સમગ્ર રાજ્યમાં ગુજરાત ગૌણ સેવા પસંદગી મંડળ દ્વારા બિન સચિવાલય ક્લાર્કની પરીક્ષાનું આયોજન કરવામાં આવ્યું હતું. જે પરીક્ષા પૂર્ણ થતા કેટલાક સેન્ટરોમાં ગેરરીતિની ફરિયાદો પણ ઉઠવામાં આવી હતી. સુરેન્દ્રનગરના કેટલાક પરીક્ષા કેન્દ્રોમાંથી વિદ્યાર્થીઓએ કોપી કરી હોવાની ફરિયાદ અન્ય પરીક્ષાર્થીઓએ કરી હતી. પરંતુ તે સમયે પરીક્ષામાં સામેલ સરકારી એજન્સીઓએ સમગ્ર મામલો માત્ર ઉહાપોહ કરવા માટેનો હોય તેને લઈને મામલા પર ઢાંકપિછોડો કર્યો હતો. પરંતુ પરીક્ષામાં મોબાઈલ મારફતે કોપી થતી હોવાના CCTV ફૂટેજ બહાર આવતા સમગ્ર પરીક્ષા પર અનેક સવાલો ઉભા થયા છે.
બિન સચિવાલય ક્લાર્કની પરીક્ષામાં ગેરરીતિ જે પ્રકારે કોંગ્રેસે પરીક્ષામાં મોબાઈલ મારફત કોપી કરાતી હોય તેવો વીડિયો જાહેર કરતા હવે પરીક્ષાને લઇને રાજકારણ પણ ગરમાઈ રહ્યું છે. જૂનાગઢના કોંગી ધારાસભ્ય ભીખાભાઈ જોશીએ સમગ્ર પરીક્ષાને લઇને સરકાર પર તેમના મળતિયાઓને સાચવવાનો આક્ષેપ કરીને રાજ્ય સરકારનું રાજીનામું માગ્યું હતું.
ગૌણ સેવા પસંદગી મંડળ દ્વારા બિન સચિવાલયની પરીક્ષાઓ તેની લઘુતમ લાયકાતને લઈને વિવાદમાં આવી હતી, જે બાદ સરકારે જૂની લાયકાત મુજબ પરીક્ષા લેવાનું નક્કી કર્યુ હતું. ત્યારે હવે ફરી એક વખત પરીક્ષામાં કોપી કેસને લઈને વિવાદમાં આવી રહી છે. ત્યારે કોંગ્રેસ સમગ્ર પરીક્ષાને રદ કરવાની સાથે રાજ્ય સરકારની નૈતિક જવાબદારી બનતી હોય જેને કારણે સરકાર પણ રાજીનામું આપે તેવી માગ કરવામાં આવી રહી છે.
