સુરેન્દ્રનગરઃ જિલ્લાના આસુન્દ્રાળી ગામે ઉપસરપંચના પત્ની અને ભાણેજને કોરોના થતા આસુન્દ્રાળી અને ભવાનીગઢમાં ખેતીવાડી અને પશુપાલનનો વ્યવસાય કરીને ગુજરાન ચલાવતા આ ગામની 1100ની વસ્તી ધરાવતા ગામમાંથી 700 લોકો કોરોના સંક્રમણ અને ક્વોરેન્ટાઇન થવાની બીકે પોતાના ઘર છોડીને વાડીમાં રહેવા માટે જતા રહ્યા છે.
આ બંને પોઝિટિવ દર્દીને સારવાર માટે સુરેન્દ્રનગરની હૉસ્પિટલમાં ખસેડવામાં આવ્યા છે. કાયમ પશુ અને ખેતીવાડીનો વ્યવસાય કરતા ગ્રામજનો પોતાના પરિવાર સાથે સીમમાં વાડી વિસ્તારમાં જતા રહ્યા છે. વાડીમાં ખુલ્લા વાતાવરણમાં કામ કરવા ટેવાયેલા ગામના લોકોને ઘરમાં રહેવુ તે જેલ જેવુ લાગી રહ્યું છે. છતા જાગૃતતા દાખવીને નિયમોનું પાલન કરી રહ્યા છે. જે લોકો ઘર છોડીને સીમમાં ગયા છે તેઓ હાલતો પોતાના ઘરમાં રહેલી જીવન જરૂરિયાતની ચીજ વસ્તુઓ લઇ ગયા છે. અંદાજે તેમની પાસે 5થી 10 દિવસ ચાલે તેટલી જીવન જરૂરિયાતની મહત્વની વસ્તુઓ લઈ ગયા છે.