પાકિસ્તાન સરકાર દ્વારા ચાર તબક્કે 360 જેટલા ભારતીય માછીમારોને છોડવામાં આવતા માછીમારોમાં ખુશીની લહેર છવાઈ છે તો આ મુક્ત થયેલા માછીમારોમાં પાંચ માછીમારો પોરબંદરના છે જેઓ 16 મહિના બાદ પાકિસ્તાનથી પરત ફરતા પરિવારમાં હરખના આંસુ છવાયા છે.
પોરબંદરના શામજી લાલજી પાંજરી, વેલજી બાબુ ટોડરમલ, અશોક બાબુ જુંગી, હરજી માવજી મોતીવરસ અને ડાયા હરીને પાકિસ્તાન સરકારે મુક્ત કરતા તેઓએ પોરબંદરમાં પરિવાર અને મિત્રો સાથે મળી ખુશીની લાગણી અનુભવી હતી.
પોરબંદરના વેલજીભાઈએ જણાવ્યું હતું કે તેઓને એક જ બેરેકમાં 100 જેટલા લોકોને સાથે રાખવામાં આવતા. જમવામાં પાંચ રોટલી અને તેલ વિનાનું શાક જેમાં મોટા ભાગે મગ કે અડદની દાળ આપવામાં આવતી હતી તો ત્યાં કોઈ પણ પ્રકારના સમાચાર કે ટીવી જોવાની પણ મનાઈ હતી. હવે ભારત આવ્યા બાદ ખુશી થાય છે.
જ્યારે શામજી લાલજી પાંજરી એ જણાવ્યું હતું કે તેઓને પરિવારની ચિઠ્ઠી મળતી ત્યારે દેશમાં શું ચાલે છે તેની જાણકારી મળતી સર્જીકલ સ્ટ્રાઈક વખતે તમામ કેદિઓને એક જ બેરેકમાં પૂરી દેવાયા હતા ત્યારે કઈક અજુગતું થયાનો અહેસાસ થયો હતો. જ્યારે પાકિસ્તાની સંસ્થાએ પરત આવતા સમયે મદદ કરી હતી અને 5000 રૂપિયા આપ્યા હતા અને બાળકોને માટે કપડા આપ્યા હતા પરંતુ માછીમારોને ભારતના તિરંગાના કલર કેસરી સફેદ અને લીલા કલરના ચપ્પલ પણ કોઈએ આપ્યા છે જેનો ભારત પાકિસ્તાન પીસ ફોરમ એન્ડ ડેમોક્રેસી સંસ્થાએ વિરોધ વ્યક્ત કર્યો હતો.
ઇન્ડિયા પાકિસ્તાન પીસ ફોરમ એન્ડ ડેમોક્રેસીના સભ્ય જીવનભાઈ જુંગીએ જણાવ્યું હતું કે ભારતના ત્રિરંગા રંગના ચપ્પલ આપી પાકિસ્તાન શું કહેવા માગે છે ? ભારતને પગ નીચે રાખવા માંગે છે એવો સ્પષ્ટ સંદેશો જણાઇ રહ્યો છે આ બાબતનો તેમણે ઈટીવીના માધ્યમથી સખ્ત વિરોધ કર્યો હતો.
