વાપી : છીરીમાં રહેતા દેવેન્દ્રભાઇ માલીની કરિયાણાની દુકાનમાં ત્રાટકેલા તસ્કરોએ દુકાનનો દરવાજો તોડી 50 હજાર રૂપિયાની ચોરી કરી હતી. ચોરી કરનાર ઈસમો CCTVમાં કેદ થયા છે. જે આધારે 3 ચોરને ઝડપી પાડવા પોલીસે તપાસ હાથ ધરી છે.
દુકાન માલિક પહોંચે તે પહેલાં તસ્કરો ફરાર
છીરીમાં રહેતા દેવેન્દ્રભાઇ કરિયાણાની દુકાન રાબેતા મુજબ બંધ કરી ઉપર મકાનમાં જતા રહ્યા હતા. દુકાનના દરવાજામાં સેન્સર લગાવ્યા હોવાથી મોડી રાત્રે 3 વાગ્યાની આસપાસ પાછળનો દરવાજો તૂટતા તેમને મોબાઇલ ઉપર ફોન આવ્યો હતો. જેથી તાત્કાલિક દુકાને પહોંચ્યા હતાં. પરંતુ તે પહોંચે તે પહેલા તસ્કરો ત્યાંથી ફરાર થઇ ગયા હતા.
દુકાનમાં લગાવેલા CCTV કેમેરામાં તપાસ કરતા ત્રણ તસ્કરો ચોરી કરતા નજરે પડ્યા હતા. જેની 100 નંબર ઉપર જાણ કરાઇ હતી. ગલ્લામાંથી રૂ.50,000ની ચોરી થયા હોવાનું દુકાનદારે જણાવ્યું હતું.