ಪೊಲೀಸರ ಮೇಲೆ ಹಲ್ಲೆ ನಡೆಸಿದ ಮರಳು ಮಾಫಿಯಾ ಗ್ಯಾಂಗ್​: ಚಾಲಕನಿಗೆ ಗಂಭೀರ ಗಾಯ

ಮರಳು ದಂಧೆ ತಡೆಯಲು ಹೋಗಿದ್ದ ತಂಡವೊಂದರ ಮೇಲೆ ದುಷ್ಕರ್ಮಿಗಳು ದಾಳಿ ನಡೆಸಿದ್ದು, ಓರ್ವ ಚಾಲಕ ಹಾಗೂ ಇಬ್ಬರು ಪೊಲೀಸ್ ಸಿಬ್ಬಂದಿಗೆ ಗಾಯಗಳಾಗಿವೆ.

ದೇವಾಸ್​ (ಮಧ್ಯಪ್ರದೇಶ): ಅಕ್ರಮ ಮರಳು ಮಾಫಿಯಾ ಮೇಲೆ ದಾಳಿ ನಡೆಸಿದ ವೇಳೆ ಕನ್ನೋಡ್ ಸಬ್​ ಡಿವಿಷನಲ್​ ಆಫೀಸಿನ ಚಾಲಕ ಹಾಗೂ ಇಬ್ಬರು ಪೊಲೀಸ್ ಸಿಬ್ಬಂದಿ ಮೇಲೆ ದುಷ್ಕರ್ಮಿಗಳು ಹಲ್ಲೆ ಮಾಡಿದ ಘಟನೆ ದೇವಾಸ್​​ನಲ್ಲಿ ನಡೆದಿದೆ.

ಘಟನೆಯಲ್ಲಿ ಚಾಲಕ ಹಿಮಾಂಶುಗೆ ತೀವ್ರ ಗಾಯಗಳಾಗಿದ್ದು, ಪೊಲೀಸ್ ಸಿಬ್ಬಂದಿಗೂ ಕೂಡಾ ಸಣ್ಣ ಪುಟ್ಟ ಗಾಯಗಳಾಗಿದ್ದು, ಸ್ಥಳೀಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ವೇಳೆ, ಎಸ್​ಡಿಒಪಿ ಬ್ರಿಜೇಶ್​ ಕುಶ್ವಾಹಾ ಅಪಾಯದಿಂದ ಪಾರಾಗಿದ್ದಾರೆ.

ಕನ್ನೋಡ್​ ಎಸ್​ಡಿಒಪಿ ಬ್ರಿಜೇಶ್​ ಕುಶ್ವಾಹ ನೇತೃತ್ವದಲ್ಲಿ ತಂಡವೊಂದು ದೇವಾಸ್ ಜಿಲ್ಲೆಯ ಸತ್ವಾಸ್​ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಮರಳು ದಂಧೆಯೊಂದನ್ನು ತಡೆಯಲು ಸ್ಥಳಕ್ಕೆ ಭೇಟಿ ನೀಡಿತ್ತು. ಈ ವೇಳೆ, ಪೊಲೀಸರ ಮೇಲೆ ಹಲ್ಲೆ ನಡೆಸಲಾಗಿದೆ.

ನಾವು ಹಲ್ಲೆ ಮಾಡಿದ ಐದು ಮಂದಿಯನ್ನು ಗುರುತಿಸಿದ್ದೇವೆ. ಎಲ್ಲರ ಮೇಲೆಯೂ ಎಫ್​ಐಆರ್ ದಾಖಲಾಗಿದೆ. ಅವರನ್ನು ಶೀಘ್ರವಾಗಿ ಬಂಧಿಸಲಾಗುತ್ತದೆ ಎಂದು ಅಡಿಷನಲ್​ ಎಸ್​​​​​​​ಪಿ ಸೂರ್ಯಕಾಂತ್​ ಶರ್ಮ ಸ್ಪಷ್ಟಪಡಿಸಿದ್ದಾರೆ.