દસ્તાન ગામની શાળાએ બ્લેક બોર્ડની કહ્યુ અલવિદા, ડિજિટલ સ્ક્રિન પર મેળવે છે શિક્ષણ

સુરતઃ પલસાણા તાલુકાના દસ્તાન ગામે આવેલી પ્રાથમિક શાળાને ડિજિટલ લુક આપવામાં આવ્યો છે. જેમાં થ્રી ડી ઇફેક્ટથી બાળકોને અભ્યાસ કરવામાં આવે છે. અભ્યાસક્રમને ડિજિટલ ટેક્સ બુકમાં ઢાળવામાં આવ્યો છે. થ્રી ડી ચશ્માં પહેરી બાળકો અભ્યાસ કરી રહ્યા છે. ખાનગી શાળાને શરમાવે તે રીતે જિલ્લા પંચાયત સંચાલીત પ્રાથમિક શાળામાં અભ્યાસ કરાવામાં આવી રહ્યો છે.

દેશ ભરમાં હાલ ડિજિટલ ઇન્ડિયાની વાતો થઈ રહી છે. વડાપ્રધાન પણ ડિઝિટલ ઈન્ડિયા ઉપર ભાર મુકી રહ્યા છે. સુરત જિલ્લાની સરકારી શાળાએ વડાપ્રધાનને પહેલને અમલી બનાવી છે. દક્ષિણ ગુજરાતના સુરત જિલ્લાની એક એવી પ્રાથમિક શાળા કે જેમાં ગરીબ વર્ગના વિદ્યાર્થીઓ ડિજિટલ રીતે અભ્યાસ કરી રહ્યા છે. પલસાણા તાલુકાના દસ્તાન ગામે આવેલી આ પ્રાથમિક શાળા.બાળકોને ટેકનોલોજી સાથે જોડવા આચાર્ય દ્વારા ડિજિટલ ટેકસબુક બનાવવામાં આવી છે. તેમજ વિવિધ પ્રકારની ટેકનોલોજી સાથે સરળતાથી અભ્યાસ કરાવામાં આવી રહ્યો છે. નાના બાળકોને દ્રશ્ય અને શ્રાવ્ય એમ બંને રીતે અભ્યાસ કરાવાય તો તેઓ સારી રીતે અભ્યાસ કરી શકે છે. વિદ્યાર્થીઓની અનુકૂળતા માટે બ્લેક બોર્ડને બદલે ડિજિટલ બોર્ડ મુકવામાં આવ્યા છે. જેના દ્વારા વિદ્યાર્થીઓને માર્ગદર્શન આપવામાં આવી રહ્યું છે.

સામાન્ય રીતે બાળકોમાં ગણિત અને સામાજિક વિજ્ઞાન જેવા જટિલ વિષયોમાં પણ શિક્ષકો એ રસ્તો શોધી કાઢ્યો છે. જેમાં વિદ્યાર્થીઓને થ્રી ડી ઇફેક્ટમાં જીવંત શિક્ષણ આપવામાં આવે છે. શાળાના આચાર્ય દ્વારા બાળકો માટે થ્રિડી ચશ્માં લેવામાં આવ્યા છે. જેના દ્વારા વિદ્યાર્થીઓ ને ખૂટતી તમામ વિગતો પણ મળે છે. શિક્ષકોને સમયસર અભ્યાસ ક્રમ પણ પૂરો કરવામાં સરળતા રહે છે. શાળા સંચાલકોના આ પ્રયોગથી વિદ્યાર્થીઓનું પરિણામ પણ સુધર્યું છે.