વડોદરાઃ ડભોઇ નગરમાં દિવસેને દિવસે કોરોના સંક્રમણ કેસ વધી રહ્યાં છે. તેની સાથે મૃત્યુઆંકમાં પણ વધારો થઈ રહ્યો છે. જેથી તાલુકામાં ચાલતી આરોગ્યલક્ષી સ્થિતી વિશે માહિતી મેળવવા માટે જિલ્લા કલેકટર શાલીનીબેન અગ્રવાલે ડભોઇ નગરની મુલાકાત લીધી હતી. સાથે જ તલાવપુરા, કડીયાવાડ સહિતના પાંચ વિસ્તારોની મુલાકાત લઈને આરોગ્ય ટીમની કામગીરીની સમીક્ષા કરી હતી.
આરોગ્યલક્ષી સમીક્ષા કરવા જિલ્લા કલેક્ટર ડભોઈ પહોંચ્યા રોગપ્રતિકારક શક્તિ વધારવાની દવાઓ તેમજ આયુર્વેદિક ઉકાડો હિતાવહ છે કે નહીં, તેમજ લોકો સુધી દવાઓ પહોંચે છે કે નહીં તેની સમીક્ષા કરવા માટે આજ રોજ ડભોઇ ખાતે જિલ્લા કલેકટર શાલિનીબેન અગ્રવાલે મુલાકાત લીધી હતી. જ્યાં તેમણે ડભોઇના ગીચ વિસ્તાર ગણાતા કડીયાવાડ તલાવપુરા અને સોસાયટી વિસ્તારોની મુલાકાત લીધી હતી. આ દરમિયાન કલેક્ટરની સાથે પ્રાંત અધિકારી હિમાંશુભાઈ પરીખ, મામલતદાર જે.એન.પટેલ, નગર આગેવાન વકીલ અશ્વિનભાઈ પટેલ, ડો.ગુડિયા રાણી , પી.આઈ. જે.એમ. વાઘેલા સહિતના અધિકારીઓએ પણ વિસ્તારોની મુલાકાત લીધી હતી.
ડભોઈ નગરમાં કોરોના સંક્રમણ અટકાવા માટે જરૂરી નિર્ણયો લઈને નગરને સુરક્ષિત કરવાના હેતુ કલેકટરે સમીક્ષા બેઠક કરી હતી. જેમાં તેમણે કોરોના નિદાનની સારવાર અને દવાઓ સહિતની બાબતો વિશેની જાણકારી મેળવી હતી.
