ದೀದಿ ಸರ್ಕಾರಕ್ಕೆ ₹ 20 ಲಕ್ಷ ರೂ. ದಂಡ ವಿಧಿಸಿದ ಸುಪ್ರೀಂಕೋರ್ಟ್​

ವಾಕ್ ಮತ್ತು ಅಭಿವ್ಯಕ್ತಿ ಸ್ವಾತಂತ್ರ್ಯದ ಹಕ್ಕು ಉಲ್ಲಂಘಿಸಿದ ಆಪಾದನೆ ಮೇಲೆ ಸಿನಿಮಾ ನಿರ್ಮಾಪಕರು ಮತ್ತು ಚಿತ್ರ ಮಂದಿರ ಮಾಲೀಕರಿಗೆ ನಷ್ಟ ಪರಿಹಾರ ಪಾವತಿಸುವಂತೆ ಸುಪ್ರೀಂಕೋರ್ಟ್​ನ ನ್ಯಾಯಪೀಠ ರಾಜ್ಯ ಸರ್ಕಾರಕ್ಕೆ ನಿರ್ದೇಶನ ನೀಡಿದೆ.

ನವದೆಹಲಿ:ರಾಜಕೀಯ ವಿಡಂಬನಾತ್ಮಕ ಚಿತ್ರವೆಂದು 'ಭೋಬಿಶಯೋತರ್ ಭೂತ್' ಪ್ರದರ್ಶನದ ಮೇಲೆ ನಿಷೇಧ ಹೇರಿರುವ ಪಶ್ಚಿಮ ಬಂಗಾಲ ಸಿಎಂ ಮಮತಾ ಬ್ಯಾನರ್ಜಿ ಸರ್ಕಾರಕ್ಕೆ, ಸುಪ್ರೀಂಕೋರ್ಟ್​ ₹ 20 ಲಕ್ಷ ರೂ ದಂಡ ಪಾವತಿಸುವಂತೆ ಆದೇಶಿದೆ.

ನ್ಯಾಯಮೂರ್ತಿ ಡಿ.ವೈ ಚಂದ್ರಚೂಡ ಅವರಿದ್ದ ನ್ಯಾಯಪೀಠವು, ವಾಕ್​ ಮತ್ತು ಅಭಿವ್ಯಕ್ತ ಸ್ವಾತಂತ್ರ್ಯದ ಹಕ್ಕು ಉಲ್ಲಂಘನೆಯ ಮೇಲೆ ನಿರ್ಮಾಪಕರು ಹಾಗೂ ಚಿತ್ರ ಮಂದಿರ ಮಾಲೀಕರಿಗೆ ಪರಿಹಾರ ಮೊತ್ತವಾಗಿ ₹ 20 ಲಕ್ಷ ನೀಡುವಂತೆ ಮಮತಾ ಸರ್ಕಾರಕ್ಕೆ ಸೂಚಿಸಿದೆ.

ರಾಜ್ಯಾದ್ಯಂತ 40ಕ್ಕೂ ಅಧಿಕ ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿದ್ದ 'ಭೋಬಿಶಯೋತರ್ ಭೂತ್' ಸಿನಿಮಾಕ್ಕೆ ದೀದಿ ಸರ್ಕಾರ ನಿಷೇಧ ಹೇರಿದೆ ಎಂದು ಅನಿಕ್ ದತ್ತಾ ಆಪಾದಿಸಿದರು.

ಒತ್ತಾಯಪೂರ್ವಕವಾಗಿ ಚಿತ್ರ ಪ್ರದರ್ಶನವನ್ನು ತಡೆಯಲಾಗಿದೆ ಎಂಬ ಸಿಂಗಲ್​ ಮತ್ತು ಮಲ್ಟಿಪ್ಲೆಕ್ಸ್​ ಚಿತ್ರಮಂದಿರಗಳ ಮಾಲೀಕರ ದೂರು ಆಲಿಸಿದ ನ್ಯಾಯಾಲಯ, 'ಪ್ರದರ್ಶನದ ವೇಳೆ ಯಾವುದೇ ಅಡಚಣೆ ಹಾಗೂ ನಿರ್ಬಂಧ ವಿಧಿಸದಂತೆ ಖಚಿತಪಡಿಸುವಂತೆ' ಸರ್ಕಾರಕ್ಕೆ ಕಟ್ಟುನಿಟ್ಟಿನ ನಿರ್ದೇಶನ ನೀಡಿದೆ.