ನವದೆಹಲಿ: ಕ್ರಿಕೆಟ್ ಲೋಕದ ಕ್ಯಾಪ್ಟನ್ ಕೂಲ್ ಎಂದೇ ಕರೆಸಿಕೊಳ್ಳುವ ಮಹೇಂದ್ರ ಸಿಂಗ್ ಧೋನಿ, ಆಮ್ರಪಾಲಿ ಕಂಪನಿ ವಿರುದ್ಧ ಗರಂ ಆಗಿದ್ದಾರೆ. ಕಂಪನಿ ತನಗೆ ನೀಡಬೇಕಾದ ಬಾಕಿ ಮೊತ್ತ 40 ಕೋಟಿ ರೂ ನೀಡುವಂತೆ ತಾಕೀತು ಮಾಡಿ, ಸುಪ್ರೀಂಕೋರ್ಟ್ ಮೊರೆ ಹೋಗಿದ್ದಾರೆ.
ಈ ಮೊದಲು ಧೋನಿ ರಿಯಲ್ ಎಸ್ಟೇಟ್ ವಲಯದ ಆಮ್ರಪಾಲಿ ಗ್ರೂಪ್ನ ರಾಯಭಾರಿಯಾಗಿದ್ದರು. ಆದರೆ, ಕಂಪನಿ ಬಗ್ಗೆ ಸಾಕಷ್ಟು ಆರೋಪಗಳು ಕೇಳಿಬಂದ ಹಿನ್ನೆಲೆಯಲ್ಲಿ ಅವರು 2016 ಏಪ್ರಿಲ್ನಲ್ಲಿ ರಾಯಭಾರಿತ್ವಕ್ಕೆ ರಾಜೀನಾಮೆ ನೀಡಿದ್ದರು. ಆ ಸಮಯದಲ್ಲಿ ಕಂಪನಿ ಬಳಿ ಹಣವಿರಲಿಲ್ಲ ಎಂದು ಸುಮ್ಮನಾಗಿದ್ದಾಗಿ ಹೇಳಿಕೊಂಡಿರುವ ಧೋನಿ, ಇದೀಗ ಕೂಡಲೇ ಹಣ ಸಂದಾಯ ಮಾಡುವಂತೆ ಒತ್ತಾಯ ಮಾಡಿದ್ದಾರೆ. ಕಂಪನಿಗೆ ಈ ಬಗ್ಗೆ ನಿರ್ದೇಶನ ನೀಡುವಂತೆ ಸುಪ್ರೀಂಕೋರ್ಟ್ಗೆ ಮನವಿ ಸಲ್ಲಿಸಿದ್ದಾರೆ.
ನೊಯ್ಡಾದಲ್ಲಿ ಆಮ್ರಪಾಲಿ ಗ್ರೂಪ್ ಸಪ್ಪಿರೆ ಯೋಜನೆಯಡಿ ಫ್ಲಾನ್ ನಿರ್ಮಿಸುವ ಕಾರ್ಯ ಕೈಗೆತ್ತಿಕೊಂಡಿತ್ತು. 42 ಸಾವಿರ ಫ್ಲಾಟ್ಗಳನ್ನು ಆಗಾಗಲೇ ಜನರು ಬುಕ್ ಸಹ ಮಾಡಿದ್ದರು. ಆದರೆ ಕಂಪನಿ ಯೋಜನೆಯನ್ನು ಪೂರ್ಣಗೊಳಿಸಲಿಲ್ಲ ಎಂಬ ಆರೋಪ ಕೇಳಿ ಬಂದಿತ್ತು. ಫ್ಲಾಟ್ಗಳನ್ನು ಬುಕ್ ಮಾಡಿದ್ದ ಮಂದಿ ಟ್ವಿಟ್ಟರ್ ಮೂಲಕ ಆಕ್ರೋಶ ಹೊರಹಾಕಿ, ಧೋನಿಗೆ ಟ್ಯಾಗ್ ಸಹ ಮಾಡಿದ್ದರು. ಕಂಪನಿಯ ರಾಯಭಾರಿತ್ವ ತ್ಯಜಿಸಿ, ಇಲ್ಲವೇ ಕಂಪನಿ ತನ್ನ ಕಾರ್ಯವನ್ನು ಪೂರ್ಣಗೊಳಿಸುವ ಭರವಸೆ ನೀಡಿ ಎಂದು ಆಗ್ರಹಿಸಿದ್ದರು.
ಇದೇ ಕಾರಣಕ್ಕೆ ಧೋನಿ ಕಂಪನಿಯ ರಾಯಭಾರತ್ವದಿಂದ ಹಿಂದೆ ಸರಿಯುವಂತಾಯಿತು. ಕಳೆದ ತಿಂಗಳಷ್ಟೆ ಸುಪ್ರೀಂಕೋರ್ಟ್ ಕಂಪನಿಯ ಸಿಎಂಡಿ ಅನಿಲ್ ಶರ್ಮ ಹಾಗೂ ಇಬ್ಬರು ನಿರ್ದೇಶಕರನ್ನು ಕ್ರಿಮಿನಲ್ ದೂರಿನಡಿ ಬಂಧಿಸುವಂತೆ ದೆಹಲಿ ಪೊಲೀಸರಿಗೆ ಸೂಚನೆ ನೀಡಿದೆ. ಇವರ ಆಸ್ತಿಯನ್ನು ಮುಟ್ಟುಗೋಲು ಹಾಕಿಕೊಳ್ಳುವಂತೆಯೂ ಸೂಚನೆ ನೀಡಿದೆ.
