ಟೀ ಅಂಗಡಿಯಲ್ಲಿ ಸ್ಫೋಟ: ನಾಲ್ವರಿಗೆ ಗಾಯ, ಕೈ ಕಳೆದುಕೊಂಡ ವ್ಯಕ್ತಿ

ಕೇರಳದ ಪತ್ತನಂತಿಟ್ಟ ಜಿಲ್ಲೆಯ ತಿರುವಲ್ಲಾದಲ್ಲಿ ಬಾವಿಯ ಕೆಲಸಗಾರರು ಟೀ ಅಂಗಡಿಯಲ್ಲಿ ನಿಂತು ಮಾತನಾಡುತ್ತಿರುವ ವೇಳೆ ಸ್ಫೋಟ ಸಂಭವಿಸಿ ನಾಲ್ವರು ಗಾಯಗೊಂಡಿದ್ದಾರೆ. ಗಾಯಾಳುಗಳ ಪೈಕಿ ಒಬ್ಬರ ಕೈ ತುಂಡಾಗಿದೆ.

ಪತ್ತನಂತಿಟ್ಟ (ಕೇರಳ): ಟೀ ಅಂಗಡಿಯಲ್ಲಿ ಸ್ಫೋಟ ಸಂಭವಿಸಿ, ಅಂಗಡಿ ಮಾಲೀಕ ಸೇರಿ ನಾಲ್ವರು ಗಾಯಗೊಂಡಿರುವ ಘಟನೆ ಕೇರಳದ ಪತ್ತನಂತಿಟ್ಟ ಜಿಲ್ಲೆಯ ತಿರುವಲ್ಲಾದ ಪುನ್ನವೇಲಿಯಲ್ಲಿ ನಡೆದಿದೆ.

ಗಾಯಗೊಂಡವರಲ್ಲಿ ಮೂವರನ್ನು ಅಂಗಡಿ ಮಾಲೀಕ ಪುಳಿಚುಮಕ್ಕಲ್ ಬಶೀರ್, ಪುನ್ನವೇಲಿ ಸನ್ನಿ (64), ಥಾಮಸ್ ಜೋಹಾನ್ ಬೇಬಿಚಾನ್ (72) ಎಂದು ಗುರುತಿಸಲಾಗಿದೆ. ಗಾಯಾಳುಗಳ ಪೈಕಿ ಒಬ್ಬರ ಕೈ ತುಂಡಾಗಿದೆ.

ಇದನ್ನೂ ಓದಿ: ಚಳಿಯಲ್ಲಿ ಕ್ಯಾಂಪ್​ಫೈರ್​ ಹಾಕಿದ್ದಾಗ ಸೀರೆಗೆ ಬೆಂಕಿ ತಗುಲಿ ವೃದ್ಧೆ ಸಾವು

ಬಾವಿಯ ಕೆಲಸಗಾರರು ಬೆಳಗ್ಗೆ ಕೆಲಸಕ್ಕೆ ಹೋಗುವಾಗ ಪುನ್ನವೇಲಿ ಜಂಕ್ಷನ್‌ನಲ್ಲಿರುವ ಟೀ ಅಂಗಡಿಯಲ್ಲಿ ನಿಂತು ಮಾತನಾಡುತ್ತಿದ್ದರು. ಬಂಡೆ ಒಡೆಯುವ ಸ್ಫೋಟಕ ಸೇರಿದಂತೆ ಕೆಲ ಉಪಕರಣಗಳು ಅವರ ಬಳಿ ಇತ್ತು. ಅವರ ಬಳಿಯಿಂದ ಸ್ಫೋಟಕ ವಸ್ತುವಿನಿಂದಾಗಿ ಅವಘಡ ಸಂಭವಿಸಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಗಾಯಗೊಂಡವರನ್ನು ಕೊಟ್ಟಾಯಂ ವೈದ್ಯಕೀಯ ಕಾಲೇಜಿಗೆ ದಾಖಲಿಸಲಾಗಿದೆ. ಘಟನೆ ಕುರಿತು ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.