ಕಾಂಗ್ರೆಸ್​ ಗಾಂಧಿ, ಬಿಜೆಪಿ ಗೂಡ್ಸೆ: ಆಯ್ಕೆ ಜನರದ್ದು ಎಂದ ರಾಹುಲ್​

ಲೋಕಸಭೆ ಚುನಾವಣೆಯಲ್ಲಿ ಗಾಂಧಿಯಂತಹ ಕಾಂಗ್ರೆಸ್​, ಗೂಡ್ಸೆಯಂತಹ ಬಿಜೆಪಿ ಆಯ್ಕೆಗಳು ಜನರ ಎದುರಿಗಿದೆ ಎಂದು ರಾಹುಲ್​ ಗಾಂಧಿ ಹೇಳಿದರು

ನವದೆಹಲಿ: ಏಪ್ರಿಲ್​ 11ರಿಂದ ಆರಂಭವಾಗಲಿರುವ ಲೋಕಸಭೆ ಚುನಾವಣೆಯಲ್ಲಿ ಗಾಂಧಿ ಹಾಗೂ ಗೂಡ್ಸೆ ಎಂಬ ಎರಡು ಆಯ್ಕೆಗಳಿವೆ. ಯಾರನ್ನು ಆಯ್ಕೆ ಮಾಡಬೇಕೆಂಬುದು ಜನರಿಗೆ ಬಿಟ್ಟದ್ದು ಎಂದು ಕಾಂಗ್ರೆಸ್​ ಅಧ್ಯಕ್ಷ ರಾಹುಲ್ ಗಾಂಧಿ ಹೇಳಿದ್ದಾರೆ.

ಇಂದಿರಾ ಗಾಂಧಿ ಸ್ಟೇಡಿಯಂನಲ್ಲಿ ನಡೆದ ಬೂತ್ ಹಂತದ ಕಾರ್ಯಕರ್ತರ ಸಭೆಯಲ್ಲಿ ಮಾತನಾಡಿದ ಅವರು, ಈ ಬಾರಿಯ ಲೋಕಸಭೆ ಚುನಾವಣೆ ಕಾಂಗ್ರೆಸ್​ ಹಾಗೂ ಬಿಜೆಪಿಯ ಸೈದ್ಧಾಂತಿಕ ಸಂಘರ್ಷ ಎಂದು ಕರೆದಿದ್ದಾರೆ. ಕಾಂಗ್ರೆಸ್​ ಅನ್ನು ಮಹಾತ್ಮ ಗಾಂಧಿಗೆ, ಬಿಜೆಪಿ ಹಾಗೂ ಆರ್​ಎಸ್​ಎಸ್​ ಅನ್ನು ನಾಥುರಾಂ ಗೂಡ್ಸೆಗೆ ಹೋಲಿಕೆ ಮಾಡಿ ಅವರು ಮಾತನಾಡಿದರು.

ದೇಶದ ನಿರುದ್ಯೋಗ ಹಾಗೂ ಕೃಷಿ ಸಂಕಷ್ಟಕ್ಕೆ ಮೋದಿ ಸರ್ಕಾರ ಕಾರಣ. ಕಾಂಗ್ರೆಸ್​ ಅಧಿಕಾರಕ್ಕೆ ಬಂದ ತಕ್ಷಣ ಇವುಗಳನ್ನು ನಿಭಾಯಿಸಲಿದೆ. ಕನಿಷ್ಠ ಆದಾಯ ಭರವಸೆಯನ್ನೂ ಈಡೇರಿಸಲಿದೆ. ಯಾರೊಬ್ಬರೂ ಕನಿಷ್ಠ ಆದಾಯ ಮಟ್ಟದಿಂದ ಕೆಳಗಿರದಂತೆ ನಾವು ನೋಡಿಕೊಳ್ಳುತ್ತೇವೆ ಎಂದು ಭರವಸೆ ನೀಡಿದರು.

ಕರ್ನಾಟಕ, ರಾಜಸ್ಥಾನ, ಮಧ್ಯಪ್ರದೇಶ ಹಾಗೂ ಛತ್ತೀಸ್​ಗಢದಲ್ಲಿ ನಾವು ನೀಡಿದ್ದ ಭರವಸೆಯಂತೆ ಸಾಲಮನ್ನಾ ಮಾಡಿದ್ದೇವೆ ಎಂದು ಬೆನ್ನು ತಟ್ಟಿಕೊಂಡರು.