વડોદરાઃ ભાજપમાં આતંરિક વિખવાદ દિવસેને દિવસે વધી રહ્યો છે. જેથી એક પછી એક ધારાસભ્યો રાજીનામું આપી રહ્યાં છે, ત્યારે વાઘોડિયાના ધારાસભ્ય મધુ શ્રીવાસ્તવે રાજીનામાની ચિમકી આપતાં સ્થાનિક રાજકારણ ગરમાયું હતું. જે અંગે વાત કરતાં મધુ શ્રી વાસ્તવે જણાવ્યું છે કે, "તેમને પક્ષમાં કોઈ મતભેદ નથી. તેમને મહેસૂલ વિભાગના અધિકારીની બેદરકારી સામે વાંધો છે અને તેઓ રાજીનામું આપી રહ્યાં નથી."
મને પક્ષ સાથે નહીં પણ મહેસૂલ વિભાગના અધિકારી સામે વાંધો છેઃ મધુભાઈ શ્રીવાસ્તવ
સાવલીના ભાજપના ધારાસભ્ય કેતન ઈનામદારના કામ નહીં થતાં તેઓએ રાજીનામું આપી દીધું હતું. પક્ષના મોવડીઓની દોડધામ બેઠક બાદ કામો થશેની બાંહેધરી મળતાં કેતન ઈનામદારે રાજીનામુ પાછું ખેંચ્યું હતું, પરંતુ બાદમાં વાઘોડિયાના ધારાસભ્ય મધુ શ્રીવાસ્તવે તેમના વિસ્તારના કામો ન થતાં હોવાથી રાજીનામાંની ચીમકી આપી અધિકારીઓ સાંભળતા નહીં હોવાનું કહી નારાજગી દર્શાવી હતી.