ಹೈದರಾಬಾದ್:ಗಂಡನಿಂದ ಡೈವೋರ್ಸ್ ಪಡೆದುಕೊಂಡಿದ್ದ ಮಹಿಳಾ ವೈದ್ಯೆವೋರ್ವಳು ಮ್ಯಾಟ್ರಿಮೋನಿಯಲ್ಲಿ ತನ್ನ ಪ್ರೊಫೈಲ್ ನೋಂದಾಯಿಸಿಕೊಂಡು ವಂಚನೆಗೆ ಒಳಗಾಗಿರುವ ಘಟನೆ ಹೈದರಾಬಾದ್ನಲ್ಲಿ ನಡೆದಿದ್ದು, ನಾಲ್ವರು ವಿದೇಶಿಗರು ಆಕೆಗೆ ಮೋಸ ಮಾಡಿದ್ದಾರೆ.
ಮ್ಯಾಟ್ರಿನೋನಿಯಲ್ಲಿ ತನ್ನ ಪ್ರೊಫೈಲ್ ನೋಂದಾಯಿಸಿದ್ದ ವ್ಯಕ್ತಿಯೋರ್ವ ತಾನು ಯುಕೆಯಲ್ಲಿ ಶಸ್ತ್ರಚಿಕಿತ್ಸಕನಾಗಿ ಕೆಲಸ ಮಾಡುತ್ತಿರುವುದಾಗಿ ನಂಬಿಸಿ ವೈದ್ಯೆಯ ವಾಟ್ಸಪ್ ನಂಬರ್ಗೆ ಸಂದೇಶ ರವಾನೆ ಮಾಡಿ, ಆಕೆ ಜತೆ ಸಂಪರ್ಕ ಹೊಂದಿದ್ದಾನೆ. ಇದೇ ವೇಳೆ ಆಕೆಯನ್ನ ಮದುವೆಯಾಗುವುದಾಗಿ ನಂಬಿಸಿದ್ದಾನೆ.
ಕೆಲ ದಿನಗಳ ನಂತರ ವೈದ್ಯೆಗೆ ಕೆಲವೊಂದು ಚಿನ್ನದ ಆಭರಣ, ಮೊಬೈಲ್ ಫೋನ್, ಕೈಗಡಿಯಾರ ಹಾಗೂ ಕೆಲವೊಂದು ಡಾಲರ್ ಕೊರಿಯರ್ ಮೂಲಕ ಉಡುಗೊರೆಯಾಗಿ ಕಳುಹಿಸಿಕೊಡುವುದಾಗಿ ತಿಳಿಸಿದ್ದಾನೆ. ಇದೇ ನೆಪದಲ್ಲಿ ಕೊರಿಯರ್ ವ್ಯಕ್ತಿಯಾಗಿ ನಟಿಸಿ ವೈದ್ಯೆಯನ್ನ ಸಂಪರ್ಕಿಸಿದ ಆತ, ಉಡುಗೊರೆ ಪಡೆದುಕೊಳ್ಳಲು ಎರಡು ಕಂತುಗಳಲ್ಲಿ 12.45 ಲಕ್ಷ ರೂ. ಪಡೆದುಕೊಂಡಿದ್ದಾನೆ. ತಾನು ವಂಚನೆಗೊಳಗಾಗಿರುವ ಮಾಹಿತಿ ಗೊತ್ತಾಗುತ್ತಿದ್ದಂತೆ ಮಹಿಳೆ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾಳೆ. ಪ್ರಕರಣ ಸಂಬಂಧ ಈಗಾಗಲೇ ಆರೋಪಿಯಿಂದ 18 ಮೊಬೈಲ್ ಹಾಗೂ 3,05,076 ರೂ. ನಗದು ವಶಕ್ಕೆ ಪಡೆದುಕೊಂಡಿದ್ದು, ಓರ್ವ ನೈಜಿರಿಯನ್ ಹಾಗೂ ಮೂವರು ನೇಪಾಳಿ ವ್ಯಕ್ತಿಗಳನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ.
ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಮಾತನಾಡಿರುವ ಸೈಬರಾಬಾದ್ ಪೊಲೀಸ್ ಆಯುಕ್ತ ವಿಶ್ವನಾಥ್ ಸಜ್ಜನವರ್, ಆರೋಪಿಗಳನ್ನ ಈಗಾಗಲೇ ವಶಕ್ಕೆ ಪಡೆದುಕೊಳ್ಳಲಾಗಿದೆ. ವಿಚಾರಣೆ ನಡೆಸುತ್ತಿರುವುದಾಗಿ ತಿಳಿಸಿದ್ದಾರೆ.