ಪಿಎಫ್‌ಐ - ಆರ್‌ಐಎಫ್​ಗೆ ಸೇರಿದ 33 ಬ್ಯಾಂಕ್ ಖಾತೆ​ಗಳ ಜಪ್ತಿ ಮಾಡಿದ ಇಡಿ

ಪಿಎಫ್‌ಐ ಮತ್ತು ಇದರ ಸಂಸ್ಥೆಯಾದ ಆರ್‌ಐಎಫ್​ಗೆ ಸೇರಿರುವ 33 ಬ್ಯಾಂಕ್ ಖಾತೆ​ಗಳನ್ನು ಜಪ್ತಿ ಮಾಡಿರುವ ಇಡಿ ಒಟ್ಟಾರೆ 68.62 ಲಕ್ಷ ರೂ.ಗೂ ಅಧಿಕ ಹಣವನ್ನು ಜಪ್ತಿ ಮಾಡಿದೆ.

ನವದೆಹಲಿ: ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾ (ಪಿಎಫ್‌ಐ)ಗೆ ಜಾರಿ ನಿರ್ದೇಶನಾಲಯ ಬುಧವಾರ ಶಾಕ್​ ನೀಡಿದೆ. ಅಕ್ರಮ ಹಣ ವರ್ಗಾವಣೆ ಪ್ರಕರಣದ ತನಿಖೆ ಸಂಬಂಧ ಪಿಎಫ್‌ಐ ಹಾಗೂ ಇದರ ಸಂಸ್ಥೆಯಾದ ರಿಹಬ್ ಇಂಡಿಯಾ ಫೌಂಡೇಶನ್ (ಆರ್‌ಐಎಫ್)ನ 33 ಬ್ಯಾಂಕ್​ ಖಾತೆಗಳನ್ನು ತಾತ್ಕಾಲಿಕವಾಗಿ ಇಡಿ ಜಪ್ತಿ ಮಾಡಿದೆ.

ಬುಧವಾರ ಈ ಬಗ್ಗೆ ಇಡಿ ಅಧಿಕೃತ ಪ್ರಕಟಣೆ ನೀಡಿದ್ದು, ಪಿಎಫ್‌ಐಗೆ ಸೇರಿರುವ 23 ಬ್ಯಾಂಕ್ ಖಾತೆ​ಗಳಲ್ಲಿರುವ 59,12,051 ರೂ. ಹಾಗೂ ಆರ್‌ಐಎಫ್​ಗೆ ಸೇರಿದ 10 ಬ್ಯಾಂಕ್​ಗಳ ಖಾತೆಗಳಲ್ಲಿರುವ 9,50,030 ರೂ. ಸೇರಿ ಒಟ್ಟಾರೆ 68,62,081 ರೂ.ಗಳನ್ನು ಜಪ್ತಿ ಮಾಡಲಾಗಿದೆ ಎಂದು ತಿಳಿಸಿದೆ. ಅಲ್ಲದೇ, ಪ್ರಶ್ನಾರ್ಹ ಮೂಲಗಳಿಂದ ಅಪಾರ ಪ್ರಮಾಣದ ಹಣವನ್ನು ಪಿಎಫ್‌ಐ ಮತ್ತು ಆರ್‌ಎಫ್‌ಐ ಸ್ವೀಕರಿಸಿದೆ ಎಂದು ತನಿಖೆಯಿಂದ ತಿಳಿದುಬಂದಿದೆ ಇಡಿ ಎಂದು ಹೇಳಿದೆ.

ಪಿಎಫ್‌ಐ ಬ್ಯಾಂಕ್​​ ಖಾತೆಗಳಲ್ಲಿ 2009ರಿಂದ 30 ಕೋಟಿ ರೂ.ಗೂ ಅಧಿಕ ನಗದು ಠೇವಣಿ ಸೇರಿದಂತೆ 60 ಕೋಟಿ ರೂ.ಗಿಂತ ಹೆಚ್ಚಿನ ಮೊತ್ತವನ್ನು ಜಮಾ ಮಾಡಲಾಗಿದೆ. ಅದೇ ರೀತಿ, ಆರ್‌ಐಎಫ್ ಬ್ಯಾಂಕ್​ ಖಾತೆಗಳಲ್ಲಿ 2010ರಿಂದ ಸುಮಾರು 58 ಕೋಟಿ ರೂ.ಗಳನ್ನು ಜಮಾ ಮಾಡಲಾಗಿದೆ ಎಂದು ಬಹಿರಂಗ ಪಡಿಸಿದೆ.

ಇದನ್ನೂ ಓದಿ:ಲಾಕ್​ಡೌನ್​ನಲ್ಲಿ ಕೆಲಸ ಕಳೆದುಕೊಂಡಿದ್ದ ಅಪ್ಪ.. ಮಗಳ ಶಾಲಾ ಶುಲ್ಕ ಕಟ್ಟಲಾಗದೇ ವಿಷ ಸೇವಿಸಿ ಆತ್ಮಹತ್ಯೆ