೇಬಲ್‌, ದತ್ತಾಂಶ ಸಮರ್ಪಕತೆ ಇತ್ಯಾದಿ. ಗ್ರೇಡ್ ಮಟ್ಟ)

ಕಳೆದ ಕೆಲವು ವರ್ಷಗಳಿಂದ ಪರಸ್ಪರ ಕೌಶಲ್ಯ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಪ್ರಶ್ನೆಗಳನ್ನು ನೀಡಲಾಗಿಲ್ಲ. ಒಂದಕ್ಕಿಂತ ಹೆಚ್ಚು ಸರಿ ಉತ್ತರಗಳನ್ನು ಹೊಂದಿರುವ ಕಾರಣ UPSC ಇವುಗಳಿಂದ ಪ್ರಶ್ನೆಗಳನ್ನು ಕೇಳುವುದಿಲ್ಲ. ಈಗಲೂ ಅದೇ ವಿಧಾನ ಅನುಸರಿಸಲು ಸಾಧ್ಯವಿದೆ.

* ಪೇಪರ್-2 ಅನ್ನು ನಿರ್ಲಕ್ಷಿಸಬಾರದು. ಹಾಗೆಯೇ ಲಘುವಾಗಿಯೂ ತೆಗೆದುಕೊಳ್ಳಬಾರದು. ಏಕೆಂದರೆ ಈ ಪತ್ರಿಕೆ ನಿಮ್ಮ ಅರ್ಹತೆಯನ್ನು ಸೂಚಿಸುತ್ತದೆ. ಪತ್ರಿಕೆಯನ್ನು ಸರಿಯಾಗಿ ಬರೆಯದ ಕಾರಣ ಅನೇಕ ಜನರು ಅನುತ್ತೀರ್ಣಗೊಂಡಿದ್ದಾರೆ.

* ನೀವು ಗಣಿತ ವಿಷಯದಲ್ಲಿ ದುರ್ಬಲವಾಗಿದ್ದರೆ ಈ ಪತ್ರಿಕೆಯತ್ತ ಹೆಚ್ಚು ಗಮನಹರಿಸಬೇಕು. ಶಾರ್ಟ್‌ಕಟ್ ವಿಧಾನಗಳ ಮೂಲಭೂತ ಅಂಶಗಳನ್ನು ತಿಳಿಯಿರಿ.

* ಪೇಪರ್-1ಕ್ಕಿಂತ ಮೊದಲು ಪೇಪರ್-2 ತಯಾರಿ ಆರಂಭಿಸಿ. ಈ ಪತ್ರಿಕೆಯನ್ನು ಬರೆಯಲು ಬೇಕಾದ ಕೌಶಲಗಳನ್ನು ರಾತ್ರೋರಾತ್ರಿ ಪಡೆಯಲು ಸಾಧ್ಯವಿಲ್ಲ.

ಪತ್ರಿಕೆ-1 ಪಠ್ಯಕ್ರಮ: ಯಾವ ವಿಷಯದಲ್ಲಿ ಎಷ್ಟು ಪ್ರಶ್ನೆಗಳು?

ಸಿವಿಲ್ಸ್ ಪ್ರಿಲಿಮ್ಸ್ ಪಠ್ಯಕ್ರಮ ತುಂಬಾ ಸಾಮಾನ್ಯವಾಗಿದೆ. ಇಲ್ಲಿ ಯಾವ ವಿಷಯಗಳು ಬರುತ್ತವೆ ಎಂಬುದನ್ನು ಅರ್ಥಮಾಡಿಕೊಳ್ಳಬೇಕು. ಇದಕ್ಕಾಗಿ ಕಳೆದ ಕೆಲವು ವರ್ಷಗಳಲ್ಲಿ ಕೇಳಿದ ಪ್ರಶ್ನೆಗಳನ್ನು ವಿಶ್ಲೇಷಿಸಬೇಕು. ಪ್ರಚಲಿತ ವಿದ್ಯಮಾನಗಳ ಪ್ರಶ್ನೆಗಳನ್ನು ಕೆಲವೊಮ್ಮೆ ನೇರವಾಗಿ ಕೇಳಲಾಗುತ್ತದೆ. ಇನ್ನು ಕೆಲವು ಬಾರಿ ಪ್ರಶ್ನೆಗಳು ಪರೋಕ್ಷವಾಗಿರುತ್ತವೆ. ಪರೀಕ್ಷೆಯಲ್ಲಿ ಈ ವಿಭಾಗಕ್ಕೆ ಹೆಚ್ಚಿನ ಆದ್ಯತೆ ಇದೆ.

ಇದನ್ನೂ ಓದಿ:ಐಎಎಸ್ ಪರೀಕ್ಷೆ: ಕನ್ನಡದಲ್ಲೂ ಬರೆಯಬಹುದು, ಪಾಸಾಗಬಹುದು: ಅಪೂರ್ವ ಬಾಸೂರು