ದುಬೈನಲ್ಲಿ ಭೀಕರ ಬಸ್ ಅಪಘಾತ...8 ಭಾರತೀಯರು ಸೇರಿ 17 ಜನರ ದುರ್ಮರಣ !

ದುಬೈನಲ್ಲಿ ನಡೆದ ಬಸ್​ ಅಪಘಾತದಲ್ಲಿ 8 ಜನ ಭಾರತೀಯರು ಮರಣ ಹೊಂದಿದ್ದಾರೆ. ಭಾರತೀಯ ರಾಯಭಾರಿ ಕಚೇರಿ ಮೃತರ ಹೆಸರುಗಳನ್ನು ರಿವೀಲ್ ಮಾಡಿದೆ.

ದುಬೈ :ನಾಮಫಲಕದ ಕಂಬಕ್ಕೆ ಬಸ್​ ಡಿಕ್ಕಿ ಹೊಡೆದ ಪರಿಣಾಮ 8 ಜನ ಭಾರತೀಯರು ಸೇರಿದಂತೆ 17 ಪ್ರವಾಸಿಗರು ಸಾವನ್ನಪ್ಪಿರುವ ದುರ್ಘಟನೆ ಇಲ್ಲಿಯ ಮೆಟ್ರೋ ನಿಲ್ದಾಣದ ಬಳಿ ನಡೆದಿದೆ.

31 ಪ್ರವಾಸಿಗರನ್ನು ಹೊತ್ತು ಒಮನ್​ ನಿಂದ ದುಬೈಗೆ ತೆರಳುತ್ತಿದ್ದ ಬಸ್ ಶುಕ್ರವಾರ ಸಾಯಂಕಾಲ ಅಪಘಾತಕ್ಕಿಡಾಗಿದೆ ಎಂದು ದುಬೈನಲ್ಲಿರುವ ಭಾರತೀಯ ರಾಯಭಾರೀ ಕಚೇರಿ ತಿಳಿಸಿದೆ. ರಾಜಗೋಪಾಲ್​, ಫೈರೋಜ್​​ ಖಾನ್ ಪಠಾಣ್​, ರೇಷ್ಮಾ ಫೈರೋಜ್ ಖಾನ್ ಪಠಾಣ್​, ದೀಪಕ್ ಕುಮಾರ್​, ಜಮಾಲುದೀನ್ ಅರಕ್ಕವೀತಿಲ್, ಕಿರಣ್ ಜಾನಿ, ವಾಸುದೇವ್ ಹಾಗೂ ತಿಲಕರಾಮ್ ಜವಾಹರ್ ಮೃತ ದುರ್ದೈವಿಗಳು.

ಘಟನೆಯಲ್ಲಿ ಗಾಯಗೊಂಡವರನ್ನು ಅಲ್ಲಿಯ ರಶೀದ್ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಆಸ್ಪತ್ರೆಗಳ ಮೂಲಗಳ ಪ್ರಕಾರ 10 ಜನ ಭಾರತೀಯರು ಸಾವನ್ನಪ್ಪಿದ್ದಾರೆ ಎಂದು ತಿಳಿದು ಬಂದಿದೆ. ಮೃತರ ಪೈಕಿ ಆರು ಜನ ಕೇರಳದವರು ಎಂದು ತಿಳಿದು ಬಂದಿದೆ.