ઘરમાં બાળકનાં એક સ્મિતથી પરિવારજનો ખુશ ખુશાલ થઇ જતા હોય છે. હસતા બાળકને જોઇને કોઇપણ માતા-પિતા પોતાના દુ:ખ દર્દ ભુલી જતા હોય છે. રમતા બાળકને હાથમાં લેતા જ કોઇપણ પિતાનો નોકરીનો થાક ક્ષણ ભરમાં ગાયબ થઇ જતો હોય છે. પણ જ્યારે બાળક જન્મજાત કોઇ તકલીફ ધરાવતું હોય ત્યારે પરિવારજનો આર્થિક માનસિક તકલીફમાં ધકેલાઇ જતા હોય છે.
પોરબંદરમાં ખાપટ ગામે રહેતા શ્રમજીવી ખોળીયાભાઇ પિતા બનતાની સાથે જ પોતાની જિંદગીની સૈાથી આનંદની ક્ષણ માણીને પુત્રને મળવા જાય ત્યારે ડોકટર કહે છે કે, તમારા પુત્રનો હોઠ સહેજ ફાટેલો છે, જેને તબીબી ભાષામાં ક્લેફ્ટ લીપ કહે છે. આ સાંભળતા જ ખોળીયાભાઇનો આનંદ ઉત્સાહ છીનવાઇ જાય છે અને તે ચિંતાતુર થઇ જાય છે. ત્યારે ડોકટર તેમને આશ્વાસન આપે છે કે, બાળક છ મહિનાનું થશે ત્યારે તેમનું સફળ ઓપરેશન થઇ શકશે.
ત્યારે રાષ્ટ્રીય બાળ સ્વાસ્થ્ય કાર્યક્રમ અંતર્ગત (RBSK) હેઠળ કામ કરતા તબીબી દંપતિ હિતેષભાઇ કરગટીયા તથા તેમના પત્નિ દિવ્યાબેન મોકરીયા અને ફિમેલ હેલ્થ વર્કર રેખાબેન વાસણ ખોળીયાભાઇના ઘરની મુલાકાતે આવી ને કહે છે કે, RBSKનો મુખ્ય ઉદેશ્ય જ જન્મજાત ખોટ ખાંપણ ધરાવતા બાળકની ખોટ દૂર કરી તેમને સામાન્ય બાળકની જેમ હસતો કરવાનો છે.