ಬಿಜೆಪಿ ಒಂದು ಚಾನ್ಸ್‌ ಕೊಟ್ರೇ.. ಸೋನಿಯಾ ವಿರುದ್ಧ ಮಾಜಿ ಯೋಧ ಸ್ಪರ್ಧಿಸುವ ಆಸೆ..

ರಾಯ್​ಬರೇಲಿ ಕ್ಷೇತ್ರದಲ್ಲಿ ಸೋನಿಯಾ ಎದುರು ಸ್ಪರ್ಧಿಸುವ ಆಸೆ ವ್ಯಕ್ತಪಡಿಸಿದ ಮಾಜಿ ಯೋಧ ಮೇಜರ್​ ಸುರೇಂದ್ರ ಪೂನೈ

ನವದೆಹಲಿ : ಇತ್ತೀಚೆಗಷ್ಟೆ ಬಿಜೆಪಿ ಸೇರಿದ ವಿಶೇಷ ಸೇನಾ ಪಡೆಯ ಮಾಜಿ ಯೋಧ, ಕಾಂಗ್ರೆಸ್​ನ ಸೋನಿಯಾ ಗಾಂಧಿ ವಿರುದ್ಧ ಸ್ಪರ್ಧಿಸುವ ಮನದ ಇಂಗಿತ ವ್ಯಕ್ತಪಡಿಸಿದ್ದಾರೆ.

ಮಾಜಿ ಯೋಧ ಮೇಜರ್​ ಸುರೇಂದ್ರ ಪೂನೈ, ರಾಯ್​ಬರೇಲಿ ಕ್ಷೇತ್ರದಲ್ಲಿ ಸೋನಿಯಾ ಎದುರು ಸ್ಪರ್ಧಿಸಲು ನರೇಂದ್ರ ಮೋದಿ ನನಗೇನಾದರೂ ಸೂಚಿಸಿದರೆ ಹೆಮ್ಮೆ ಪಡುತ್ತೇನೆ. ಈ ಸ್ಪರ್ಧೆ ಚೌಕೀದಾರ್​ ಹಾಗೂ ಚೋರ್​ ನಡುವೆ ನಡೆಯುವ ಸ್ಪರ್ಧೆಯಾಗಿರುತ್ತದೆ ಎಂದು ಹೇಳಿಕೊಂಡಿದ್ದಾರೆ.

ಪ್ರಧಾನಿ ಮೋದಿ ಅವರು ನಾಯಕತ್ವ ಗುಣದಿಂದ ಬಿಜೆಪಿಗೆ ಸೇರ್ಪೆಡೆಯಾದೆನೆಂದು ಹೇಳಿದ್ದಾರೆ. ಮೋದಿ ಸದಾ ರಾಷ್ಟ್ರೀಯತೆ ಹಾಗೂ ರಾಷ್ಟ್ರದ ಭದ್ರತೆಗೆ ಆದ್ಯತೆ ನೀಡುತ್ತಾರೆ. ಭದ್ರತಾ ಪಡೆಯನ್ನು ಅತೀವವಾಗಿ ಗೌರವಿಸುತ್ತಾರೆ. ಈ ಕಾರಣದಿಂದ ಬಿಜೆಪಿ ಸೇರಿ ದೇಶಕ್ಕೆ ಸೇವೆ ಮಾಡುವ ಆಸೆ ಹೊಂದಿದ್ದೇನೆ ಎಂದಿದ್ದಾರೆ.

2014ರ ಚುನಾವಣೆಯಲ್ಲಿಯೂ ಅವರು ರಾಜಸ್ಥಾನದ ಸಿಕಾರ್​ನಿಂದ ಸ್ಪರ್ಧಿಸಿದ್ದರು. 2004ರಿಂದಲೂ ರಾಯ್​ಬರೇಲಿಯಲ್ಲಿ ಸೋನಿಯಾ ಪ್ರಾಬಲ್ಯ ಹೊಂದಿದ್ದಾರೆ. ಸೋನಿಯಾ ವಿರುದ್ಧ ಸ್ಪರ್ಧಿಸಬೇಕೆಂಬುದು ಈ ಮಾಜಿ ಯೋಧನ ಆಶಯವಾಗಿದೆ.