મહીસાગરમાં સિંચાઇના પાણીના અભાવે કપાસના પાકને નુકસાન થવાની ભીતિ

મહીસાગર જિલ્લામાં ચાલુ સિઝનમાં કમોસમી વરસાદ પડ્યો છે. જેથી ખેડૂતોને મકાઈ, ડાંગર, દિવેલા અને કપાસ પકવતા ખેડૂતોને નુકસાન થયું છે. જિલ્લામાં સિંચાઈ માટે પાણીની અછત અને હાલમાં પડી રહેલા તાપ અને ગરમીને કારણે પાકની ઉપજમાં ઘટાડો થયાનું ખેડૂતો જણાવી રહ્યા છે.

• વાતાવરણમાં ગરમીનું પ્રમાણ રહેતા કપાસના જીંડવા અને કાલા સૂકાઈ ગયા
• પાણીની અછત અને હાલમાં પડી રહેલા તાપ અને ગરમીને કારણે પાકની ઉપજમાં ઘટાડો
• ખેડૂતોને શુદ્ધ પીવાનું પાણી મળતું નથી
  

લુણાવાડા: મહીસાગર જિલ્લામાં મોટેભાગે મકાઈ, ડાંગર, કપાસ, બાજરી અને દિવેલાની ખેતી થાય છે. ઠંડીની સિઝનમાં આ પાકો માટે નિયમિતપણે પાણી અને ઠંડુ વાતાવરણ ખૂબજ જરૂરી છે. મહીસાગર જિલ્લામાં થોડા દિવસો પહેલા કમોસમી વરસાદ પડ્યો હતો. જેથી ખેડૂતોને મોટુ નુકસાન વેઠવાનો વારો આવ્યો છે. ત્યારે જિલ્લાના કેટલાક વિસ્તારોમાં મોટે ભાગે ખેડૂતોએ કવચ, મોરગાર્ડ, અને 222 કપાસનું વાવેતર કર્યું છે. જો કે વરસાદ અને સિંચાઈનું પાણી ન મળતા તેમજ વાતાવરણમાં ગરમીનું પ્રમાણ રહેતા કપાસના જીંડવા અને કાલા સૂકાઈ ગયા છે. તેમજ અન્ય પાકોને વધુ નુકસાન થવાની ભિંતી સેવાઈ રહી છે.

પાણીની અછતના કારણે પાકને નુકસાન

ત્યારે ખેડૂતો જણાવી રહ્યા છે કે, અમારે પીવાનું શુદ્ધ પાણી મળતું નથી તો સિંચાઈનું પાણી અમને કેવી રીતે મળે? અમે ખેતી કેવી રીતે કરીએ? ચોમાસું સિઝનની ખેતી વરસાદ આધારિત ખેતી હોય છે. આ દિવસોમાં જરુરી વરસાદ ન પડતા તેમજ વધુ ગરમી પડવાથી અમારા કપાસના પાકની ઉપજમાં કમી આવશે.