ગીર સોમનાથઃ શિયાળો અંતિમ ચરણમાં છે અને ઉનાળાની કાળઝાળ ગરમી શરૂ થવાને ગણતરીના દિવસોની વાર છે. ગીરસોમનાથ જિલ્લાના ઉના તાલુકાના કળાપાણ ગામના રહીશો પાણી માટે પોકાર કરી રહ્યા છે.
15 દિવસથી પાણી ન મળતા લોકોને કૂવાનું ખારૂં પાણી પીવાની ફરજ પડી રહી છે. ત્યારે ઉનાળાના આકરા તાપ પહેલા જ પાણીની વિકટ પરિસ્થિતિ હોય, તો ઉનાળો કઈ રીતે પસાર થશે તેની ચિંતા અત્યારથી જ સ્થાનિકોને થઈ રહી છે.
ઉના તાલુકાના દિરિયાકિનારા નજીક આવેલા કાળાપાણ ગામમાં જતી પાણીની લાઈનમાં ક્યાંક ભંગાણ થતા ગામના રહીશોને 15 દિવસથી પાણી નથી મળી રહ્યું. જેના કારણે લોકોને કુવાનું ખારૂં પાણી પીવા મજબૂર બન્યા છે.
કાળાપાણ ગામના રહીશોનું કહેવું છે કે, પશુઓ પણ ખારૂં પાણી પીતા નથી. એ ખારૂં પાણી લોકોએ રસોઈ માટે અને પીવા માટે ઉપયોગમાં લેવું પડે છે. જેના કારણે બાળકોમાં રોગચાળા વ્યાપવાનો ભય છે. જ્યારે બીજી તરફ રસોઈમાં પણ ખારા પાણીના કારણે અગવડતા પડી રહી છે. ચા ફાટી જવી અને રસોઈનું ન પાકવા જેવી સમસ્યાઓનો સામનો ગૃહિણીઓ કરી રહી છે.
ઉલ્લેખનીય છે કે, સરકારી તંત્ર આ પાણીની પાઈપ લાઈનનું સમારકામ ચાલુ હોવાનો રાગ આલાપી રહ્યું છે. ત્યારે 15 દિવસથી લોકો કુવાનું ખારૂં પાણી ઉપયોગમાં લેવા મજબૂર બન્યા છે.