પંચમહાલ એસઓજીએ 6 ઝોલાછાપ ડોકટરને ઝડપી પાડ્યાં

પંચમહાલ SOG પોલીસે સપાટો બોલાવીને જિલ્લાના ગ્રામ્ય વિસ્તારોમાં ક્લિનિક ચલાવતા 6 જેટલા બોગસ તબીબોને વીતેલા ચાર દિવસમાં દબોચી લીધા હતાં.પોલીસે તમામ ઝોલાછાપ તબીબોની અટકાયત કરીને કુલ 6 લાખ રુપિયા ઉપરાંતનો મુદ્દામાલ પણ કબજે કર્યો હતો.

• પંચમહાલમાં એસઓજીનો સપાટો
• 4 દિવસમાં ઝડપી લીધાં 6 નકલી ડૉક્ટર
• 6 લાખથી વધુનો મુદ્દામાલ પણ કબજે કર્યો
  
  
  
  પંચમહાલઃ રાજ્યમાં કોરોના સંક્રમણમાં હાલ ઘટાડો થયો છે. પરંતુ ગ્રામ્ય વિસ્તારોમાં વધતું કોરોના સંક્રમણ સરકાર માટે એક પડકાર સમાન હતું, જેને ડામવા માટે રાજ્ય સરકાર દ્વારા મારું ગામ કોરોનામુકત ગામ અભિયાન પણ ચલાવવામાં આવ્યું હતું, જે મહદઅંશે સફળ રહ્યું હતું, બીજી તરફ ગ્રામ્ય વિસ્તારોમાં વધતા કોરોના સંક્રમણ વચ્ચે કેટલાક લેભાગુ વ્યક્તિઓ તબીબ સ્વરૂપે સક્રિય થયાં હતાં. પંચમહાલ જિલ્લાના ગ્રામ્ય વિસ્તારોમાં કેટલાક ઝોલાછાપ બોગસ તબીબો કોઈ પણ પ્રકારની તબીબી ડિગ્રી કે સર્ટિફિકેટ વિના તબીબી પ્રેક્ટિસ કરતા તબીબો બિલાડીના ટોપ માફક ઊભા થયાં હતાં, ત્યારે પંચમહાલ જિલ્લા SOG પોલીસ દ્વારા આવા તત્વોને ડામવા માટે એક ખાસ અભિયાન હાથ ધરવામાં આવ્યું હતું, જેમાં વીતેલા ચાર દિવસ દરમ્યાન પોલીસે જિલ્લાના અલગ અલગ તાલુકાઓમાંથી છ જેટલા આવા બોગસ તબીબોને ઝડપી પાડવામાં સફળતા મેળવી છે.

આ પણ વાંચોઃ વડોદરામાં નકલી ડૉક્ટર ઝડપાયો, 20 વર્ષથી આપતો હતો એલોપેથીની દવાઓ

આરોગ્યવિભાગે પોલીસની કામગીરી વખાણી

પંચમહાલ જિલ્લાના ગોધરા શહેરમાંથી 3, કાલોલ તાલુકાના એરાલ ગામેથી 2 અને હાલોલ તાલુકાના શિવરાજપુર ગામેથી 1 બોગસ તબીબને બાતમીના આધારે પોલીસ દ્વારા ઝડપી પાડવામાં આવ્યો હતો. પોલીસ દ્વારા આવા 6 જેટલા અલગ અલગ તબીબો પાસેથી કુલ રૂપિયા 6 લાખ ઉપરાંતનો મુદ્દામાલ પણ કબજેે લેવામાં આવ્યો છે. આમ પોલીસ દ્વારા પંચમહાલ જિલ્લાના ગ્રામ્ય વિસ્તારોની પ્રજાને છેતરતા બોગસ તબીબોને ઝડપી પાડતા જિલ્લાના આરોગ્ય વિભાગ દ્વારા પોલીસની કામગીરીને બિરદાવવામાં આવી છે.

આ પણ વાંચોઃ ડાંગ જિલ્લામાં સતત બીજા દિવસે વરસાદ, સાપુતારામાં આહલાદક વાતાવરણ