2048ರ ಒಲಿಂಪಿಕ್ಸ್​​ ನಡೆಸಲು ದೆಹಲಿ ಬಿಡ್​ ಮಾಡಲಿದೆ: ಕೇಜ್ರಿವಾಲ್

ದೆಹಲಿ ಉಪಮುಖ್ಯಮಂತ್ರಿ, ಹಣಕಾಸು ಸಚಿವ ಮನೀಶ್ ಸಿಸೋಡಿಯಾ ಇಂದು ಬಜೆಟ್ ಮಂಡನೆ ಮಾಡಿದ್ದಾರೆ. ಬಳಿಕ ಸಿಎಂ ಕೇಜ್ರಿವಾಲ್ ಬಜೆಟ್‌ ವಿವರ ಹಾಗು ಒಲಿಂಪಿಕ್ಸ್‌ಗೆ ಬಿಡ್ ಮಾಡುವ ವಿಚಾರವಾಗಿ ಮಾತನಾಡಿದರು.

ನವದೆಹಲಿ:2048ರ ಒಲಿಂಪಿಕ್ಸ್​ಗಾಗಿ ದೆಹಲಿ ಸರ್ಕಾರ ಬಿಡ್ ನಡೆಸಲಿದೆ ಎಂದು ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್​ ತಿಳಿಸಿದ್ದು, ಅದಕ್ಕಾಗಿ ಬೇಕಾಗುವ ಎಲ್ಲ ಮೂಲಸೌಕರ್ಯಗಳ ತಯಾರಿ ಮಾಡಿಕೊಳ್ಳಲಾಗುವುದು ಎಂದಿದ್ದಾರೆ.

ದೇಶದ ಆದಾಯ ಹೆಚ್ಚಾಗಬೇಕಾದರೆ ವಿವಿಧ ಕಾರ್ಯಕ್ರಮಗಳನ್ನು ಆಯೋಜನೆ ಮಾಡಬೇಕಾಗುತ್ತದೆ. ಈ ಹಿನ್ನೆಲೆಯಲ್ಲಿ ಈಗಿನಿಂದಲೇ ನಾವು 2048ರ ಒಲಿಂಪಿಕ್ಸ್​ ನಡೆಸುವ ಯೋಜನೆ ಹಾಕಿಕೊಂಡಿದ್ದೇವೆ. ಅದಕ್ಕಾಗಿ ಬೇಕಾಗುವ ಎಲ್ಲ ರೀತಿಯ ಸೌಲಭ್ಯ, ವ್ಯವಸ್ಥೆಗಳನ್ನು ಮಾಡಿಕೊಳ್ಳಲು ಯೋಜನೆ ರೂಪಿಸಲಾಗುವುದು ಎಂದು ಸಿಎಂ ತಿಳಿಸಿದ್ದಾರೆ.

ದೆಹಲಿ ಹಣಕಾಸು ಸಚಿವ ಮನೀಷ್​ ಸಿಸೋಡಿಯಾ 2021-22ನೇ ಸಾಲಿನ ಬಜೆಟ್​ ಮಂಡಿಸಿದ್ದು, ಇದ್ರ ಒಟ್ಟು ಮೌಲ್ಯ 69,000 ಕೋಟಿ ಆಗಿದೆ. ಈ ವೇಳೆ 2047ರ ವೇಳೆಗೆ ದೆಹಲಿ ತಲಾ ಆದಾಯವನ್ನು ಸಿಂಗಪೂರ ಆದಾಯದ ಮಟ್ಟಕ್ಕೆ ಹೆಚ್ಚಿಸಲು ಕ್ರಮ ಕೈಗೊಳ್ಳಲಾಗುವುದು ಎಂದು ಅವರು ಹೇಳಿದರು. ಪ್ರಮುಖವಾಗಿ ಬಜೆಟ್​ನಲ್ಲಿ ಕೋವಿಡ್​ ಲಸಿಕೆಗಾಗಿ 50 ಕೋಟಿ ರೂ. ಅನುದಾನ ನೀಡಲಾಗಿದ್ದು, ಶಿಕ್ಷಣ, ಆರೋಗ್ಯ ಹಾಗೂ ಗ್ರಾಮೀಣಾಭಿವೃದ್ಧಿಗೆ ಆದ್ಯತೆ ನೀಡಲಾಗಿದೆ.​​