સરીગામ પંચાયતના મહિલા સરપંચ પતિદેવ સાથે 50 હજારની લાંચ લેતા સપડાયા

વલસાડ: જિલ્લાના ઉમરગામ તાલુકાના સરીગામ ગ્રામ પંચાયતના મહિલા સરપંચ અને તેમના પતિ 50 હજારની લાંચ લેતા ACBના હાથે ઝડપાઇ જતા બંનેની ધરપકડ કરી આગળની કાર્યવાહી હાથ ધરી છે.

આ અંગે મળતી માહિતી મુજબ સરીગામમાં કન્સ્ટ્રકશનના ધંધા સાથે સંકળાયેલ મહિલા પાસે સરપંચે બાંધકામના ઠરાવની અવેજ પેટે 50 હજારની માંગણી કરી હતી. જે અંગે મહિલાએ ACBને જાણ કરતા ACBએ છટકું ગોઠવી સરપંચ દંપતીને ઝડપી પાડ્યા હતાં.

ACBએ જાગૃત મહિલા નાગરીકની ફરિયાદ આધારે શનિવારે આ છટકું ગોઠવ્યું હતું. જેમાં આરોપી સરીગામ ગ્રામ પંચાયતના સરપંચ હંસાબેન શૈલેષભાઇ કોભીયા અને પતિ શૈલેષભાઇ રમણભાઇ કોભીયા સરીગામ, બનપાડા, વઘાતફળીયા પાસે આ કામના ફરીયાદી બહેનને કંન્ટ્રકશનનો ધંધો કરતા હોય, સરીગામ ખાતે વાણિજ્ય બાંધકામ કરેલ જેના માટે ગ્રામ પંચાયતનાં ઠરાવની જરૂર હોવાથી સરીગામ ગ્રામ પંચાયત કચેરી ખાતે અરજી કરેલી હતી, ત્યારબાદ આરોપી મહિલા સરપંચનો સંપર્ક કરતાં સરપંચના પતિએ ફરીયાદી પાસેથી ઠરાવ ના અવેજ પેટે આરોપી મહિલા સરપંચના કહેવાથી 50,000 રૂપિયાની લાંચની માંગણી કરતાં ફરીયાદી આ લાંચની રકમ આપવા માંગતાં ન હોય, વલસાડ અને ડાંગ ACB પોલીસ સ્ટેશનનો સંપર્ક કરી ફરીયાદ આપી હતી.

ફરીયાદના આધારે ટ્રેપીંગ અધિકારી પી. ડી. બારોટ, PI, વલસાડ અને ડાંગ ACB પોલીસ સ્ટેશનની ટીમે સુપર વિઝન અધિકારી એન. પી. ગોહિલ, મદદનીશ નિયામક, ACB સુરત એકમ, સંયુક્ત ઉપક્રમે લાંચનું છટકુ ગોઠવતા સરીગા પંચાયતના સરપંચ હંસાબેન શૈલેષભાઇ કોભીયા અને તેમના પતિ શૈલેષભાઇ રમણભાઇ કોભીયા સરપંચ વતી લાંચની રકમ 50,000 રૂપિયા સ્વીકારતા સ્થળ પર પકડાઇ જતા ACB એ બંનેને વલસાડ ACB ઓફિસે લઇ જઇ આગળની વધુ તપાસ હાથ ધરી છે.