વર્ષોની માગ પછી પણ નવસારી રેલવે ફાટક પરનો ઓવરબ્રિજ કાગળોમાં અટવાયો

નવસારી શહેરમાં રેલવે ફાટક બંધ કરી, ડેડીકેટેડ ફ્રેટ કોરીડોર પ્રોજેકટ હેઠળ રેલવે ઓવરબ્રિજ બનાવવાની યોજના છે. પરંતુ રાજકીય ઇચ્છાશક્તિના અભાવે વર્ષો વીતવા છતાં ઓવરબ્રિજ આજે પણ કાગળોમાં જ અટવાઈ રહ્યો છે. બે વાર ડિઝાઇન બદલાયા બાદ અંતે ઓવરબ્રિજની ડિઝાઇન મંજૂર થઈ, પણ હવે સૈદ્ધાંતિક અને તાંત્રની મંજૂરી નહીં મળવાને કારણે ઓવરબ્રિજ હજી પણ કાગળોમાં જ અટવાયેલો રહ્યો છે. જેને લઈને ચોમાસામાં શહેરીજનોએ ટ્રાફિક જામની સમસ્યાનો સામનો કરવો પડશે.

નવસારી: ભારત સરકાર દ્વારા માલગાડીઓ માટે ડેડીકેટેડ ફ્રેટ કોરીડોર પ્રોજેકટ હેઠળ, પ્રથમ ચરણમાં દાદરીથી મુંબઇ સુધી રેલવે ટ્રેક નાંખવાનું કામ ગતિ પકડી ચૂક્યુ છે. જેમાં નવસારી જિલ્લામાં આવતા રેલવે ફાટકોને બંધ કરી, 10 રેલવે ઓવરબ્રિજ બનાવવાની યોજના છે. જેમાં ચાર ફાટક છોડીને 6 ઓવરબ્રિજનું નિર્માણ કાર્ય શરૂ થયું છે અને ગાંધીસ્મૃતિ અને સાગરા ફાટકના ઓવરબ્રિજ પૂર્ણતાને આરે પહોંચી ગયા છે. પરંતુ નવસારી શહેરમાં ફાટક નં. 127 બંધ કરી, ઓવરબ્રિજ બનાવવાની યોજના સ્થાનિક રાજકારણને કારણે અટવાતી રહી છે. જેમાં પ્રથમ ઓવરબ્રિજની ડિઝાઇન મતોના રાજકારણમાં અટવાયા બાદ, તેને પડતી મુકાઈ હતી. બાદમાં અંડર પાસ મંજૂર કરાયો હતો, પણ ચોમાસામાં ટ્રાફિક સમસ્યા, જેમની તેમ રહેવાની શક્યતાને જોતા પાલિકાએ ફરી શહેરના બંદર રોડ પરથી પૂર્ણા નદીના રેલવે બ્રિજ પાસેથી ટર્ન લઈ રીંગ રોડ સુધી યુ-પીન આકારની ડિઝાઇન બનાવી છે અને ઓવરબ્રિજનું નિર્માણ કાર્ય રાજ્ય માર્ગ અને મકાન વિભાગને સોંપાયુ છે.

નવસારીના પૂર્વ અને પશ્ચિમ વિસ્તારને જોડવા અને ચોમાસામાં ટ્રાફિક સમસ્યાના નિવારણ માટે રેલવે ઓવરબ્રિજ જરૂરી છે. પણ ઓવરબ્રિજ હજી શરૂ થઈ શક્યો નથી. જ્યારે રેલવે ટ્રેકના કામને કારણે ગરનાળુ બંધ થતા પાલિકાએ ડાયવર્ઝન આપ્યુ છે. પણ ચોમાસામાં અહીં પણ પાણીનો ભરાવો થવાની સંભાવના સેવાઈ રહી છે. સાથે જ ગરનાળાનું કામ ચોમાસા પૂર્વે પુર્ણ ન થયુ, તો શહેરીજનોએ ટ્રાફિકની લાંબી કતારોમાં સમય બગાડવો પડશે. જેથી વિરોધપક્ષ સાશક પક્ષના અધિકારીઓની અણઆવડતને કારણે ઓવરબ્રિજ કાગળ પર જ રહ્યો હોવાના આક્ષેપો લગાવી રહ્યો છે.

નવસારી રેલવે ફાટક પરનો ઓવરબ્રિજ હજી કાગળોમાં અટવાયો

રેલવેના ડીએફસીસી પ્રોજેકટ હેઠળ નવસારી શહેરની રેલવે ફાટક નં. 127 પર યુ-પીન આકારનો થ્રી લેન ઓવરબ્રિજ 114 કરોડ રૂપિયાના ખર્ચે બનશે. પરંતુ હજી રેલવે અને સરકારી મંજૂરી ન મળવાને વાંકે વર્ષોની માંગ છતાં ઓવરબ્રિજ કાગળોમાં જ અટવાઈ રહ્યો છે. જો કે, ધારાસભ્ય પિયુષ દેસાઈ દ્વારા બ્રિજનું કામ વહેલું શરૂ થાય એના પ્રયાસો કરવામાં આવ્યા છે. નવસારી શહેરની વર્ષોની માંગ બાદ મંજૂર થયેલો રેલવે ઓવરબ્રિજ કોરોનાના લોકડાઉનમાં સરકારી મંજૂરીને કારણે અટવાઈ પડ્યો છે. જે હવે ચોમાસા બાદ જ શરૂ થઈ શકશે, જેથી શહેરીજનોએ આ ચોમાસે પણ ટ્રાફિક સમસ્યા વેઠવી જ રહી.