પોરબંદરમાં ભાજપ દ્વારા ગાંધી સંકલ્પ યાત્રા યોજાઈ

પોરબંદર: શહેરમાં ગાંધી 150 જન્મજયંતિના ભાગ રૂપે ગાંધી સંકલ્પ યાત્રા કાઢવામાં આવી હતી. ભાજપ દ્વારા શરૂ કરવામાં આવેલી આ સંકલ્પ યાત્રાનો પ્રારંભ સાંસદ રમેશભાઈ ધડુકના હસ્તે કરવામાં આવ્યો હતો. યાત્રા કીર્તિ મંદિરથી પોરબંદરના વિવિધ વિસ્તારોમાં ફરી હતી. જેમાં ગાંધી વિચારો સાથે સ્વચ્છતાનો સંદેશ ફેલાવવા કાર્યકર્તાઓ મોટી સંખ્યામાં જોડાયા હતા.

વડાપ્રધાન નરેન્દ્ર મોદીના પ્રકલ્પ સાથે ગાંધીજીની 150મી જન્મજયંતિની ઉજવણીના ભાગરૂપે પોરબંદર ભાજપ દ્વારા ગાંધી સંકલ્પ યાત્રા યોજાઈ હતી. સંકલ્પ યાત્રાનો પ્રારંભ સાંસદ રમેશભાઈ ધડુકના હસ્તે શહેરના કીર્તિ મંદિરથી કરવામાં આવ્યો હતો. જેમાં ધારાસભ્ય બાબુભાઈ બોખીરીયા, પૂર્વ પ્રધાન ચીમનભાઈ સાપરિયા, જિલ્લા પ્રમુખ, તાલુકા પ્રમુખ સહિત કાર્યકર્તાઓ અને વિદ્યાર્થીઓ મોટી સંખ્યામાં જોડાયા હતા.

આ યાત્રા દરમિયાન સાંસદ રમેશભાઈ ધડુકે લોકોને જીવનમાં ગાંધીજીના સ્વચ્છતાના સંકલ્પને સાકાર કરવા તથા સ્વચ્છતા જાળવવા અંગે જણાવ્યું હતું. આ ઉપરાંત સાંસદે લોકોને સ્વચ્છ પોરબંદર બનાવવાની અપીલ કરી હતી.