ನವದೆಹಲಿ:ಹಿರಿಯ ನಾಯಕರನ್ನು ಬಿಜೆಪಿ ಲೋಕಸಭೆ ಕಣದಿಂದ ದೂರವಿಟ್ಟಿದೆ ಎಂಬ ಮಾತಿಗೆ ಪೂರಕವಾಗಿ ಮತ್ತೊಂದು ಸುದ್ದಿ ಹರಿದಾಡುತ್ತಿದೆ. ಬಿಜೆಪಿ ವರಿಷ್ಠ ಮುರುಳಿ ಮನೋಹರ್ ಜೋಶಿ ಅವರಿಗೆ ಚುನಾವಣೆಗೆ ಸ್ಪರ್ಧಿಸದಂತೆ ಬಿಜೆಪಿ ಕಾರ್ಯದರ್ಶಿ ಸೂಚಿಸಿದ್ದಾಗಿ ತಿಳಿದುಬಂದಿದೆ.
ತಮ್ಮ ಕ್ಷೇತ್ರ ಕಾನ್ಪುರದ ಜನರಿಗೆ ಬರೆದ ಪತ್ರದಲ್ಲಿ ಈ ಬಗ್ಗೆ ಸ್ವತಃ ಜೋಶಿ ಅವರೇ ಹೇಳಿಕೊಂಡಿದ್ದಾರೆ. ' ಕಾನ್ಪುರದ ಪ್ರಿಯ ಮತದಾರರೆ, ಭಾರತೀಯ ಜನತಾ ಪಕ್ಷದ ಪ್ರಧಾನ ಕಾರ್ಯದರ್ಶಿ ಶ್ರೀ ರಾಮಲಾಲ್ ಅವರು ನನಗೆ ಕಾನ್ಪುರ ಸೇರಿ ಎಲ್ಲಿಯೂ ಲೋಕಸಭೆ ಚುನಾವಣೆಗೆ ಸ್ಪರ್ಧಿಸದಂತೆ ಸೂಚಿಸಿದ್ದಾರೆ' ಎಂದು ಹೇಳಿಕೊಂಡಿದ್ದಾರೆ.
75 ವರ್ಷಕ್ಕೂ ಮೇಲ್ಪಟ್ಟ ನಾಯಕರಿಗೆ ಟಿಕೆಟ್ ನಿರಾಕರಿಸುವ ಪಕ್ಷದ ನಿರ್ಧಾರದಂತೆ, 85 ವರ್ಷದ ಜೋಶಿ ಅವರಿಗೂ ಈ ರೀತಿ ಸೂಚಿಸಲಾಗಿದೆ ಎಂದು ಹೇಳಲಾಗ್ತಿದೆ.
ಕೇಂದ್ರ ಸಚಿವರು, ಬಿಜೆಪಿ ಅಧ್ಯಕ್ಷರೂ ಆಗಿದ್ದ ಜೋಶಿ, 2014ರ ಚುನಾವಣೆಯಲ್ಲಿ ಮೋದಿಗಾಗಿ ತಮ್ಮ ಕ್ಷೇತ್ರ ವಾರಣಾಸಿಯನ್ನು ಬಿಟ್ಟುಕೊಟ್ಟು, ಕಾನ್ಪುರದಿಂದ ಸ್ಪರ್ಧಿಸಿದ್ದರು. ಇವರೊಟ್ಟಿಗೆ ಅಡ್ವಾಣಿ, ಕಲ್ರಾಜ್ ಮಿಶ್ರಾ, ಶಾಂತಕುಮಾರ್ ಹಾಗೂ ಕರಿಯಾ ಮುಂಡಾ ಅವರಿಗೂ ಈ ಬಾರಿಯ ಚುನಾವಣೆಗೆ ಸ್ಪರ್ಧಿಸದಂತೆ ರಾಮ್ಲಾಲ್ ಸೂಚನೆ ನೀಡಿದ್ದಾರೆ ಎನ್ನಲಾಗಿದೆ.