પાટણ HNG યુનીવર્સિટી દ્વારા ખેડૂતોને વળતર ન ચૂકવાતા મિલકત જપ્ત કરવા કોર્ટનો હુકમ

હેમચંદ્રાચાર્ય ઉત્તર ગુજરાત યુનિવર્સિટી કેમ્પસ માટે સંપાદન કરાયેલી જમીનમાં વળતરથી બાકી રહી ગયેલા 25 અરજદારોને 14 કરોડ 6 લાખ રૂપિયા વળતરની ચુકવણી 25 વર્ષથી કરાઇ નથી. 2019માં  કોર્ટે હુકમ કર્યા પછી પણ વળતર ન ચૂકવાતાં મિલકત જપ્તી માટે કરાયેલી અરજીને કોર્ટે માન્ય રાખી હતી. સરકાર અને પછી યુનિવર્સિટીની જંગમ મિલકતો જપ્ત કરવા પાટણની સિવિલ કોર્ટે હુકમ કર્યો હતો. જોકે કોર્ટે તેના આ હુકમને હાઇકોર્ટમાં પડકારવા માટે એક મહિનાનો સમય આપ્યો છે અને ત્યાં સુધી આ હુકમનો અમલ મોકૂફ રાખ્યો હતો.

● યુનિવર્સિટી બનાવવા જમીન આપનાર ખેડૂતોને 25 વર્ષે પણ વળતર મળ્યું નથી
● કોર્ટના ચુકાદા બાદ પણ ખેડૂતો ૧૭ કરોડથી વધુના વળતરથી વંચિત રહ્યા
● 25 ખેડૂતોએ વળતર માટે કોર્ટમાં કરી હતી અરજી
● કોર્ટે પહેલા સરકાર અને બાદમાં યુનિવર્સિટીની મિલકતો જપ્ત કરવા હુકમ કર્યો

પાટણ: યુનિવર્સિટી કેમ્પસ બનાવવા માટે 12 એપ્રિલ 1987ના રોજ જમીન સંપાદનનું જાહેરનામું પ્રસિદ્ધ થયું હતું, જેમાં 80 જેટલા ખેડૂતોની કુલ 171 એકર જમીન સંપાદન કરવામાં આવી હતી. ત્યારબાદ અલગ અલગ ગ્રુપમાં જમીનધારકો દ્વારા વળતર મેળવવા કવાયત હાથ ધરી હતી. છેલ્લે ૨૫ જેટલા ખેડૂતોએ સુપ્રીમ કોર્ટમાં વધુ વળતર માટે અરજી કરી હતી. જોકે તેમની અરજી સમયમર્યાદાના વિલંબને કારણે નામંજૂર કરી હતી.

આ પણ વાંચો:HNG યુનિવર્સિટીના પૂર્વ કુલપતિનું નિધન

કોર્ટે કર્યો હતો યુનિવર્સિટીની મિલકતો જપ્ત કરવાનો આદેશ

25 ખેડૂતોના ગ્રુપને પ્રતિ ચોરસ મીટર રૂપિયા 100 પ્રમાણે વળતર આપવાનો ઓર્ડર વર્ષ 2015માં કર્યો હતો. ત્યારબાદ આ ખેડૂતોએ પાટણ સિવિલ કોર્ટમાં 100ની ગણતરી કરીને મેળવવા માટે અરજી કરતા 30 નવેમ્બર 2019ના રોજ વ્યાજ અને મળવાપાત્ર લાભ સાથે કુલ 17,06,24,704 નું વળતર દસ દિવસમાં ચૂકવવા હુકમ કર્યો હતો. પણ રકમ ન ચૂકવાતાં જમીન સંપાદન અધિકારી અને નાયબ કલેકટર અને રજીસ્ટ્રાર યુનિવર્સિટી સામે મિલકત જપ્તી વોરંટ કાઢવા અરજી કરાઈ હતી. આ કેસ પાટણના સિવિલ જજ મનોજ એસ.દવે સમક્ષ ચાલી જતાં કોર્ટે પોતાના ચુકાદામાં પાટણ યુનિવર્સિટીના જમીનધારકોને વળતર ચૂકવવામાં વિલંબ થતો હોવાથી સરકાર અને યુનિવર્સિટી બંનેને જવાબદાર ઠેરવીને પહેલા સરકારની મિલકતો અને બાદમાં જરૂર પડે તો યુનિવર્સિટીની મિલકતો જપ્ત કરવાનો આદેશ કર્યો હતો.

આ પણ વાંચો: હેમચંદ્રાચાર્ય ઉત્તર ગુજરાત યુનિવર્સિટીના બે કારોબારી સભ્યોની ચૂંટણી માટે જાહેરનામું પ્રસિદ્ધ કરાયુ

HNG યુનીવર્સિટી, પાટણ

વળતર ચૂકવવામાં સરકાર અને યુનિવર્સિટી એકબીજા ઉપર કરી રહ્યા છે દોષારોપણ

પાટણની ઉત્તર ગુજરાત યુનિવર્સિટીના નિર્માણ બાદથી અવનવા વિવાદોમાં સપડાયેલી રહે છે, ત્યારે છેલ્લા 25 વર્ષથી યુનિવર્સિટીને જમીન આપનાર 25 જેટલા ખેડૂત આજે પણ રૂપિયા 17 કરોડનું વળતર મેળવવા ઝંખી રહ્યા છે. ત્યારે સરકાર અને યુનિવર્સિટી એકબીજા ઉપર દોષારોપણ કરી રહ્યા છે.