સાસણ અને દેવળીયાના સુરક્ષિત જંગલ વિસ્તારોમાં લુપ્ત થવાને આરે પહોંચેલા ડાકુ ગીધની એક કોલોની જોવા મળી રહી છે. છેલ્લા કેટલાક મહિનાઓથી આ ગીધ સાસણ અને દેવળીયા વિસ્તારમાં સતત જોવા મળી રહ્યા છે. જેને લઇને વનવિભાગના અધિકારીઓ પણ ખુશી વ્યક્ત કરી રહ્યા છે.
એક સમયે સમગ્ર ગુજરાતમાં ગીધોની પુષ્કળ સંખ્યા જોવા મળતી હતી. પરંતુ, પશુપાલકો અને ખેડૂતો દ્વારા કીટનાશકોનો વધુ વપરાશ કરવાને કારણે આ ગીધ ધીરે-ધીરે નષ્ટ થયા અને તેની સંખ્યા આજે લુપ્ત થવાને આરે પહોંચી ગઈ છે, ત્યારે છેલ્લા કેટલાક મહિનાઓથી સાસણ અને દેવળીયા વિસ્તારના સુરક્ષિત જંગલોમાં ડાકુ તરીકે ઓળખાતા ગીધની એક આખી કોલોની જોવા મળી રહી છે જે બતાવી આપે છે કે સાસણ અને દેવળીયા વિસ્તારમાં ગીધની સંખ્યામાં સતત વધારો થઈ રહ્યો છે.
સાસણ વિસ્તારમાંથી સિહો પણ લુપ્ત થવાની કગાર પર પહોંચી ગયા હતા, જે આજે વધીને 552 સુધી પહોંચી ગયા છે, ત્યારે કુદરતના સફાઈ કામદાર તરીકે ગણાતા આ ગીધ એક સમયે સાસણમાં વર્ચસ્વ ધરાવતા હતા. પરંતુ, કાળક્રમે તે લુપ્ત થઈ ગયા અને આજે ખૂબ જ જૂજ માત્રામાં જોવા મળી રહ્યા છે, ત્યારે આવા ગીધની એક આખી કોલોની અહીં જોવા મળતાં હવે આગામી વર્ષોમાં સાસણ અને દેવળીયા વનવિભાગ પણ સિંહની સાથે ગીધોના સંવર્ધનમા સમગ્ર દેશમાં નામના મેળવશે તેવું લાગી રહ્યું છે.
