ગુજરાત પ્રદેશ કોંગ્રેસ સમિતિ માલધારી સેલનાં ઉપપ્રમુખ અને કોંગ્રેસનાં અગ્રણી રમેશભાઈ રબારીએ ગુજરાત પ્રદેશ કોંગ્રેસનાં પ્રમુખ અમિતભાઈ ચાવડાને પાઠવેલા પત્રમાં જણાવ્યું છે કે, નગરપાલિકામાં કોંગ્રેસનું શાસન છે. માળખુુ પણ કોંગ્રેસનાં સદસ્યોનું છે. જોકે, મોરબી નગરપાલિકામાં પક્ષને ભારે બહુમતી મળવા છતાં તબક્કાવાર પ્રજા સેવાને બાજુ મુકીને પક્ષને રાજકીય નુકશાન થાય તેવી રીતે શાસન થઇ રહ્યું છે.
શહેરમાં તમામ વિસ્તારમાં ગટરમાં પાણી ઉભરાય છે, રહીશોના ઘરમાં ગંદા પાણી ઘૂસે છે, રોડ રસ્તા બિસ્માર હાલતમાં છે અને રોડ પર ખાડા જોવા મળે છે. હાલ વરસાદની મોસમમાં મચ્છરોનો ઉપદ્રવ પણ વધી રહ્યો છે. અનેક વિસ્તારનાં રહીશો પાલિકા કચેરીએ હલ્લાબોલ કરે છે, ત્યારે શાસન સંભાળનાર પ્રમુખ કે અન્ય ચેરમેનો મળતા નથી.
પાલિકા કોંગ્રેસની છે પરંતુ, શહેરના ગટર, પાણી અને સફાઈનાં કોન્ટ્રાકટનાં કામો ભાજપનાં સભ્ય અને તેના સમર્થકો કરે છે. જેનું, રીમોટ કંટ્રોલ ભાજપ આગેવાનો પાસે છે. જેથી પક્ષને નુકશાન થઇ રહ્યું છે. મોરબીમાં ધારાસભ્ય કોંગ્રેસ પક્ષનાં છે અને જીલ્લા પંચાયત પ્રમુખ તેમજ તાલુકા પંચાયત પણ કોંગ્રેસની છે, ત્યારે પ્રજાહિતનાં કાર્યો થાય અને પક્ષને થતું નુકશાન રોકવા જરૂરી પગલા ભરવામાં આવે તેવી માગ કરી છે.
