સામૂહિક આત્મહત્યા કેસ: 9 જેટલા જ્યોતિષીઓએ 32 લાખ રૂપિયા ખંખેર્યા

વડોદરાનાં સમા વિસ્તારમાં એક જ પરિવારના 6 સભ્યોએ આર્થિક ભીંસના કારણે કોલ્ડ્રિંક્સમાં ઝેરી દવા ગટગટાવી આત્મહત્યાનો પ્રયાસ કર્યો હતો. 32 લાખથી પણ વધુનું દેવું કરી નાખતા પરિવારના સભ્યોને આત્મહત્યા કરવાની ફરજ પડી હતી. 3 વર્ષનો માસૂમ બાળકને પણ ઝેરી દવા પીવડાવી હતી.

• આત્મહત્યાના પ્રયાસમાં ત્રણ સભ્યોના મોત અને ત્રણ સભ્યોનો બચાવ
• જ્યોતિષ પર હત્યાનો ગુનો દાખલ કરવાની પોલીસની તજવીજ હાથ ધરી
• મારા પિતાએ દેવું કરતા અમારે આત્મહત્યા કરવાની ફરજ પડી: નરેન્દ્રનો પુત્ર

વડોદરા: શહેરના સમા વિસ્તારમાં એક જ પરિવારના 6 સભ્યોએ આર્થિક ભીંસના કારણે કોલ્ડ્રિંક્સમાં ઝેરી દવા ગટગટાવી આત્મહત્યાનો પ્રયાસ કર્યો હતો. તેમાં પરિવારના ત્રણ સભ્યોનું મોત થયું હતું અને ત્રણ સભ્યોનો આબાદ બચાવ થયો હતો. નરેન્દ્ર સોનીને લાખોનું દેવું વધી જતા પરિવારને આત્મહત્યા કરવાની ફરજ પડી હતી. 32 લાખ રૂપિયા માત્ર અંધશ્રદ્ધા અને મોજશોખમાં નરેન્દ્ર સોનીના પરિવારે વાપર્યા હતા.

અંધશ્રદ્ધાએ લીધો પરિવારના 6 માંથી 3 સભ્યોનો જીવ

આર્થિક ભીંસના કારણે આત્મહત્યાનો પ્રયાસ

શહેરના સમા વિસ્તારમાં સ્વાતિ સોસાયટીમાં રહેતા નરેન્દ્ર સોનીના પરિવારના ત્રણ સભ્યોનું આજે પોસ્ટમોર્ટમ બાદ અગ્નિસંસ્કાર કરવામાં આવ્યું હતું. જ્યારે, પરિવારના ત્રણ સભ્યો હોસ્પિટલમાં સારવાર હેઠળ છે. પોલીસ દ્વારા નરેન્દ્ર સોનીના પુત્ર ભાવિન સોનીનું નિવેદન લેવામાં આવ્યું હતું. ભાવિન સોનીએ જણાવ્યું હતું કે, મારા પિતાએ લાખોનું દેવું કરી નાખતા અમારે આત્મહત્યા કરવાની ફરજ પડી હતી. 43 લાખ રૂપિયામાંથી 32 લાખ રૂપિયા મારા પિતા નરેન્દ્ર સોનીએ અંધશ્રદ્ધા અને ફરવામાં વાપરી નાખ્યા હતા. મારા પિતા નરેન્દ્ર સોની C/18 નંબરનું મકાન 23 લાખમાં વેચી નાખ્યું હતું. સંજય મિસ્ત્રી પાસેથી 7 લાખ રૂપિયા બાનાખત તરીકે લીધા હતા અને બીજા 18 લાખ થોડા સમયની અંદર લીધા હતા. ત્યારે, મારા પિતાએ મકાન પર 20 લાખ રૂપિયાની લોન લીધી અને સંજય મિસ્ત્રીને મકાન પણ આપ્યું ન હતું.

આ પણ વાંચો:વડોદરામાં સોની પરિવારના સામૂહિક આત્મહત્યા કેસમાં 3 લોકોની હાલત અત્યંત ગંભીર

નરેન્દ્ર સોની મકાન વેચવાં જતા જ્યોતિષના ચક્કરમાં પડ્યા

નરેન્દ્ર સોની 40 લાખ રૂપિયામાં મકાન વેચવા માટે લોકોનો સંપર્ક કરતો હતો. ત્યારબાદ, એક જ્યોતિષના સંપર્કમાં આવતા તેમણે વાસ્તુ દોષ વિધિના નામે નરેન્દ્ર સોની પાસેથી 32 લાખ રૂપિયા ખંખેર્યા હતા. નરેન્દ્ર સોનીએ લાખો રૂપિયા વડોદરા અને અમદાવાદના જ્યોતિષની પાછળ ખર્ચ્યાં હતા. ત્યારે, પોલીસે હાલ જ્યોતિષ વિરુદ્ધ ગુનો દાખલ કર્યો છે.

આ પણ વાંચો:વડોદરામાં લગ્ન દરમિયાન કન્યાનું મોત નીપજ્યુ

ઘરના મોભીએ જ આત્મહત્યાનો પ્લાન બનાવ્યો

નરેન્દ્ર સોનીના માથે લાખો રૂપિયાનું દેવું હતું. આથી, આત્મહત્યાનાં આગલા દિવસે એટલે મંગળવારની રાત્રે જ નરેન્દ્ર સોનીએ પરિવારને વિશ્વાસમાં લઈને આત્મહત્યાનો પ્લાન બનાવ્યો હતો અને ચાર પાનાની સુસાઈડ નોટ પણ લખી હતી. બુધવારે બપોરે નરેન્દ્ર માર્કેટમાંથી ઝેરી દવા લઈને આવ્યો હતો અને પરિવારના સભ્યો જાણતા હતા કે તેઓ કોલ્ડ્રીંક્સની અંદર ઝેરી દવા પીને આત્મહત્યા કરી રહ્યા છે. માત્ર 3 વર્ષનો માસૂમ પૌત્ર નહોંતો જાણતો કે કોલ્ડ્રીંક્સમાં ઝેર છે. ભાવિન સોનીએ પોલીસ સમક્ષ લખાવ્યું હતું કે, અમારુ આત્મહત્યાનું કારણ મારા પિતા નરેન્દ્ર સોની છે અને એમને જ્યોતિષ અને અંધશ્રદ્ધામાં અમને ઘરબાર વગરના કરી નાખ્યા હતા. ઉલ્લેખનીય છે કે, અંધશ્રદ્ધા કારણે નરેન્દ્ર સોની, રીયા સોની અને પાર્થ સોનીનું મૃત્યુ થયું હતું. જ્યારે દીપ્તિ સોની ,ઊર્મિ સોની અને ભાવિન સોની હાલ સયાજી હોસ્પિટલમાં સારવાર હેઠળ છે.