ಬಹಿರ್ದೆಸೆಗೆ ತೆರಳುತ್ತಿದ್ದ ವೇಳೆ ಹೆರಿಗೆ, ಮಹಿಳೆಯ ಮಗು ನಾಪತ್ತೆ... ಕಾಡು ಪ್ರಾಣಿಗಳ ಪಾಲಾಯ್ತೆ ಶಿಶು?

ನಾನು ಕಾಡಿನ ಬಳಿಯ ಹೊಲಗಳಲ್ಲಿ ಶೌಚಾಲಯಕ್ಕೆ ಹೊರಟಾಗ, ಹೆರಿಗೆ ನೋವನ್ನು ಅನುಭವಿಸಲು ಪ್ರಾರಂಭಿಸಿದೆ. ಮಗುವಿಗೆ ಜನ್ಮ ನೀಡಿದ್ದೇ ನನಗೆ ತಿಳಿದಿರಲಿಲ್ಲ. ನನ್ನ ಕುಟುಂಬಸ್ಥರು ನನ್ನನ್ನು ಕಂಡು ಮನೆಗೆ ಕರೆತಂದರು ಎಂದು ಮಗು ಹೆತ್ತ ಪಿಂಕಿ ಹೇಳಿದ್ದಾರೆ.

ಆಗ್ರಾ(ಉತ್ತರ ಪ್ರದೇಶ): ಗರ್ಭಿಣಿಯು ಕಾಡಿನ ಬಳಿ ಮಗುವಿಗೆ ಜನ್ಮ ನೀಡಿದ್ದು, ಮಗು ನಾಪತ್ತೆಯಾದ ಘಟನೆ ಆಗ್ರಾ ಜಿಲ್ಲೆಯಲ್ಲಿ ನಡೆದಿದೆ.

ಆಗ್ರಾದ ಪಿನಾಹತ್ ಬ್ಲಾಕ್‌ನ ಜೋಧಪುರ ಗ್ರಾಮದಿಂದ ಈ ಪ್ರಕರಣ ವರದಿಯಾಗಿದ್ದು, ಮಗು ಎಲ್ಲಿದೆ ಎಂಬುದು ಇನ್ನೂ ತಿಳಿದಿಲ್ಲ. ನವಜಾತ ಶಿಶುವನ್ನು ಕಾಡು ಪ್ರಾಣಿ ಕೊಂದಿರಬೇಕು ಎಂದು ಸಂಬಂಧಿಕರು ಮತ್ತು ಸ್ಥಳೀಯರು ಶಂಕೆ ವ್ಯಕ್ತಪಡಿಸಿದ್ದಾರೆ.

ಮೂಲಗಳ ಪ್ರಕಾರ, ಗರ್ಭಿಣಿಯಾಗಿದ್ದ ಪಿಂಕಿ ಹೊಲಗಳಿಗೆ ತೆರಳುತ್ತಿದ್ದ ವೇಳೆ ಹೆರಿಗೆ ನೋವು ಕಾಣಿಸಿಕೊಂಡಿತ್ತು. ನಂತರ ಮಗುವಿಗೆ ಜನ್ಮ ನೀಡಿದ ಬಳಿಕ ಪ್ರಜ್ಞಾಹೀನಳಾಗಿದ್ದಾರೆ. ಪಿಂಕಿ ಬಹಳ ಸಮಯ ಕಳೆದರೂ ಮನೆಗೆ ಹಿಂದಿರುಗದಿದ್ದಾಗ, ಆಕೆಯ ಕುಟುಂಬ ಸದಸ್ಯರು ಹುಡುಕಲು ಪ್ರಾರಂಭಿಸಿದರು. ಸ್ವಲ್ಪ ಸಮಯದ ನಂತರ, ಪ್ರಜ್ಞಾಹೀನ ಸ್ಥಿತಿಯಲ್ಲಿ ಪಿಂಕಿ ಹೊಲದ ಬಳಿ ಬಿದ್ದಿರುವುದು ಕಂಡುಬಂದಿದೆ. ಆದರೆ ಅವಳ ನವಜಾತ ಶಿಶು ಕಾಣೆಯಾಗಿದೆ.

ಕಾಡಿನ ಬಳಿಯ ಹೊಲಗಳಲ್ಲಿ ಶೌಚಾಲಯಕ್ಕೆ ಹೊರಟಾಗ, ಹೆರಿಗೆ ನೋವು ಕಾಣಿಸಿಕೊಂಡಿತು. ಮಗುವಿಗೆ ಜನ್ಮ ನೀಡಿದ್ದೇ ನನಗೆ ತಿಳಿದಿರಲಿಲ್ಲ. ನನ್ನ ಕುಟುಂಬಸ್ಥರು ನನ್ನನ್ನು ಕಂಡು ಮನೆಗೆ ಕರೆತಂದಿದ್ದಾರೆ ಎಂದು ಪಿಂಕಿ ಹೇಳಿದ್ದಾರೆ.

ಈ ಘಟನೆಯು ಗ್ರಾಮದಲ್ಲಿ ಸರಿಯಾದ ಶೌಚಾಲಯ ವ್ಯವಸ್ಥೆ ಇಲ್ಲ ಎನ್ನುವ ಸಮಸ್ಯೆಯನ್ನು ಎತ್ತಿ ತೋರಿಸಿದೆ.

"ಹಲವಾರು ಯೋಜನೆಗಳನ್ನು ಘೋಷಿಸಲಾಯಿತು. ಆದರೆ ಇಲ್ಲಿಯವರೆಗೆ, ನಮ್ಮಲ್ಲಿ ಇನ್ನೂ ಸರಿಯಾದ ಶೌಚಾಲಯಗಳಿಲ್ಲ. ನಾನು ಈ ವಿಷಯವನ್ನು ಗ್ರಾಮದ ಪ್ರಧಾನ್​ಗೆ ತಿಳಿಸಿದಾಗ ಗ್ರಾಮದಲ್ಲಿ ಹೆಚ್ಚಿನ ಶೌಚಾಲಯಗಳನ್ನು ನಿರ್ಮಿಸಲಾಗುವುದಿಲ್ಲ ಎಂದು ಅವರು ನನ್ನ ಕಳವಳವನ್ನು ತಳ್ಳಿಹಾಕಿದರು ಎಂದು ಪಿಂಕಿಯ ಅತ್ತೆ ಹೇಳಿದರು.