ಪಾಕ್​-ಚೀನಾಗೆ ಛಡಿ ಏಟು: ದೊಡ್ಡಣ್ಣನಿಂದ ಹೆಚ್ಚಲಿದೆ ಭಾರತ ಬಲ

ಅಮೆರಿಕದಿಂದ ಭಾರಿ ಪ್ರಮಾಣದ ಯುದ್ಧ ಸಾಮಗ್ರಿಗಳನ್ನು ಖರೀದಿಸಲು ಭಾರತದ ರಕ್ಷಣಾ ಇಲಾಖೆ ನಿರ್ಧರಿಸಿದೆ.

ನವದೆಹಲಿ: ಒಂದೆಡೆ ಚೀನಾದಿಂದ ಅತ್ಯಾಧುನಿಕ ಡ್ರೋಣ್‌ಗಳನ್ನು ಪಾಕಿಸ್ತಾನ ಖರೀದಿಸುತ್ತಿದ್ದರೆ, ಇತ್ತ ಭಾರತ ತಾನೇನೂ ಕಡಿಮೆ ಇಲ್ಲ ಎಂದು ತೋರಿಸಿದೆ. ಅಮೆರಿಕಾದಿಂದ ಭಾರಿ ಪ್ರಮಾಣದ ಯುದ್ಧ ಸಾಮಗ್ರಿಗಳನ್ನು ಖರೀದಿಸಲು ಮುಂದಾಗಿದೆ ಎಂದು ತಿಳಿದುಬಂದಿದೆ.

ಅಮೆರಿಕದ ರಕ್ಷಣಾ ಇಲಾಖೆಯಿಂದ 1 ಸಾವಿರ ಕೋಟಿ ಮೊತ್ತದ ಯುದ್ಧ ಸಾಮಗ್ರಿಗಳನ್ನು ಖರೀದಿಸುವ ಸಂಬಂಧದ ಪ್ರಸ್ತಾವನೆ ಬಗ್ಗೆ ಚರ್ಚಿಸಲು ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್​ ಅವರು ಮಹತ್ವದ ಸಭೆ ನಡೆಸಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಅಮೆರಿದ ಉತ್ತಮ ರೈಫಲ್​ಗಳು, ಪ್ಯಾರಾಚೂಟ್​ಗಳು ಮತ್ತಿತರ ಯುದ್ಧ ಸಾಮಗ್ರಿಗಳನ್ನು ಖರೀದಿಸುವ ಸಂಬಂಧ ಈ ಸಭೆಯಲ್ಲಿ ಚರ್ಚೆ ನಡೆಯಲಿದೆ. ವಿದೇಶಿ ಮಿಲಿಟರಿ ಮಾರಾಟ ಮಾರ್ಗದ ಮೂಲಕ ಎರಡೂ ಸರ್ಕಾರಗಳ ವ್ಯಾಪಾರ ನಡೆಸಲಿವೆ.

ಈಗಾಗಲೇ ಭಾರತ M4A1 ರೈಫಲ್​ಗಳನ್ನು ಅಮೆರಿಕದಿಂದ ಖರೀಸಿದ್ದು, ಉಗ್ರರ ವಿರುದ್ಧದ ಕಾರ್ಯಾಚರಣೆಗಳಿಗೆ ಇವುಗಳನ್ನೇ ಬಳಸಲಾಗುತ್ತಿದೆ. ಈಗ ಖರೀದಿಸಲು ಮುಂದಾಗಿರುವ ರೈಫಲ್​ಗಳನ್ನು ಸೇನೆಯ ವಿಶೇಷ ಪಡೆಗೆ ಒದಗಿಸುವ ಮೂಲಕ, ಅವುಗಳ ಬಲವರ್ಧನೆ ಮಾಡುವ ಉದ್ದೇಶ ಹೊಂದಿದೆ.