ಪುಲ್ವಾಮಾ ದಾಳಿಯಲ್ಲಿ ಸ್ಫೋಟಕ ಸಾಗಣೆಗೆ ನೆರವು... ರಾಷ್ಟ್ರೀಯ ತನಿಖಾ ತಂಡದಿಂದ ಮೊದಲ ಬಂಧನ!

ಪುಲ್ವಾಮಾ ದಾಳಿ ನಡೆದ ವರ್ಷಗಳ ಬಳಿಕ ಇದೀಗ ಮೊದಲ ಬಾರಿಗೆ ಆರೋಪಿ ಬಂಧನ ಮಾಡುವಲ್ಲಿ ರಾಷ್ಟ್ರೀಯ ತನಿಖಾ ತಂಡ ಯಶಸ್ವಿಯಾಗಿದ್ದು, ಮಹತ್ವದ ಮಾಹಿತಿ ಪಡೆದುಕೊಂಡಿದೆ.

ನವದೆಹಲಿ:ಕಳೆದ ವರ್ಷ 2019ರ ಫೆಬ್ರವರಿ 14ರಂದು ಭದ್ರತಾ ಸಿಬ್ಬಂದಿ ಹೊತ್ತೊಯ್ಯುತ್ತಿದ್ದ ವಾಹನಕ್ಕೆ ಉಗ್ರರು ನಡೆಸಿದ್ದ ಆತ್ಮಹತ್ಯಾ ಬಾಂಬ್​ ದಾಳಿಯಲ್ಲಿ 40 ಯೋಧರು ಹುತಾತ್ಮರಾಗಿದ್ದರು. ಈ ಘಟನೆ ಸಂಭವಿಸಿ ವರ್ಷಗಳಾಗಿದ್ದು, ಇದೀಗ ರಾಷ್ಟ್ರೀಯ ತನಿಖಾ ತಂಡದಿಂದ ಮೊದಲ ಬಂಧನವಾಗಿದೆ.

ಪುಲ್ವಾಮಾ ದಾಳಿ ನಡೆಯಲು ಸಹಾಯ ಮಾಡಿದ್ದ ಕಾಕ್​ಪೋರ್​ದ 22 ವರ್ಷದ ಶಕೀರ್​ ಬಶೀರ್​ ಮ್ಯಾಗ್ರೇ ಎಂಬಾತನ ಬಂಧನ ಮಾಡಲಾಗಿದ್ದು, ಈ ವ್ಯಕ್ತಿ ದಾಳಿಗೆ ಸಂಬಂಧಿಸಿದಂತೆ ಸ್ಫೋಟಕ ಸಾಗಣೆಗೆ ನೆರವು ನೀಡಿದ್ದಾನೆ ಎಂಬ ಆರೋಪದ ಮೇಲೆ ಅರೆಸ್ಟ್​ ಮಾಡಲಾಗಿದೆ.

ಕಟ್ಟಿಗೆ ಮಳಿಗೆಯ ಮಾಲಿಕನಾಗಿರುವ ಬಶೀರ್​​ ಪುಲ್ವಾಮಾ ದಾಳಿಕೋರ್​ ಅದಿಲ್​ ಅಹಮ್ಮದ್​ಗೆ ಆಶ್ರಯ ನೀಡಿರುವ ಜತೆಗೆ ಸ್ಫೋಟಕ ವಸ್ತುಗಳ ಸಾಗಣೆಗೆ ಸಹಾಯ ಮಾಡಿದ್ದನು. 2018ರಲ್ಲಿ ಅದಿಲ್​ಗೆ ಪರಿಚಯವಾಗಿದ್ದ ವ್ಯಕ್ತಿ ತದನಂತರ ಜೈಶ್​​ ಉಗ್ರ ಸಂಘಟನೆಯೊಂದಿಗೆ ಗುರುತಿಸಿಕೊಂಡಿದ್ದ. ಈತನ ಮನೆಯಲ್ಲೇ ಐಇಡಿ ಸ್ಫೋಟಕ ತಯಾರು ಮಾಡಲು ಆತನ ಸಹಾಯ ಮಾಡಿದ್ದು, ಈ ಪ್ರದೇಶದಲ್ಲಿ ಸಿಆರ್​ಪಿಎಫ್​ ಯೋಧರ ಚಲನವಲನಗಳ ಕುರಿತು ಮೇಲಿಂದ ಮೇಲೆ ಮಾಹಿತಿ ನೀಡುತ್ತಿದ್ದ ಎಂದು ಪ್ರಾಥಮಿಕ ವರದಿಯಿಂದ ತಿಳಿದು ಬಂದಿದೆ.

ದಾಳಿಗೆ ಬಳಕೆ ಮಾಡಲಾಗಿರುವ ಸ್ಫೋಟಕಗಳನ್ನ ಆನ್​ಲೈನ್​ನಲ್ಲಿ ಆರ್ಡರ್​ ಮಾಡಲಾಗಿತ್ತು ಎಂಬ ಮಾಹಿತಿ ಸಹ ವಿಚಾರಣೆ ವೇಳೆ ಹೊರಬಿದ್ದಿದೆ. ಅಮೋನಿಯಂ ನೈಟ್ರೇಟ್, ನೈಟ್ರೋ-ಗ್ಲಿಸರಿನ್ ಮತ್ತು ಆರ್​​ಡಿಎಕ್ಸ್​​ ಸಹ ಇಲ್ಲಿಂದಲೇ ತರಿಸಿಕೊಳ್ಳಲಾಗಿತ್ತು ಎಂದು ತಿಳಿದು ಬಂದಿದೆ.

2019ರಲ್ಲಿ ಇಬ್ಬರು ಜೈಶ್​ ಸಂಘಟನೆಗೆ ಸೇರಿದ್ದ ಉಗ್ರರ ಹತ್ಯೆ ಮಾಡಿದ ನಂತರ ಅವರ ಬಳಿ ಸಿಕ್ಕ ಮೊಬೈಲ್​ನಿಂದ ಪುಲ್ವಾಮಾ ದಾಳಿಯ ಮಹತ್ವದ ಅಂಶ ಗೊತ್ತಾಗಿದ್ದು, ಇದರಲ್ಲಿ ಬಶೀರ್​​ ಮೊಬೈಲ್​ ನಂಬರ್​ ಲಭ್ಯವಾಗಿದ್ದರ ಬಗ್ಗೆ ತಿಳಿದು ಬಂದಿದೆ.