ಹಳಿತಪ್ಪಿ ನದಿಗುರುಳಿದ ಗೂಡ್ಸ್​ ರೈಲು: ಅಪಾರ ಪ್ರಮಾಣದ ಗೋಧಿ ನೀರುಪಾಲು

ಹಳಿ ತಪ್ಪಿ ನದಿಗೆ ಉರುಳಿಬಿದ್ದಿರುವ ಪರಿಣಾಮ ಬೋಗಿಗಳಲ್ಲಿದ್ದ ಗೋಧಿ ನದಿ ಪಾಲಾಗಿದೆ. ಅದೃಷ್ಟವಶಾತ್​ ರೈಲು ಇಂಜಿನ್​ ಹಳಿ ಮೇಲಿದ್ದ ಕಾರಣ ಚಾಲಕ ಹಾಗೂ ಇನ್ನಿತರೆ ಸಿಬ್ಬಂದಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ಭುವನೇಶ್ವರ(ಒಡಿಶಾ):ಹಳಿ ತಪ್ಪಿದ ಗೂಡ್ಸ್​ ರೈಲು ನದಿಗೆ ಉರುಳಿಬಿದ್ದಿರುವ ಘಟನೆ ಒಡಿಶಾದಲ್ಲಿ ನಡೆದಿದೆ. ಒಂಬತ್ತು ಬೋಗಿಗಳಿದ್ದ ರೈಲು ಅಂಗುಲ್​​-ತಲ್ವಾರ್​ ಮಾರ್ಗವಾಗಿ ಸಂಚರಿಸುತ್ತಿದ್ದ ಸಂದರ್ಭದಲ್ಲಿ ಅವಘಡ ಸಂಭವಿಸಿತು.

ರೈಲು ಬೋಗಿಗಳಲ್ಲಿ ಅಪಾರ ಪ್ರಮಾಣದ ಗೋಧಿ ಇತ್ತು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಕಳೆದ ಕೆಲ ದಿನಗಳಿಂದ ಬಂಗಾಳಕೊಲ್ಲಿಯಲ್ಲಿ ಬಿರುಗಾಳಿಸಮೇತ ಭಾರಿ ಮಳೆಯಾಗುತ್ತಿದೆ. ಅದೇ ಕಾರಣದಿಂದಾಗಿ ಈ ದುರ್ಘಟನೆ ನಡೆದಿದೆ ಎಂದು ಹೇಳಲಾಗುತ್ತಿದೆ.

ಅಪಘಾತ ಸಂಭವಿಸುತ್ತಿದ್ದಂತೆ ಈ ರೈಲ್ವೆ ವಿಭಾಗದಲ್ಲಿ ಸಂಚರಿಸುತ್ತಿದ್ದ 12 ರೈಲುಗಳ ಓಡಾಟವನ್ನು ರದ್ದುಗೊಳಿಸಲಾಗಿದೆ. ರೈಲು ಸಂಚಾರಕ್ಕೆ ಪರ್ಯಾಯ ಮಾರ್ಗದ ವ್ಯವಸ್ಥೆ ಮಾಡಲಾಗಿದೆ.