ಒಂದೇ ಮಂಟಪದಲ್ಲಿ ಸಪ್ತಪದಿ ತುಳಿದ ತಾಯಿ, ಮಗಳು!

ಗೋರಖ್‌ಪುರದಲ್ಲಿ 53 ವರ್ಷದ ತಾಯಿ, 27 ವರ್ಷದ ಪುತ್ರಿ ಒಂದೇ ಮಂಟದಲ್ಲಿ ಮದುವೆಯಾಗುವ ಮೂಲಕ ಗಮನ ಸೆಳೆದಿದ್ದಾರೆ. ಈವೊಂದು ವಿಶೇಷ ವಿವಾಹ ಕಾರ್ಯಕ್ರಮಕ್ಕೆ ಉತ್ತರ ಪ್ರದೇಶ ಸರ್ಕಾರ ನೆರವಾಗುವ ಮೂಲಕ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.

ಗೋರಖ್‌ಪುರ‌(ಉತ್ತರ ಪ್ರದೇಶ): ಸಾಮಾನ್ಯವಾಗಿ ಅಣ್ಣ ತಮ್ಮಂದಿರು, ಅಕ್ಕ ತಂಗಿಯರು ಒಂದೇ ಮಂಟಪದಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಡೋದನ್ನ ನೋಡಿದ್ದೇವೆ. ಇದು ತಂದೆ, ತಾಯಿಗೆ ಖರ್ಚು ವೆಚ್ಚಗಳನ್ನು ಕಡಿತ ಮಾಡುವ ಜೊತೆ ಜೊತೆಗೆ ಮಕ್ಕಳಿಗೆ ಮದುವೆ ಮಾಡಬೇಕು ಎಂಬ ಜವಾಬ್ದಾರಿಯನ್ನು ಕಡಿಮೆ ಮಾಡಿಕೊಳ್ಳುವ ಆಲೋಚನೆಯೂ ಹೌದು. ಆದರೆ ಇಲ್ಲಿ ನಡೆದಿರುವ ಎರಡು ಮದುವೆಗಳು ಸ್ವಲ್ಪ ವಿಭಿನ್ನ ಹಾಗೂ ವಿಶೇಷವಾಗಿದೆ.

ಗೋರಖ್‌ಪುರದ ಪಿಪ್ರೌಲಿ ಎಂಬ ಹಳ್ಳಿಯಲ್ಲಿ ಸರ್ಕಾರದಿಂದ ನಡೆದ ಸಾಮೂಹಿಕ ವಿವಾಹ ಕಾರ್ಯಕ್ರಮದ ಒಂದೇ ಮಂಟಪದಲ್ಲಿ 53 ವರ್ಷದ ತಾಯಿ ಹಾಗೂ 27 ವರ್ಷದ ಪುತ್ರಿ ಮದುವೆಯಾಗುವ ಮೂಲಕ ಗಮನ ಸಳೆದಿದ್ದಾರೆ. ಮುಖ್ಯಮಂತ್ರಿ ಸಾಮೂಹಿಕ ವಿವಾಹ ಯೋಜನೆಯಡಿ 63 ಮದುವೆಯಗಳು ನಡೆದವು.

53 ವರ್ಷದ ಬೆಲ ದೇವಿ 25 ವರ್ಷಗಳ ಹಿಂದೆ ತನ್ನ ಪತಿಯನ್ನು ಕಳೆದುಕೊಂಡಿದ್ದಳು. ಈ ದಂಪತಿಗೆ ಮೂವರು ಹೆಣ್ಣು ಮಕ್ಕಳು ಹಾಗೂ ಇಬ್ಬರು ಪುತ್ರರಿದ್ದಾರೆ. ಇದೀಗ ಈಕೆ ಮೃತ ಪತಿಯ ಸಹೋದರ 55 ವರ್ಷದ ಜಗದೀಶ್‌ ಎಂಬುವವರನ್ನು ವಿವಾಹವಾಗಿದ್ದಾರೆ. ಇನ್ನೂ ದೇವಿ ಪುತ್ರಿ ಇಂದು ರಾಹುಲ್‌ ಎಂಬ ಯುವಕನನ್ನು ವರಿಸಿದ್ದಾಳೆ. ತಾಯಿ, ಪುತ್ರಿಯ ಮದುವೆಯಾಗಿ ಸ್ಥಳೀಯ ಅಧಿಕಾರಿಗಳು ಹಾಗೂ ಜನ ಸಾಮಾನ್ಯರು ಸಾಕ್ಷಿಯಾಗಿದ್ದಾರೆ.

ಈ ಬಗ್ಗೆ ಮಾತನಾಡಿರುವ ಸಮಾಜ ಕಲ್ಯಾಣಾಧಿಕಾರಿ ಕುಮಾರ್‌, ಮುಖ್ಯಮಂತ್ರಿ ಸಾಮೂಹಿಕ ವಿವಾಹ ಯೋಜನೆಯಲ್ಲಿ ಬಡವರು, ವಿಧವೆಯರಿಗೆ ಮೊದಲ ಆದ್ಯತೆ ನೀಡಲಾಗಿದೆ. ವಧು, ವರರ ಆಯ್ಕೆಗೆ ಸ್ಥಳೀಯರು ಕೂಡ ನೆರವು ನೀಡಿದ್ದಾರೆ ಎಂದರು.