ಆತ್ಮಹತ್ಯೆಗೂ ಮೊದಲು ಹೆಂಡ್ತಿಗೆ ವಿಡಿಯೋ ಕಾಲ್​​... ಆಕೆ ಮಾಡಿದ ಉಪಾಯ ಉಳಿಸಿತು ಗಂಡನ ಜೀವ!

ಮೂರು ತಿಂಗಳಿಂದ ಮನೆಯಲ್ಲೇ ಕುಳಿತುಕೊಂಡು ಖಿನ್ನತೆಗೊಳಗಾದ ವ್ಯಕ್ತಿಯೋರ್ವ ಆತ್ಮಹತ್ಯೆ ಮಾಡಿಕೊಳ್ಳುವ ನಿರ್ಧಾರ ಮಾಡಿದ್ದು, ಹೆಂಡತಿ ಮಾಡಿರುವ ಉಪಾಯದಿಂದ ಆತನ ಪ್ರಾಣ ಉಳಿದಿದೆ.

ಹೈದರಾಬಾದ್​:ಕಳೆದ ಮೂರು ತಿಂಗಳಿಂದ ಯಾವುದೇ ಸಂಬಳ ಪಡೆದುಕೊಳ್ಳದೇ ಖಿನ್ನತೆಗೊಳಗಾಗಿದ್ದ ವ್ಯಕ್ತಿಯೋರ್ವ ಆತ್ಮಹತ್ಯೆ ಮಾಡಿಕೊಳ್ಳುವ ನಿರ್ಧಾರ ಮಾಡಿದ್ದು, ಕೊನೆಯದಾಗಿ ಹೆಂಡತಿ ಜತೆ ಮಾತನಾಡುವ ಸಲುವಾಗಿ ವಿಡಿಯೋ ಕಾಲ್​ ಮಾಡಿದ್ದಾನೆ. ಅದೇ ಆತನ ಪ್ರಾಣ ಉಳಿಸಿದೆ.

ವೈದ್ಯಕೀಯ ಪ್ರತಿನಿಧಿಯಾಗಿ ಕೆಲಸ ಮಾಡ್ತಿದ್ದ ವ್ಯಕ್ತಿಯೋರ್ವ ಲಾಕ್​ಡೌನ್​ನಿಂದಾಗಿ ಕಳೆದ ಮೂರು ತಿಂಗಳಿಂದ ಮನೆಯಲ್ಲಿ ಕುಳಿತಿದ್ದಾನೆ. ಸಂಬಳ ಪಡೆದುಕೊಳ್ಳದೇ ಖಿನ್ನತೆಗೊಳಗಾಗಿ ಆತ್ಮಹತ್ಯೆ ಮಾಡಿಕೊಳ್ಳಲು ನಿರ್ಧರಿಸಿದ್ದಾನೆ. ಹೆಂಡತಿಗೆ ವಿಡಿಯೋ ಕಾಲ್​ ಮಾಡಿರುವ ವ್ಯಕ್ತಿ ಸೂಸೈಡ್​​ ಮಾಡಿಕೊಳ್ಳಲು ಮುಂದಾಗಿರುವುದಾಗಿ ಹೇಳಿ, ಪೋನ್​ ಕಟ್​ ಮಾಡಿದ್ದಾನೆ. ಈ ವೇಳೆ ತಕ್ಷಣವೇ ಶೈಲಜಾ ಪೊಲೀಸ್​ ಗಸ್ತು ವಾಹನ ನಂಬರ್​ 100ಕ್ಕೆ ಕಾಲ್​ ಮಾಡಿ ಮಾಹಿತಿ ನೀಡಿದ್ದಾಳೆ. ತನ್ನ ಗಂಡ ಯಾವುದೂ ರೈಲ್ವೆ ಹಳಿಯಿಂದ ಕರೆ ಮಾಡಿದ್ದು, ಅತ್ಮಹತ್ಯೆ ಮಾಡಿಕೊಳ್ಳಲು ಮುಂದಾಗಿದ್ದಾನೆ ಎಂದು ತಿಳಿಸಿದ್ದಾಳೆ.

ಅಲರ್ಟ್​ ಆದ ಪೊಲೀಸ್​​​ ಸಿಬ್ಬಂದಿ, ವ್ಯಕ್ತಿಯ ಮೊಬೈಲ್​ ನಂಬರ್​​ ಟ್ರ್ಯಾಕ್​ ಮಾಡಿದ್ದಾರೆ. ಅದು ರೆಡ್​ ಹಿಲ್ಸ್​​ ಬಳಿ ಸಿಗ್ನಲ್​​ ತೋರಿಸಿದೆ. ಈ ವೇಳೆ ಸೈಫಾಬಾದ್​ ಪೊಲೀಸರು ನಾಂಪಲ್ಲಿ ಮತ್ತು ಲಕ್ಡಿಕಪುಲ್​​ ರೈಲ್ವೆ ನಿಲ್ದಾಣದಲ್ಲಿ ಪರೀಕ್ಷೆ ಮಾಡಲು ಮಾಹಿತಿ ನೀಡಿದ್ದಾರೆ. ಜತೆಗೆ ಶೈಲಜಾ ಕೂಡ ಅವರೊಂದಿಗೆ ತೆರಳಿದ್ದಾಳೆ.

ಲಕ್ಡಿಕಪುಲ್​ ರೈಲ್ವೆ ಟ್ರ್ಯಾಕ್​ ಮೇಲೆ ವ್ಯಕ್ತಿ ಮಲಗಿರುವುದನ್ನ ನೋಡಿರುವ ಪೊಲೀಸರು ತಕ್ಷಣವೇ ಆತನ ರಕ್ಷಣೆ ಮಾಡಿದ್ದಾರೆ. ಇದಾದ ಕೆಲವೇ ನಿಮಿಷಗಳಲ್ಲಿ ರೈಲುವೊಂದು ಇದೇ ರೈಲ್ವೆ ಟ್ರ್ಯಾಕ್​​ ಮೇಲೆ ಹಾಯ್ದು ಹೋಗಿದೆ. ವ್ಯಕ್ತಿಯ ಕೌನ್ಸ್​ಲಿಂಗ್​ ನಡೆಸಿದ ನಂತರ ಆತನನ್ನ ಕುಟುಂಬಕ್ಕೆ ಹಸ್ತಾಂತರ ಮಾಡಲಾಗಿದೆ.

ಪೊಲೀಸರು ತಿಳಿಸಿರುವ ಪ್ರಕಾರ, ದೇಶದಲ್ಲಿ ಲಾಕ್​ಡೌನ್​ ಜಾರಿಯಾದಾಗನಿಂದಲೂ ಈತ ಮನೆಯಲ್ಲಿ ಕುಳಿತಿದ್ದು, ಸಂಬಳ ಪಡೆದುಕೊಂಡಿಲ್ಲ. ಮದ್ಯ ಸೇವನೆ ಮಾಡಿ ಆತ್ಮಹತ್ಯೆ ಮಾಡಿಕೊಳ್ಳಲು ನಿರ್ಧರಿಸಿದ್ದನು ಎಂದಿದ್ದಾರೆ. ಜತೆಗೆ ಇವರ ಕುಟುಂಬದಲ್ಲಿ ಯಾವುದೇ ಸಮಸ್ಯೆ ಇರಲಿಲ್ಲ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಇದೇ ವಿಚಾರವಾಗಿ ಟ್ವೀಟರ್​ನಲ್ಲಿ ಐಪಿಎಸ್​ ಅಂಜನಿ ಕುಮಾರ್​ ಮಾಹಿತಿ ನೀಡಿದ್ದು, ತಂತ್ರಜ್ಞಾನವೊಂದು ವ್ಯಕ್ತಿಯ ಪ್ರಾಣ ಉಳಿಸಿದೆ ಎಂದಿದ್ದಾರೆ.