રાજકોટમાં GPSCની વર્ગ-2 RFOની પરીક્ષામાં 30 ટકા વિદ્યાર્થીઓ જ હાજર

રાજ્યભરમાં આજે GPSCની વર્ગ-2ની વન અધિકારી (RFO)ની પરીક્ષા યોજાઇ હતી. ત્યારે આ પરીક્ષા માટે રાજકોટ વહીવટી તંત્ર દ્વારા 54 જેટલા પરીક્ષા કેન્દ્રો ફાળવવામાં આવ્યા છે. જ્યારે પરીક્ષા માટે ઉમેદવારોની માત્ર 28થી 30 ટકા જેટલી જ હાજરી જોવા મળી રહી છે.

• આજે GPSC વર્ગ-2ના વન અધિકારી (RFO)ની પરીક્ષા
• રાજકોટમાં 54 પરીક્ષા કેન્દ્રો ઉપર આ પરીક્ષા યોજાઈ રહી
• માત્ર 3,454 વિદ્યાર્થીઓ જ પરીક્ષા આપી રહ્યા

રાજકોટ :જિલ્લામાં GPSC વર્ગ-2ના વન અધિકારી (RFO)ની પરીક્ષા યોજાઈ છે. જેને લઇને રાજકોટ જિલ્લા શિક્ષણ અધિકારી બી. એસ. કૈલાએ ETV Bharatને જણાવ્યું હતું કે, રાજકોટમાં કુલ 54 જેટલા પરીક્ષા કેન્દ્રો ઉપર આ પરીક્ષા યોજાઈ રહી છે.

28થી 30 ટકા જ વિદ્યાર્થીઓની હાજરી જોવા મળી

12 હજાર કરતા વધુ ઉમેદવારો નોંધાયા હતા. પરંતુ હાલ માત્ર 3,454 વિદ્યાર્થીઓ જ પરીક્ષા આપી રહ્યા છે. જ્યારે 28થી 30 ટકા જ વિદ્યાર્થીઓની હાજરી જોવા મળી રહી છે. આ પરીક્ષા દરમિયાન 8 હજાર કરતા વધુ વિદ્યાર્થીઓ ગેરહાજર નોંધાયા છે. ત્યારે શાંતિપૂર્ણ વાતાવરણમાં હાલ આ પરીક્ષા રાજકોટમાં યોજાઇ રહી છે.

સૌરાષ્ટ્રના 7 જિલ્લાના વિદ્યાર્થીઓએ પરીક્ષા આપવા રાજકોટ આવ્યા

GPSCની પરીક્ષા માટે રાજ્યમાં કુલ 8 જિલ્લાઓમાં કેન્દ્રો ગોઠવવામાં આવ્યા છે. જેમાં સૌરાષ્ટ્રની વાત કરવામાં આવે તો સૌરાષ્ટ્રમાં ભાવનગર અને રાજકોટએ બે જિલ્લામાં જ આ પરીક્ષા યોજાઈ રહી છે. જેને લઈને સૌરાષ્ટ્રના 7 જેટલા જિલ્લાઓના વિદ્યાર્થીઓએ પરીક્ષા આપવા માટે રાજકોટ કેન્દ્ર ખાતે આવ્યા છે.

54 જેટલા કેન્દ્રોને પહેલાથી જ સેનેટાઈઝર કરવામાં આવ્યા

જ્યારે દૂર-દૂરથી આવેલા વિદ્યાર્થીઓનું હિત જળવાય રહે તે માટે વહીવટીતંત્ર દ્વારા રાજકોટમાં ઉભા કરવામાં આવેલા 54 જેટલા કેન્દ્રોને પહેલાથી જ સેનેટાઈઝર કરવામાં આવ્યા છે. પરીક્ષા કેન્દ્રો પર કડક સૂચના પણ આપવામાં આવી છે કે, માસ્ક, સોશિયલ ડિસ્ટન્સ અને સેનેટાઇઝર એમ કોરોનાની ગાઇડ લાઇનનું ચુસ્તપણે પાલન કરવામાં આવે.