જામનગરમાં માનવતા મરી પરવારી, શરમથી માથું ઝૂકે તેવો કિસ્સો જામનગરમાં મોજૂદ

જામનગરઃ શહેરની સરકારી હોસ્પિટલના ગેટ પાસે કોઈ અજ્ઞાત વ્યક્તિ જીવન મરણ વચ્ચે ઝોલા ખાઈ રહ્યો છે. ત્યારે સવાલ ઉઠે એ સ્વભાવિક છે ક્યાં ગઈ માનવતા? શું લોકોએ કે સેવાભાવી સંસ્થાઓએ અથવા જી. જી. હોસ્પિટલના તંત્રે કશુ જોયું નથી કે પછી આ દરેકે આંખ આડા કાન કર્યા છે?

માનવ સેવા એજ પ્રભુ સેવાના નામે બિમાર દર્દીઓ અને મૃતક લોકોની સેવા કરવાના બહાને કેટલાક તકવાદી લોકોએ આ સેવાને રૂપિયા કમાવાનો ધંધો બનાવી દીધો હોય તેવું લાગી રહ્યું છે. સેવા કરતી સંસ્થાઓ અને સેવાભાવી વ્યક્તિઓનું માથુ શરમથી ઝુકી જાય તેવો કિસ્સો ધર્મનગરી જે શહેરને છોટી કાશી તરીકેના ઉપનામથી જાણીતા શહેર જામનગરની સરકારી જી. જી. હોસ્પિટલના મેઈન ગેટ પાસે જોવા મળી રહ્યો છે. છેલ્લા 3- 4 દિવસથી અજ્ઞાત વ્યક્તિ જીવન મરણ વચ્ચે ઝોલા ખાઈ રહ્યો છે.

શહેરમાં માનવતા મરી પરવારી હોય તેવું લાગી રહ્યું છે. હોસ્પિટલ ગેટ પાસેથી અવર-જવર કરતા લોકો આ વ્યક્તિને જોઈને માથું નીચું કરીને ચાલ્યા જાય છે. લોકોને જીવન આપતી હોસ્પિટલના ગેટ પાસે જ આવું દ્રશ્ય ખરેખર માનવતાને શર્મસાર કરનારૂ લાગે છે.