વડોદરાઃ સરકારી સંસ્થાઓમાં ભ્રષ્ટાચારે માઝા મુકી છે. જ્યારે વડોદરા મહાનગર પાલિકામાં તો નાણા આપ્યા વગર કામગીરી તો થતી જ નથી એવું સ્થાનિકો જણાવી રહ્યા છે. સોમવારે ACBની ટીમે લાંચિયા કર્મચારીને પોતાની ફરજ અદા કરવા માટે લાંચ લેતા રંગેહાથ ઝડપી પાડ્યો હતો.
મળતી માહિતી અનુસાર વોર્ડ નંબર 12માં એક જાગૃત નાગરિક પાસે વહીવટી વોર્ડ નંબર 12ના ક્લાર્ક ગોપાલ રાણાએ વેરા પાવતી કાઢી આપવા માટે રૂપિયા ચાર હજારની માંગણી કરી હતી. આ નાગરિક નાણા આપવા ઈચ્છતો ન હોય, તેણે ACBનો સંપર્ક સાધ્યો હતો.
ACBએ સોમવાર સવારે મકરપુરા GIDC મુખ્ય માર્ગ પર પાણીની ટાંકી પાસેથી ગોપાલ રાણાને રૂપિયા 4000ની લાંચ પેટે સ્વીકારતા રંગે હાથે ઝડપી પાડ્યો હતો. હાલ ACB દ્વારા તેની ધરપકડ કરીને પુછપરછ હાથ ધરવામાં આવી છે.
