ಚೀನಾದ ಪ್ರಚೋದನಕಾರಿ ನಡೆಯಿಂದ ಗಡಿಯಲ್ಲಿ ಶಾಂತಿಗೆ ಧಕ್ಕೆ: ವಿದೇಶಾಂಗ ಇಲಾಖೆ

ಭಾರತ ಫಾರ್ವರ್ಡ್​ ಪಾಲಿಸಿಯನ್ನು ಅನುಸರಿಸುತ್ತಿದೆ. ಚೀನಾ ಪ್ರದೇಶವನ್ನು ಆಕ್ರಮಿಸಲು ಎಲ್​ಎಸಿಯನ್ನು ಭಾರತೀಯ ಸೇನೆ ದಾಟಿದ್ದಾರೆ ಎಂಬ ಚೀನಾ ಆರೋಪವನ್ನು ವಿದೇಶಾಂಗ ಇಲಾಖೆ ತಿರಸ್ಕರಿಸಿದೆ.

ನವದೆಹಲಿ:ಲೈನ್ ಆಫ್ ಆಕ್ಚುವಲ್ ಕಂಟ್ರೋಲ್ (ಎಲ್​ಎಸಿ) ಉದ್ದಕ್ಕೂ ಚೀನಾ ಆಕ್ರಮಣಕಾರಿ ನೀತಿಯನ್ನು ಅನುಸರಿಸುತ್ತಿದೆ. ಸೈನ್ಯ ಜಮಾವಣೆ ಸೇರಿದಂತೆ ಹಲವಾರು ಪ್ರಚೋದನಕಾರಿ ಪ್ರಯತ್ನಗಳನ್ನು ಮಾಡುತ್ತಿದೆ ಎಂದು ಕೇಂದ್ರ ವಿದೇಶಾಂಗ ಇಲಾಖೆ ಆರೋಪಿಸಿದೆ.

ವಾಸ್ತವಿಕ ಗಡಿ ರೇಖೆ (ಎಲ್​ಎಸಿ) ಉದ್ದಕ್ಕೂ ಭಾರತ ಫಾರ್ವರ್ಡ್​ ಪಾಲಿಸಿಯನ್ನು ಅನುಸರಿಸುತ್ತಿದೆ ಎಂಬ ಚೀನಾ ಆರೋಪನ್ನು ತಿರಸ್ಕರಿಸಿದ ವಿದೇಶಾಂಗ ಇಲಾಖೆ ಚೀನಾದ ಆಕ್ರಮಣಕಾರಿ ನೀತಿಯನ್ನು ಕಟುವಾಗಿ ಟೀಕಿಸಿದೆ.

ವಿದೇಶಾಂಗ ಇಲಾಖೆ ವಕ್ತಾರ ಅರಿಂದಮ್ ಬಗ್ಚಿ ಈ ಕುರಿತು ಪ್ರತಿಕ್ರಿಯೆ ನೀಡಿದ್ದು, ಚೀನಾ ಗಡಿ ಪ್ರದೇಶಗಳಲ್ಲಿ ಹೆಚ್ಚಿನ ಸಂಖ್ಯೆಯ ಸೈನ್ಯ ಮತ್ತು ಶಸ್ತ್ರಾಸ್ತ್ರಗಳನ್ನು ನಿಯೋಜಿಸುತ್ತಿದೆ. ಹೀಗಾಗಿ ಭಾರತ ಕೆಲವು ಪ್ರತ್ಯುತ್ತರ ಕ್ರಮಗಳನ್ನು ಕೈಗೊಳ್ಳಬೇಕಾಯಿತು ಎಂದಿದ್ದಾರೆ.

ಚೀನಾ ಆರೋಪಕ್ಕೆ ಭಾರತದ ತಿರುಗೇಟು

ಭಾರತ ಫಾರ್ವರ್ಡ್​ ಪಾಲಿಸಿಯನ್ನು ಅನುಸರಿಸುತ್ತಿದೆ. ಚೀನಾ ಪ್ರದೇಶವನ್ನು ಆಕ್ರಮಿಸಲು ಎಲ್​ಎಸಿಯನ್ನು ಭಾರತೀಯ ಸೇನೆ ದಾಟಿದೆ ಎಂಬ ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರ ಹುವಾ ಚುನಿಂಗ್ ಮಾಡಿದ ಆರೋಪವನ್ನು ತಳ್ಳಿಹಾಕಿರುವ ಬಗ್ಚಿ ಚೀನಾ ಆರೋಪವನ್ನು ಕಟುವಾಗಿ ಟೀಕಿಸಿದ್ದಾರೆ.

ಚೀನಾ ಗಡಿಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಸೈನಿಕರನ್ನು ಒಗ್ಗೂಡಿಸುವುದು. ಪ್ರಚೋದನಕಾರಿ ನಡವಳಿಕೆ, ಸ್ಟೇಟಸ್ಕೋ ಬದಲಾಯಿಸಲು ಪ್ರಯತ್ನಿಸುವುದು ಹಾಗೂ ಏಕಪಕ್ಷೀಯ ನಿರ್ಧಾರಗಳು ಗಡಿಯಲ್ಲಿ ಶಾಂತಿ ಮತ್ತು ನೆಮ್ಮದಿಯನ್ನು ಹಾಳು ಮಾಡುತ್ತಿವೆ.ಇದಕ್ಕಾಗಿ ಭಾರತವೂ ಕೆಲವು ಕ್ರಮಗಳನ್ನು ತೆಗೆದುಕೊಳ್ಳಬೇಕಾಯಿತು ಎಂದು ಬಗ್ಚಿ ಖಡಕ್ಕಾಗೇ ಪ್ರತ್ಯುತ್ತರ ನೀಡಿದ್ದಾರೆ.

ಮಾತುಕತೆ ಬಳಿಕ ಎರಡೂ ಸೇನೆ ಸ್ವಸ್ಥಾನಕ್ಕೆ ಮರಳಿವೆ.. ಆದರೂ?

ಭಾರತ ಮತ್ತು ಚೀನಾ ಸುಮಾರು ಒಂದು ವರ್ಷದಿಂದ ಮಿಲಿಟರಿ ಘರ್ಷಣೆಯಲ್ಲಿ ತೊಡಗಿವೆ. ಸಂಘರ್ಷಕ್ಕೆ ಅಂತ್ಯ ಹಾಡಲು ಮಿಲಿಟರಿ ಮತ್ತು ರಾಜಕೀಯ ಮಟ್ಟದಲ್ಲಿ ಮಾತುಕತೆಗಳೂ ನಡೆದಿದ್ದು, ಮಾತುಕತೆ ಸ್ವಲ್ಪ ಮಟ್ಟಿನ ಯಶಸ್ಸು ಕಂಡಿದೆ.

ಕಳೆದ ತಿಂಗಳು ಭಾರತ ಮತ್ತು ಚೀನಾ ನಡುವಿನ ಅತ್ಯಂತ ವಿವಾದಾತ್ಮಕ ಪ್ರದೇಶವಾದ ಪ್ಯಾಂಗೋಗ್ ಸರೋವರ ಪ್ರದೇಶದಿಂದ ಎರಡೂ ರಾಷ್ಟ್ರಗಳ ಸೇನೆಗಳು ಜಾಗ ಖಾಲಿ ಮಾಡಿವೆ. ಆದರೂ ಚೀನಾ ಅನುಸರಿಸುತ್ತಿರುವ ಪ್ರಚೋದನಕಾರಿ ನಡೆಗಳಿಂದ ಗಡಿಯಲ್ಲಿ ಶಾಂತಿ, ಸುವ್ಯವಸ್ಥೆಗೆ ಧಕ್ಕೆಯಾಗಿದೆ.

ಇದನ್ನೂ ಓದಿ:ಡ್ರೋನ್​ ದಾಳಿಯಲ್ಲಿ ಅಲ್​ಖೈದಾ ಟಾಪ್​​​​ ಮೋಸ್ಟ್​​​​​​​​​​​​​​​​​ ಉಗ್ರ ಹತ: ವರದಿ