સુરતના મગદલ્લામાં ત્યાંના લોકો દ્વારા વિસામો બનાવવામાં આવી રહ્યો હતો, પરંતુ તેની જાણ મનપાના અધિકારીઓને થઈ જતા ઘટના સ્થળે પહોંચ્યા હતા અને ડિમોલિશનની કામગીરી હાથ ધરવામાં આવી હતી. જેના કારણે અહીંના સ્થાનીકો રોષે ભરાયા હતા. ગત 11 તારીખે બનેલી આ ઘટનાનો એક વીડિયો પણ વાયરલ થયો છે.
લોકોના જણાવ્યા અનુસાર ગામમાં વિસામો બનાવવા માટે અનેક રજૂઆતો કરવામાં આવી છે. પરંતુ, એક પણ ધારાસભ્ય કે મનપના અધિકારીઓ દ્વારા તેઓની સાંભળવામાં આવી નથી અને વિસામો બાનાવ્યો તો મનપાના અધિકારીઓ તોડવા આવી પહોંચ્યા હતા. લોકોએ આ મામલે હોબાળો મચાવ્યો હતો. જેથી, ત્યાં ધારાસભ્ય ઝંખના પટેલ પણ આવી પહોંચ્યા હતા અને તેનો મહિલાઓએ ઘેરાવ કર્યો હતો અને ઝંખના પટેલને આડેહાથ લીધી હતી. વીડિયોમાં મહિલાઓ ધારાસભ્યને આડેહાથ લેતા સ્પષ્ટ જોઈ શકાય છે. આ ઉપરાંત તેઓની સમસ્યાનું નિરાકરણ નહીં આવે તો મતદાન નહીં કરવાની પણ ચીમકી સ્થાનિકોએ ઉચ્ચારી હતી.