પોરબંદરમાં પણ જગતના નાથ જગન્નાથની રથયાત્રાનું આયોજન

પોરબંદરઃ અષાઢી બીજના દિવસે જગન્નાથ પુરી તથા અમદાવાદમાં જગતના નાથ જગન્નાથની રથયાત્રાનું આયોજન કરવામાં આવે છે. સાથે જ અષાઢી બીજના દિવસે પોરબંદરમાં સુદામા ચોકમાં આવેલ જગન્નાથના મંદિરેથી પણ ભગવાન જગન્નાથની ભવ્ય રથયાત્રાનું આયોજન દર વર્ષ મુજબ આ વર્ષે પણ કરવામાં આવ્યું છે. જેની હાલ તૈયારીઓ ચાલી રહી છે. આ રથયાત્રામાં અષાઢી બીજના દિવસે મોટી સંખ્યામાં ભક્તજનો અને સંતો-મહંતો જોડાય છે.

દર વર્ષની જેમ આ વર્ષે પણ સુદામા ચોકમાં આવેલા જગન્નાથ મંદિરમાંથી અષાઢી બીજના રોજ બપોરે 3:00 કલાકે જગન્નાથ પ્રભુ મામાના ઘરેથી પરત ફરતા નગરચર્યા કરવા નીકળશે. આ યાત્રા જગન્નાથ મંદિરેથી શરૂ કરી અને માણેકચોક જીલ્લા જોક અને હનુમાન ગુફા થઈ નીજ મંદિરે પરત ફરશે રથયાત્રામાં ભક્તજનોને ચણાનો પ્રસાદ પણ આપવામાં આવે છે.

આ શોભાયાત્રાનું અનેરૂ મહત્વ છે. આ રથયાત્રામાં સૌ ભક્તો ભક્તિમાં લિન થઈ જગન્નાથનો જય જય કાર કરે છે અને પ્રભુ જગન્નાથના દર્શનાર્થે રસ્તા પર પણ લોકો રાહ જોતા હોય છે. અષાઢી બીજના દિવસે યોજાતી આ રથ યાત્રામાં જોડાવવું પણ એક લ્હાવો છે.